#كأس_العالم
الفصل الثاني
انا.. اه تعرف نين نعسني النوم وانا نصفح في حسابها بس مازال في واجد ماشفته هي كل يوم تنزل
ايمن .. تصدق انا انتابع فيها من سنة وحاولت واجد اني نخش معاها في مواضيع ثانية لكن تسكر في وجهي الباب
انا.. شنو حبيتها
ايمن .. لا مش حكاية حب لكن عارف بتاع لما تعجبك شخصية بنت وتحاول تتعرف عليها اكثر لكن لما مالقيتش منها الا الصد فتت الموضوع
انا.. الحمدلله
ايمن .. على شنو اني ماحبيتهاش
انا.. اه
ايمن .. في شنو تفكر
انا .. شئ
ايمن .. احمد
انا.. نعم
ايمن .. شنو وراك
انا.. شئ قولي امتى نفاتحو خالي بمشروعنا
ايمن .. ننتهو من فاتحة اسامة اليوم وبعدها نقمعزولا
انا .. متفقين
وجهزنا روحنا ومشينا العصر للفاتحة وتمت الفاتحة على خير وطبعا العشاء عند اهل العروس ردينا للحوش وجهزنا السيارات وطلعنا بالصبايا والزغاريد
وروحنا وانا كلي شوق نفتح ايبادي ونشوفها بالك ردت عليا وفعلا لقيتها رادة من حوالي ساعتين وردها كان ( انا نشجع في برشلونة قبل مايكون ميسي فيه وشجعته على خاطر رونالدو البرازيلي وانا صغيرة لان من لما فتحت عيوني فتحتهن على الكورة وميسي مانحباش وبالذات في الفترة الاخيرة بعد لعبه وخسارتنا الدائمة قدام الريال ) عجبني ردها وانها معترفة بلعب ميسي الاخير اللي ماينفعش بكل رغم انه يلعب في الفريق اللي تشجع فيه وقعدت نقرا ونقرا في منشورتها ولفت انتباهي منشور زي التعزية لكن قريت حتى التعليقات ماعرفتش منو اللي ميت ليها وهي مش رادة وبعد المنشور هذا تقريبا سنة كاملة معاش نزلت حاجة وبعدها كملت قراية في منشوراتها القديمة ووصلت لمنشور زي انها التهنئة بالخطوبة او زواج مش عارف مش واضح المنشور شنو بالزبط وركزت على تاريخ المنشور لقيته من خمس سنوات استغربت رجعت لبياناتها لكن مش مكتوب انها مخطوبة او متزوجة فكرت فيها وفكرت في روحي اللي قعد دماغي مشغول بيها واجد يعني مش اول بنت اتابع في الكورة في واجد زيها غريب تفكيري بيها وقعدت نقرا في منشوراتها وكانن منشوراتها اللي قبل منشور الزواج او الخطوبة يدلن على وحدة سعيدة زرادي وبحر هي وتقريبا عيلة عمها حتى على كليتها كلهن مناشير سعيدة جدا اخرى لكن بعد منشور التعزية انتبهت انه معاش في منشور سعيد يا تحكي على الكورة يا تنزل في حكم او خواطر اغلبها حزينة او مواقف صارن معاها برغم احيانا تكتب فيهن بصيغة كوميدية الا الحزن طاغي على كلامها ففهمت ان اللي مات هذا شخص بدل حياتها وتمنيت نعرف كل حاجة عليها ومانندريش على روحي الا وانا راقد ومشى اليوم زي العادة مافيش حاجة جديدة وطبعا الحوش رجع لهدوئه بعد ماكل واحد روح لحوشه وجاني ايمن وعدينا لخالي عمر اللي هو بات ايمن طبعا ايمن ولد عمتي وباته ولد عم امي عظم رقبة وصديق عمري ونفس العمر انا وياه ومانتفارقوش معظم الوقت
انا وايمن .. السلام عليكم
خالي عمر .. وعليكم السلام
اي ريح اللي هفتكم عليا انتم الاثنين
انا.. خدمة اكيد
خالي عمر بضحكة .. قول مصلحة خزي يابتاعين المصالح
ايمن .. حرام عليك يا باتي نحن بتاعين مصالح
خالي عمر .. امغير تسلمو ان شاءالله خير
انا .. لو وافقت باذن الله خير
خالي عمر .. هيا نسمع
انا.. خالي نحن نبو الحوش القديم انا وايمن
خالي عمر بفرحة .. شنو بتستقرو وبتتزوجو فيه وبتاخذوه وبتسيبو الشقق بتاعتكم
ايمن .. قريب يا حاج لكن لا مش لهذا نبوه
خالي عمر .. امنا لشنو
انا.. يا خالي انا وايمن طول وقتنا فاضي يعني نروحو من المدرسة ونقعدو ماديين وجهونا ولولا الخدمة اللي تشغل فيها لنا مرة مرة راه قاعدين زي بتاعين الشوراع لاخدمة ولاقدمة
خالي عمر .. كلام زين كمل
ايمن .. ففكرنا انا واحمد في مشروع نستفيدو منه في الوقت الفاضي وفي نفس الوقت نشغلو معانا شباب ثانية
انا .. نبو الحوش القديم لان حوش العيلة ودياره واجدات واكيد بنصينوه وبنعدلو فيه شوي عشان نبو انديروه مدرسة للدروس الخاصة بس بتكاليف اقل من المدارس الاخرى
ايمن .. وبما ان الحوش القديم ليك انت يا باتي ماليش اي واحد من عمامي الحق فيه وطبعا غير انه مكانه كويس وعلى طريق يعني مش حيكون صعب على الطلبة انهم يوصلو ليه
خالي عمر .. اكيد ليا وضنا عمي عارفين هكي وحتى جدك الله يرحمه قالها لهم قبل مايتوفى و فكرة حلوة ومخططين ليها كويس بس من وين التكاليف اللي تبو تصرفو بيها على المشروع لان زي ماتعرفو كل مشروع بيش يعطيك مدخول لازم تصرف عليه
انا.. الفلوس الحمدلله واجد زي انا زي ايمن انت عارف ان رواتبنا مانقربوش فيهن بكل من لما اشتغلنا وزيد عليها بالنسبة ليا حقي من ايجارت المحلين مانقربش فيه الا بعد وين وين
ايمن .. وانا بنخش مع احمد بنفس النسبة واذا نقص انت بتعطيهن ليا كدين نردهن لك
خالي عمر .. به الحوش بتاخذوه هكي مني والله ايجار
انا وايمن .. ايجار اكيد
خالي عمر بضحكة .. اكيد اخرى
به لو قلت ليكم انا نعطيه لكم هكي
انا.. لا يا خالي مايصحش الكلام هذا اولا هكي معاش نحسو بقيمة المشروع لان فيه حاجة جت بالساهل وثانيا الحوش بعد عمر طويل بيكون لي ايمن وخوته وخواته مش لايمن بروحه ونحن اللي في الاخير مشروعنا بينضر
ايمن .. فالحل الافضل اننا ناجروه منك وانت عاد ساعدنا في الايجار وغير ان الصيانة اللي بنديروها ليه تخصمها من الايجار لان يوم نفكرو نسيبوه تبدا انت الكاسب وتقعد مدرسة صغيرة جاهزة تقدر تأجرها وتكسب منها
خالي عمر .. ماشاءالله عليكم مفكرين في كل شئ ومخططين ليه لكن نسيتو حاجة
انا.. شنو
خالي عمر .. المكسب انتم قلتو بديروها بمبلغ مخفض وبتشغلو معكم شباب ثانين فكيف بتعطو الرواتب وبتربحو في نفس الوقت
انا.. حنديرو اعلان نطلبو فيه مدرسين ومدرسات بس برواتب بسيطة لان الغرض من المدرسة افادة الطلبة والربح القليل
خالي عمر .. ولو مالقيتوش
ايمن .. حنلقو اكيد يا باتي مستحيل بلادنا قل منها الخير
خالي عمر .. فكرتو في الاسعار
انا.. اكيد حتكون بالتقسيط واقل من معظم المدارس الخاصة وبعدين هي مش مدرسة بمعنى الصحيح هي حتكون مكان لاعطاء الدروس الخاصة زي بتاعين الشهادات او حد مش فاهم مادة
خالي عمر .. بس هكي الفايدة حتكون قليلة
انا.. ربي يبارك في الربح القليل
ايمن .. وغير الوقت اللي حيكون في حاجة مفيدة
انا.. وحتى قرايتنا اللي محصورة في حصص الصبح بس نستفيدو منها ونحن نعطو فيها طول الوقت
ايمن .. لان اصلا فكرنا نكملو ماستر
خالي عمر بحب .. ربي يحفظكم انتم الاثنين كيف تكملو في كلام بعض
انا وايمن .. امين يارب
خالي عمر .. خلاص متفقين وعشان كل شئ يكون رسمي بكرة نطلعو نديرو عقد ايجار عند محرر العقود عشان تقدرو بيه اديرو باقي التراخيص
انا .. تمام بكل ياخالي ربي مايحرمنا منك
خالي عمر .. ولا منكم يارب
وفعلا بدينا بكل حماس وقعدنا نصينو في الحوش طبعا حوش العيلة ميزته دياره واجد وحوش كبير ماشاءالله يتفصل منه بالريح ثلاثة حيشان كويسات ومشينا كويس في صيانته
ايمن ..شنو الخطوة الجديدة
انا.. الاعلان حنتفقو مع شركة ونحطو اعلانات على الطريق ونشوفو الصفحات اللي عدد اعجاباتها قوي ونطلبو منهم اعلان حتى لو بفلوس تو نفكرو في صيغة الاعلان او نقولك حنخلو الشركة الاعلانية هي اللي تصيغه لنا
ايمن .. راي سليم وهذي وظيفتك عشان انت تعرف كيف تتعامل في الامور هذي وتو انا بنعدي نشوف السبورات والادوات اللازمة للتدريس
انا.. بنقولك خطرت في بالي فكرة
ايمن .. شنو
انا.. شنو رايك انديرو فصل ويكون ثقافي
ايمن باستفهام .. كيف
انا.. مش انا وياك قرينا تاريخ
ايمن .. اه
انا.. عليش
ايمن بضحكة.. حلوة عليش عشان نحبو اي حاجة متعلقة بالتاريخ والاثار
انا.. تمام بكل وبمجال التدريس نعطو في جزء من اللي تعلمناه وقريناه من الكتب اللي معبية مكتبة حوشكم ومكتبة حوشنا
ايمن .. ابدا حتى ربع اللي في دماغنا ماطلعناه بسبب المناهج المعفنة هذي
انا.. تمام فكرتي بالفصل الثقافي اننا نعطو دروس ومعلومات ثقافية تنمي الثقافة التاريخية للطالب خارج المنهج ويكون قيمتها المادية بسيطة عشان نحببوهم في التعلم والمعرفة اللي يكون خارج منهج المدرسة
ايمن .. زعمك تنجح الفكرة
انا.. هو انقول ان شاءالله تنجح لان الفكرة ان حد يحكيلك على التاريخ وقصص تاريخ بدون ماتشد كتاب حترسخ في دماغك اكثر وغير ان اللي مايحبوش القراية حيعجبهم الموضوع
ايمن .. تمام نحن نجربو بفصل واحد بس ونحددو عدد الطلاب ونشوفو الاقبال لو نحجت نزيدو فصل ليك وفصل ليا وكنهدا نقعدو على فصل واحد وكل مرة واحد فينا يعطي درس وماتكونش مدته طويلة بيش مايملوش
انا.. تمام التمام
ايمن .. شنو اخبار زهرة ليك ايام معاش حكيت عليها
انا ..........
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
أنت تقرأ
كأس العالم
Fanfictionعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
