#كأس_العالم
الفصل السابع
زادا.. انا بنعتذر على الايام اللي انقطعتهن ووعدت الطلبة اني نعوضهم في ايام فاضية فياريت تشوف الجداول وكيف تنسق معاهم خصوصا فترة امتحانات نهائية تو
انا
حمدت ربي وشكرته انها ماشكتش فيا وان هذا بس اللي تبيه
انا.. حاضر ماعندكش مشكلة لكن ان شاءالله مش حيكون في ضغط عليك خصوصا ان سبب تغيبك انك كنتي مريضة
زادا بتنهيدة .. لا هكي اريح كل مانضغط روحي بالشغل كل مانرتاح اكثر
انا.. حاضر تو يجي ايمن ونشوف كيف انرتبو الحصص
زادا .. حتى لوقت متأخر شوي عادي مثلا للمغرب او بعده بما ان الاساتذة يقعدو موخر
انا
اضايقت من كلامها كيف تقعد مع اساتذة بروحها في وقت متأخر ومانندريش على روحي قلت ليها
انا.. بس كيف تقعدي موخر بروحك مع اساتذة خصوصا الابلات حيكونن روحن الوقت هذا
زادا.. لا ماتخافش حنكلم خوي يجي يقعد معاي ويروح بيا
انا.. اه يصير خير نشوف الجدول ونبلغك
زادا.. ان شاءالله احم
انا.. تفضلي
زادا.. ممكن نقول حاجة
انا.. تفضلي اكيد
زادا.. ليك في الكورة
انا.. اكيد
زادا بحماس خفيف .. والله
انا.. عشق الكورة بالنسبة لي بس مش متعصب
زادا.. واي فريق تشجع
انا.. البرازيل اكيد
زادا .. حتى انا
انا.. والله كويس رغم ان في ناس واجد سيبو البرازيل على خاطر لعبها الضعيف وخسارتها المونديال اللي فات والنتايج اللي تحشم في مبارياتها
زادا.. انا مشجعة قديمة وبطبعي الفريق يلعب كويس او لا طالما هو فريقي يبقى خلاص صح ننقهر لكن هذه الكورة مافيهاش حاجة ثابته
انا.. فعلا والله عندك حق
زادا.. تعرف انك تشبه لاعب كورة
انا باستغراب .. انا منو زعمك
زادا.. غريبة مافيش حد في عيلتك يتبع في الكورة امنا
انا.. بالعكس تقريبا العيلة كلها اتبع وبالذات الدوري الاسباني والانجليزي
ومافيهمش حد مرة قالي اني نشبه لاعب كورة منو زعمك اللي نشبها
زادا.. زلاتان ابرهيموفيتش
انا.. معقولة اصلا مايخطر على حد لاعب السويد
زادا.. بس لاعب من قبل موسم مع برشلونة وبعدها مع مانشستر يونايتد ولعب في باريس سان جيرمان اللي يلعب فيه نيمار تو غير الدوري الايطالي
انا.. اوووه ماشاءالله مهتمة شكلك
زادا.. اه بس معجبة بالاعب هذا وعلى فكرة اني انشجع في ليفربول
انا.. اوه محمد صلاح بس انا نشجع في مانشستر يونايتد
زادا.. عكس بعض بس غريبة ماحد قالك تشبه ليه بما ان عيلتك تشجع في الكورة وتعرف تشبه واجد بالذات لما تكون رابط شعرك زي اليوم
انا
طبعا انا فرحان لاني حسيت بيها مرتاحة في الدوة معاي لكن استغربت تغيرها هذا والاريحية هذي معاي
زادا.. وين رحت
انا.. قاعد غير مستغرب الصراحة
زادا.. من شنو
انا.. اصلا اول مرة تحكي معاي هكي ديمة كلامك شوي بالعادة
زادا باحراج .. ضايقتك
انا.. بالعكس اسعدني الكلام معاك بس مستغرب التغيير
زادا.. مش تو نحن تمينا عيلة
انا.. اه هذا ليش واحسن عيلة والله
زادا.. تعرف اكثر حاجة عاجبتني في سراج من زمان شنو هي
انا بضيق ماعرفتش سببه .. شنو
زادا.. عيلته اللي هي عيلتكم عاجبني الترابط اللي بينكم عاجبني علاقتكم بانسابتكم بالذات اهل الصبايا بحكم صداقتي برندا كنت نشوف في خواتك وبنات عمتك كيف يصبو في مناسبتها تقول اهل مش نسابة بس وهذا شئ معاش موجود تو
انا بحزن.. ممكن بسبب بعد عيلتنا الفعلية علينا ارتبطنا ونحن حوش عمتي الارتباط هذا وهو اللي خلانا نعرفو قيمة العلاقات الطيبة وصلة الرحم
زادا .. مع ان فضولي قوي نبي نعرف سبب بعد عيلتكم اذا مايضايقكش طبعا لكن بنخليه مرة ثانية تحكيه ليا لان وقت حصتي بدا
انا.. في اي وقت تفضلي ومافيشي سر بيش يضايقني انك تعرفيه
زادا.. سلام تو
انا.. سلام
وطلعت من عندي وانا مستغرب التغير اللي صار وبالطريقة هذي وخطرت على فريال واتصلت بيها وقلت ليها تجيني
فريال .. السلام عليكم
انا.. وعليكم السلام
فريال .. ان شاءالله خير
انا.. خير تو كانت معاي زادا وحسيت بتغير كبير حلو بس حيرني
فريال بخوف .. شنو
انا.. جت وهدرزت معاي وجوها كان حلو ماتقولش كانت تمر بازمة نفسية ليها اسبوع
فريال بتنهيدة .. اه خفت الحق سحبتها حاجة ثانية
انا بحتت فيها بمعنى كملي بسرعة
فريال.. زادا لما تمر بالازمة هذي كل سنة بعد ماتفوق وترجع عادي اتكون في صداقة جديدة غير ديمة تكون نسائية لانها تقول معرفة شخص جديد يخليك مشغول في تفاصيله وهي تبي تشغل عقلها لكن هالمرة شكلها بتغير وجاء الدور عليك انها تبيك صديق ليها والحمدلله جت فيك انت
انا .. الحمدلله خفت الحق من التغيير المفاجئ وعندك علم بمن شبهتني
فريال بضحكة .. بلاعب سويدي تقريبا زلاتان اسمه او حاجة كيف هك
انا.. اه كيف عرفتي
فريال .. اول يوم جيت فيه انا للمدرسة وكان اول مرة شكلك تجي للمدرسة رابط شعرك زي تو فعلى طول قالتها ليا ورغم اني ماعرفتش شكله فورتني صورته وفعلا تشبه ليه واجد
انا.. اتصدقي عيلتي كلها ذكورها واناثها متابعين كورة والحمدلله حتى من الكناين لكن مافيهمش واحد شبهني بيه
فريال .. ممكن عشان الناس معتمدة في التشبيه بالدرجة الاولى على الفنانين والممثلين لكن اللاعبين تحس قليل جدا غير اننا حتى لو انتبهنا للاعب يكون مشهور واجد وبالنسبة للاعب اللي شبهتك بيه زادا على حسب قولة زادا انه رغم لعب في برشلونة لكن في وقتها ماكنش برشلونة داير ضجة زي تو
انا.. صح عندك حق بس تعرفي فرحت واجد انها حكت معاي بالاريحية هذي
فريال .. بس رد بالك تجيب ليها طاري انك عرفت انها زهرة موسى
انا.. كوني هانية
فريال .. نستئذن تو
انا .. تفضلي
ومشى يومنا عادي وانا نستنى في رد على رسالتي لكن ماصار شئ وروحت للحوش ولقينا خواتي وبنات عمتي حاصلين في بطاقات الدعوة فقمعزت معاهم وبعدين لحق ايمن و رواد واسامة وقعدنا نكتبو معاهم ووصلنا عند بطاقات العيلة وكلنا بحتنا في بعضنا بغصة توجع لكن مانقدروش مانعزموهمش حتى لو مقاطعينهم وحتى لو ماجوش لان عزمناهم في عرس زينب وازهار لكن ماجاش منهم حد عمي الصغير بس بعث هدية لازهار وهدية لزينب واعتذر عن الجي وخلاص كثر خيره وبعد ماكملنا خشيت لداري وكل واحد روح لحوشه وبعتت لزهرة وردت عليا طول وقعدنا ندردشو عادي وبعدها بعتت ليها
اناكتبت ( تعرفي اليوم بنوتة حلوة بمن شبهتني )
زهرة ردت ( من )
انا( زلاتان برهميموفيتش )
زهرة ( اوه شكلها تفهم في الكورة ترا استنى خليني نشوف صورتك الشخصية كويس بيش نشوفها صح او لا )
انا(به )
ونكتب وانا نضحك عليها وعلى ثمتيلها صح ليها لكن كانها عايشة شخصيتين
زهرة ردت( صح تشبهلا بس مش واجد)
انا( شنو الاختلاف) واستغربت كلمتها
زهرة (العيون انت اوسع شوي واللحية انت اكثر وتقريبا حتى الطول اضني انت اطول بشوي صح )
انا( والله ماركزت لكن هذين اختلافات بسيطة)
زهرة( ليش شعرك طويل)
انا( نحبه هكي تعرفي انه كان طويل لتحت كتوفي بس قصيته تو )
زهرة( باهي اللي قصيته لانه مش حلو الراجل يقعد شعره طويل واجد)
انا( في سبب مخليني ديمة نطول فيه لنهاية رقبتي)
زهرة ( ممكن نعرف السبب)
انا( خليه مع الوقت تعرفيه)
زهرة ( ان شاءالله )
انا ( معاش تغيبي هكي علينا ديمة طلي)
زهرة ( مرضت الله غالب)
انا( نزلي على الاقل منشور اشعر بالمرض)
زهرة( ههههه عليش وشنو بيديرو ليا لو كتبته بيرفعو يعاينوني والله بيوصفو ليا الدواء)
انا( مش القصد لكن بس اهو منشور واحد يطمن عليك فيه)
زهرة ( معليش بنسكر عندي خدمة واجد بكرا)
انا(تصبحي على خير )
ضحكت شكلها هربت من كلامي لكن الحمدلله تغير جديد حتى على النت وكبر الامل جواي اني نوصل للي نبيه وثاني يوم زي العادة نمشي للمدرسة الحكومية وبعدها للمدرستنا والحمدلله في وقت قليل بكل مدرستنا انتشرت سمعتها لدرجة ان قعدنا نعطو في حصص للطلبة الاولاد بعد المغرب عشان مانبوش الفصول يكون فيها عدد الطلبة اكثر من عشرة لدرجة اطرينا نتعشو كل يوم في المدرسة وازهار وزينب وزادا اطريت اني نخليهم في الليل وفريال اطوعت مع بنت عمها تساعدنا وجاء اخ زادا اسمه موسى وتعرفت عليه وماشاءالله عليه شاب محترم وواضح انه يحب اخته واجد وهو اصغر منها في العمر وبعد ماطلعت من حصتي لقيتها هي وخوها و ايمن يشربو في قهوة وقبل بنمشي ليهم لكن شفتها تضحك وقديش ضحكتها حلوة فقررت نبعث ليها رسالة وكتبت( الابتسامة حلوة حاولي تبتسمي دائما وماتخليش الحزن يسيطر عليك ) بعتتها بعد مارجعت للفصل بيش ماتشكش فيا وطلعت قريب خمس دقايق من بعتي ليها وجيت شورهم وهي شادة فونها باستغراب
انا.. السلام عليكم
هما .. وعليكم السلام
انا.. زادا حصتك بتبدا تو صح
ومازالت مركزة في فونها ماردتش عليا نين هزها خوها
زادا .. ها
انا.. حصتك بتبدا تو
زادا.. اه اهو راكبة
فريال.. كنك زادا في حاجة
زادا بشرود.. اه لا لا مافي شئ
موسى .. زدو متاكدة
زادا.. اه مافي شئ هي ماشية لحصتي
وركبت وسيبتنا وقعدنا نهدرزو مع موسى وشوي وعدى ايمن لحصته وبعده بشوي فريال مشت لحصتها حتى هي
موسى .. صار انت مدير المدرسة
انا.. تقدر اتقول
موسى .. كيف
انا.. الفعلي نعتبر المدير لكن انا وايمن شركاء فيها ومعاي في كل حاجة انديرو فيها خطوة بخطوة وفي الاستاذ ياسين يساعد فينا واجد فحتى هو يعتبر مدير معانا
موسى .. خوك ايمن وياسين
انا.. لا ايمن ولد عمتي ورفيق عمري وعلى فكرة اذا مش مركز ايمن اخ سراج نسيبكم وياسين صديق لينا
موسى .. والله ماركزتش عليه الحق وحتى فريال ولا زادا وحدة فيهن قالتلي
انا.. بالك ماجتش الفرصة
موسى .. تعرف ان سراج عجبني واجد
انا.. سراج ماشاءالله عليه بس شنو سبب الاعجاب
موسى .. اخلاصه لجوري وانتظارها تعرف اني نعرف بعلاقتهم من هما صغار وكنت في سن مراهقتهم انا المرسال بينهم
انا.. قديش الفرق بينك وبين جوري
موسى.. انا اصغر منها اربع سنوات وتعرف زعلت من سراج لما خطبها ولد عمي عطية نسحاب سراج رخى بيها لكن لما جيت لجوري عشان بناخذ منها عنوان حوشه بيش انجي وبندير معاه عركة لان وقتها كانو حولو من حوشهم اللي حذا عمي عشان ماطلعش راجل مع جوري لكن لما حكت جوري لي شنو صار احترمت سراج وتو زاد كبر في عيني واجد باخلاصه ليها
انا.. وبكل فخر تقدر تقول طبع فينا كلنا لما نحبو مستحيل نبيعو عندك رواد رغم صغر خطيبته لكن اعجب بيها وهي في اعدادي وقعد صابر عليها نين وصلت لعمر 16 بيش خطبها وقرا فاتحتها وعلى ماحاولن بنات واجد من نفس عمره او اصغر منه بالشوي وممكن كانن حتى اجمل من رندا لكن شئ ماتغير نين تمت على ذمته واسامة هذا حكايته حكاية تصدق ان خطيبته معاه من الروضة وخشو ابتدائي و اعدادي مع بعض وتفارقو في الثانوي لكن كانو وقتها في علاقة رسمية واهي تو على ذمته شرعا
موسى .. ماشاءالله نحن شبابنا وللاسف عكسكم نهائيا (وبنبرة حزن) باستثناء علاء الله يرحمه
انا.. الله يرحمه
وقعدنا نهدرزو ونين طلعن البنات وروحو الطلبة وسكرت المدرسة انا وايمن وروحنا للحوش ميتين من الجوع ونحن نتعشو
ايمن .. خلاص هانت اسبوع ونكملو
انا.. اي والله بس بنكسدو هكي
ايمن .. شنو رايك انديرو فصول صيفية للسنة الجديدة خصوصا ان بعد ماتكمل امتحانات الاعدادي يبدن الثانوي لكن طبعا طلبة الثانوية اللي عندنا كملنا معاهم كل حاجة يعني فعلا بنفضو رسمي
انا.. هي فكرة لكن حنخلوها في اخر شهر في العطلة يعني قبل بداية المدرسة بشهر لان الطلبة اكيد يبو يستمتعو بالصيف ونحن زيهم
ايمن .. ياودي مش عارف من وين بنستمتعو اذا بعد مانكملو المدرسة بنبدو جديات في مساعدة الشباب في شققهم وبعدها الفرح
انا.. خير من الكساد واكيد حنلقو وقت وتخيل المباريات النهائية مازالنا ماكملنا ونطرو انتفرجو عليها في المدرسة
ايمن.. اي عندك حق الحمدلله اننا اشتركنا في قناة النت كنهدا راه ماقدرنا نتفرجو عليهن
انا.. خطرها شفت زهرة كيف متشمتة في الارجنتين
ايمن .. اه شفتها تي حاقدة حقد عليها
انا.. تقول قاتلين بوها غير ميسي اللي ديمة واخذ حصة من شماتتها
ايمن .. تعرف مستني على نار تعليقها على مباراة الارجواي والبرتغال خصوصا ان كريستيانو لاعب الريال وهي طبعا برشولنية
انا.. حتى انا متشوق لردت فعلها
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
أنت تقرأ
كأس العالم
Fanfictionعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
