#كأس_العالم
الفصل الحادي عشر
انا.. لعبة شد وارخي
ايمن .. شنو
انا.. تبعتلي انطول مانردش عليها وبعدها نقعد متواصل معاها وبعدها نغيب وهكي نستمر فهمت تو
ايمن .. تمام وان شاءالله تجيب نتيجة
انا.. ان شاءالله
ايمن .. بكرة العيلة كلها متجمعة عاد
انا.. اكيد بكرة جمعة ومعاها مباراة فرنسا ومباراة البرازيل يعني بكرة جامع حاجات واجد
ايمن .. كان تخسر فرنسا تقطعنا اسيمة وعائشة وسند
انا.. اه مع اني اتمناها تخسر لكن عشان الجو اللي بيديروه يفوزو خير
ومشى الوقت في الهدرزة وجاء ثاني يوم والصبح اول مافتحت عيوني بعتت لزادا ( صباح الخير على احلى بنوتة
انا بخير غير انشغلت شوي كيف حالك انتي ) وكأنها كانت تستنى في رسالتي لانها بسرعة ماردت
ردت ( صباح الخير شغلتني عليك انا بخير الحمدلله)
كتبت(دوووم الحمد ماتنشغلي على غالي )
ردت ( امين .. ماتخافش ماعنديش غوالي ننشغل عليهم)
كتبت ( كيف ماعندكش غوالي امك بوك خوتك صاحباتك )
ردت( هذوم مش غوالي هذوم قطعة من روحي)
معرفتش شنو نكتب ليها شوي جاتني رسالة اخرى منها
ردت( غريب ممكن نعرف انت من حتى حطيت الرقم في كاشف الارقام عطاني اسم عمري ماسمعت بيه وعندي فضول نعرف من )
ضحكت وخطر عليا وقتها اني نكلم ولد جيرانه انه يشريلي الشفرة باسمه لاني قلت اكيد الفضول حيغلبها وتحط الرقم في كاشف الارقام
كتبت( مش قلنا خليني غريب عليك اريح ليك )
ردت(لكن انت تعرفني وتعرف كل شئ عليا شنو تبي مني )
كتبت( نبي لمحة الحزن في عيونك تحول نبيك تتنفسي الحياة نبيك ترقدي كويس نبيك ترجعي زي الاول)
ردت( كيف بيرجعن هذين كلهن ومن كان السبب فيهن توارى تحت التراب )
كتبت( الحي ابقى من الميت والموت علينا حق صح هو الم الفراق صعب وصعب النسيان لكن موتنا وربنا مايرضيهمش اننا نموتو ونحن عايشين بعدهم )
ردت( ونعم بالله الكلام ساهل)
كتبت( الصلاة وقراية القرآن ليهن دور كبير مانيش قايل النسيان لان النسيان اكيد صعب لكن دور كبير في تجاوز الحزن وصديق او صديقة جديدة )
ردت ( والله ديمة صلاتي وقراية قراني مواضبة عليهن وصداقة جديدة درت )
كتبت ( تمام حاولي مع الصداقة الجديدة انك تتخطي الحزن )
ردت( كيف بيساعدني وهو مايعرفش ظروفي وقصتي )
كتبت ( احكي ليها او ليه )
ردت ( ليه)
كتبت ( مرات يخلي باب قلبك ينفتح من جديد )
ردت ( صعب اللي تحكي فيه باب قلبي مفتاحه اندفن معاه )
على خشت امي .. احمد نضت
انا..اه يا امي صباح الخير
امي .. صباح النور هي صبي عشان بنمشو لحوش عمتك الجمعة هذي عندهم
انا باستغراب.. مش الجمعة اللي فاتت عندهم معناها الجمعة هذي عندنا
امي .. اه عارفة بس اليوم حتى البنات جايات وعندنا حاجات بنديروهن
انا.. بس مش عيب يا امي يسبو حيشان عربهن اليوم ويجن لهلهن
امي .. عندك حق بس استئذنو منهم وهما مقدرين الوضع عارفينا بنطلعو فرح لثلاث شباب واكيد الضغط كبير
انا.. بارك الله فيهم خلاص يا امي نغير ادبشي مابين ما وتيتي الفطور
طلعت امي وشفت رد زادا واضايقت منه وحسيت فعلا ان مهمتي صعبة وفطرنا اني وامي واسامة وطلعنا لحوش عمتي ولقينا البنات كلهن بالعيال ماشاءالله وعدينا نحن الشباب للصلاة وبعدها تغذينا وقعدنا نهدرزو ونستنو في المبارارة وبدت المباراة وامتع شئ فيها حماس خواتي وسند ربي يحفظهم اسيمة وعائشة الوحيدات عندنا اللي متعصبات واجد في التشجيع وفعلا فازت فرنسا وطبعا جونا انقلب ضحك بسبب فرحة اسيمة وعائشة وحتى عيالهن دارو جو مع هبال امهاتهم وعدى الوقت ماحسينا بيه ونحن مافينا واحد تحرك من الحوش على اعصابنا نستنو في مباراة البرازيل وبلجيكا وللاسف بعد تسجيل الهدف الاول لصالح بلجيكا الاحباط وصلنا بسرعة ورغم ان المباراة حلوة بس انتهت بخسارة البرازيل ونحن شاعرين باحباط كبير
خالي عمر .. راه كورة ماتستحقش الاحباط هذا كله
سراج .. صح يا باتي بس لما تبدا متحمس لفريق وبالذات البرازيل توقعات واجد انها تاخذه السنة فهذا ليش حسينا بالاحباط لكن زي ماقلت هي كورة
انا.. ومحد يتوقع منو اللي بيفوز واللي يخسر
ايمن .. اهي فرنسا كانت خارج الحسابات كلهن واهي وصلت لمراحل متقدمة وتو مباراتها مع بلجيكا مش حتكون ساهلة لكن نتوقع فرنسا تفوز
اسيمة بفخر .. اكيد عندك شك
ايمن .. وانا نقدر يكفي انك انتي تشجعي فيها بيش نتحمس انها تفوز
انا.. سامحيني اسومة اما انا ماتعبي عليا بكل لو تأهلت فرنسا للكأس اي فريق بيلعب ضدها انا بنشجعه
عائشة بضحكة .. وتقول عندي روح رياضية يا راجل من 98 وانت مانضفتش بكل شور فرنسا
انا.. اكيد وبالذات لما البرازيل تخسر قدامهم فاكيد مستحيل حنشجعها مهما كان السبب
سند .. يبقى معاش تقول عندي روح رياضية
انا.. روحي الرياضية عالية بكل الا قدام فرنسا وبعدين حتى كان خذت الكأس بنضاف ليها نجمة وفي فرق يا ماما بين نجمتين وخمس نجمات ساد والله نكمل
ازهار .. انا دخيلتكم خلاص احمد كان فتح فمه على البرازيل معاش يعرف يسكت لبعد بكرة
انا.. حتى هي البرازيل لو سمحتو حتى لو خسرت
وبعد نقاشات طويلة وضحك روحنا لحوشنا وانتبهت لفوني لقيت رسالة من زادا
كتبت ( وينك يا غريب معاش رديت عليا )
فالبداية كنت مانيش راد عليها لكن بعدين غيرت رايي
رديت ( قاعد غير كنت لاهي شوي )
كتبت ( خفت تكون زعلت مني )
استغربت كلمتها وحسيت بفرح ودق سريع في قلبي
رديت ( يهمك زعلي )
طولت ماردتش عليا لدرجة ايست وخشيت على الفيس شفت منشور زهرة على مباريات اليوم وبمضمون ( انها حتى لو خسرت البرازيل انها مش زعلانة على الاقل ماطلعتش زي المانيا من الاول او قدمت مباريات يدرهن الكبد زي الارجنتين او مباريات يلعب فيهن لاعب واحد زي البرتغال خسرت البرازيل وهذي هيا الكورة وتمنت الفوز لانجلترا لانها بتشجعها لو لعبت ضد فرنسا )
عجبني تعليقها وجاني اشعار رسالة فتحتها وانا بكل لهفة نقرا في ردها
كتبت ( اكيد يهمني ممكن انت شخص مانعرفكش لكن لانك مهتم بي واحيانا واجدة تكون سبب ضحكتي اللي قريب نسيت شكلها اكيد يهمني لانك ترجع فيا للحياة مرة ثانية ومهتم بيا رغم ان حتى اهلي تعبو من المحاولة )
فرحت واجد بكلامها وطمني واجد كلامها بدرجة كبيرة لدرجة خلاني نبعت لايمن انه يجيني ورديت عليها
رديت ( كلام اسعدني وياريت نقدر اني نكون ديمة سبب سعادتك وسبب رجعتك للحياة وسبب انك تكوني سعيدة طول الوقت وسبب حاجات واجد متمني اديريهن )
كتبت ( زي شنو )
رديت ( زي النوم بدل ماترهقي روحك في الشغل عشان تقدري ترقدي بدون ماتاخذي حبوب تساعدك على النوم اللي كانن وسيلة من اللي جربتي بيهن بيش تقدري ترقدي )
زادا
نراسل في الغريب لانه غريب بالنسبة ليا لكن ديمة عندي فضول نعرفه من تراسلت انا وياه واجد وديمة يخلي فيا نضحك ونستنى في رسائله وحتى يوم غاب ماراسلنيش حسيت بفراغ كبير جواي ماحسيتيش بيه الا من بعد وفاة علاء وقل احساسي بالفراغ اهو مع مراسلات الغريب ليا لكن لما مابعتلي شئ حسيت بالفراغ رجعلي خفت اني نكون نسيت علاء فقررت اني مانراسلاش لكن ماقدرتش والمشكلة انه ماردش عليا الا بعد وقت وقعدت نستنى في رده وانا في خاطري ندعي انه ماتكونش صايرة معاه حاجة لكن بعدها الحمدلله رد عليا وفرحت واجد ورغم اني خفت وحتى لما حلمت بعلاء لاول مرة شفته مبتسم وفرحة واضحة في وجه وكل مانسئل فيه مايردش عليا لكن فرحت اني شفته فرحان لان السنين اللي فاتن ديمة نحلم بيه وهو حزين ومش فرحان لكن المرة هذي على العكس وقلت بنمشي لمرت عمي نحكيلها على الحلم
لكن رد الغريب الاخير عليا حيرني كيف عرف اني كنت ناخذ في حبوب منومة ولو ما انتبهش موسى ليا كنهدا راه وصلت لحالة الادمان من كثر ماخذيتهن وكيف عرف اني نرهق روحي في الشغل بيش من التعب يادوب نقدر نرقد هالاربع او الثلاث ساعات ومعاهن نوعى مفزوعة بسبب منظر علاء وهو يجيني في الحلم وهو زعلان سكرت الفون ومابيتش انرد حاجة وقلت نتأكد من حاجة قبل نستنى الفرصة بس تواتيني لاني الحق شاكة في شخص لكن مازالت مش عارفة كيف نعرف هو او لا
ايمن .. كنك يا احمد ان شاءالله خير
انا.. خير لكن بندير حاجة ومش عارفة شنو الرايي
ايمن .. قولي وانا نرد عليك اذا كويس او لا
انا.. بنعرف روحي لزادا
ايمن بصدمة .. شنووووووو
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
أنت تقرأ
كأس العالم
Fanfictionعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
