كأس العالم

الفصل السادس عشر

#كأس_العالم
الفصل السادس عشر
زادا بصدمة .. علاء
علاء.. اه علاء يازادا ليش درتي هكي
زادا .. اول مرة تناديني زادا
علاء .. لانك زعلتيني 
زادا.. عشان تزوجت و شاركت حياتي لراجل غيرك
علاء بهزة راس.. لا يازهرة  هذا نصيب وربي كاتب هكي
زادا .. شنو اللي مزعلك امنا
علاء.. انك سيبتي الحوش وجيتي هنا في يوم زي هذا يوم بتكوني شريكة لانسان ثاني ما ذنبه شئ غير انه حبك تجي هنا ليش
زادا بدموع .. جيت بنودعك جيت بنسيب ذكرياتي كلها
علاء ببسمة خفيفة .. هكي ريحتيني يا زهرة القلب الجميل حبي وعيشي حياتك عشان انا نكون سعيد عيشي يا زهرة يكفي اللي ضيعيته من عمرك يكفي
زادا .. وين ماشي اقعد انا نبيك
علاء بابتسامة كبيرة .. خلاص يا زهرة انا انتهى دوري هنا وتو دور احمد
زادا بدموع .. استنى ياعلاء
وعيت وانا دموعي مغرقات وجهي وعرفت روحي اني في حلم واول مرة نحلم بعلاء ويتكلم معاي او ممكن من كثر ما تمنيت اني نشوفه اليوم جاني او جاباته مخيلتي مسحت ادموعي وولعت الضي وخشيت للحمام توضيت وصليت ركعتين لله وطولت وانا ساجدة لدرجة مانندريش على الوقت اللي قعدته ساجدة لكن طويل و انا سلمت على خشت موسى للشقة لاني نسيت ماسكرتش الباب وجاء طول خذاني في حضنه
موسى .. ليش يا زادا درتي هكي خوفتينا عليك
زادا .. آسفة يا خوي حقك عليا بس كنت محتاجة اني انجي اليوم هنا
موسى .. شغلتينا عليك حتى احمد قلبه نار عليك وهو اللي فطن ان في حد فتح الضي
زادا بهمس .. احمد
موسى .. اه احمد يا زادا اللي قلبه  وهو يدور عليك يجيب فيه هنا قالي مش عارف حاسس انها هنا ورغم اني اكدت ليه ان مافيش حد في الحوش الا انه قعد يبرم على الحوش من ساعتين وبعدها فطن بالضي واتصل بيا طول
زادا .. احمد
موسى بضحكة .. كنك زادا مسكتي في احمد بس كانك اول مرة تسمعي اسمه
زادا .. مش عارفة
موسى .. به هي ننزلو نطمنو اللي لو حطيتي ايدك على قلبه تنحرق من كثر ماقلبه يغلي خوف عليك
زادا .. به العيلة
موسى .. من لما اتصل بيا احمد بلغتهم وطمنتهم عليك هيا ننزلو
احمد
جاء موسى وطلع طول وكان لقيت طلعت معاه لكن خفت اني نشوف منظر مانقدرش نتحمله ولكن قلبي يدق بسرعة وكاني نستنى في موسى يقولي لقاها غارفة في دمها لانها قطعت شراينها او لقاها ماتتحركش لانها بلعت حبوب اي سيناريو عطيب خطر عليا وانا مازالت غارق في افكاري وندعي لربي ان الضرر يكون بسيط  عيني طاحت على موسى وهو شاد ايد زادا وشكلها كأني اول مرة نشوفها في راحة على وجهها رغم الاضاءة اللي قدام الحوش مش قوية لكن باين وجهها رايق وحسيت براحة كبيرة وطلعت مني تنهيدة كبيرة
انا بلهفة مقدرتش انتحكم فيها .. انتي كويسة
زادا .. عمري ماكنت احسن من اليوم الحمدلله
انا براحة .. دووووم الحمد يارب
موسى .. هيا يا احمد معانا للحوش
انا.. لا بنروح للحوش لان اكيد امي مشغولة على طلعتنا هكي بدون مانقولو حاجة
موسى .. عمتي حليمة اتصل بيها سراج وطمنها تو كلمته وقالها ليا وقالي ان هلي يستنو فيك على العشاء معانا
انا............
زادا .. هيا يا احمد على الاقل نعوضك بدل الفجعة اللي حصلتها وبصوت واطي آسفة
انا.. المهم انك طيبة وبخير يهون كل شئ
وطلعت في سيارتي وهيا ركبت في سيارة خوها بس شعور حلو رغم ان كلمتها بسيطة لكن حسستني كأني طاير في السما وجهها المرتاح واللي لمحة الحزن حولت منه خلاني نتفائل واجد بان اللي جاي احلى وتعشينا عندهم انا وايمن وسراج وفرحان ان خوتي عدلاتي الله على شعور العزوة وبالذات لما علمو بان زادا مش قاعدة على طول طلعوا معاي ماسيبونيش هذي العزوة وبعد العشاء والهدرزة الحلوة روحت ولقيت العيلة قاعدين كلهم ويسئلو ويستفسرو على شنو صار وطمنتهم وخشيت لداري لان اليوم يعتبر غريب بالنسبة لي بدا بفرح مع توتر وفي نصه خوف مرعب واخره راحة وراحة الحمد والشكر ليك يارب ورقدت وثاني يوم نضت وعادي درت روتيني اليومي وبعد ماروحت لفت انتباهي سهراية البنات وكلهن مجتمعات عن غير عادة ومعاها مافيش صوت للعيال معناها الامر مهم 
فاطمة .. هذي اهم حاجة مافكرناش بيها
ازهار .. به شنو الحل
امال .. والله من بدري ونحن نفكرو في حلول ومالقيناش حل كويس
انا.. كنكن حايرات تقول اللي تفكرن في حل لي قضية عالمية
عائشة ..والله يا حمودي الا عويصة المشكلة
انا.. خير ان شاءالله قولولي بالك نقدر انساعدكن
زينب .. فرح الشباب
انا.. كنه تقريبا ماعندكمش شئ ناقص حتى من دبشكن جهزتنا
اسيمة .. المشكلة ان كيف بيخشو الشباب للصالة على نسوانهم
انا.. مافهمتش
امال.. انت عارف يا احمد ان مرت الخو محرمة مؤقت لسلفها
انا.. اه عارف
فاطمة .. كيف بتكون خشت الشباب على صبايهم وهنا لابسات ڤيلوات واكيد الڤيلوات عرايا غير المكياج والشعر وانت عارف
اسيمة .. فكرنا انهن لما يخشو الشباب يلبسن الكابات بتاعت الڤيلو لكن كل وحدة اكيد تبي تصور مع راجلها فمش معقولة الصور حيكونن بالكابات
انا.. عندي الحل
كلهن .. شنو
انا بضحكة على لهفتهن .. ليش مايخشوش بالدور
فاطمة .. كيف
انا.. مش في كل صالة دار تخش ليها العروس قبل ماتخش للصالة بيش تبرم على روحها
ازهار .. اه
انا.. تمام بكل يخشن العرايس عادي مع بعضهن وبعدها يخش سراج الاول تكون رندا وولاء خشن للدار وماتقعدش في الصالة غير جوري بس وسراج حيكون سريع لان طبعا زي ماعارفين مستحيل انه يرقص او يدير من الحاجات هذين فيدوب يبدل الدبل ويقمعز شوي عشان المصورة تاخذ لهم صور ويطلع
زينب .. تمام وبعدين
انا.. تخش جوري وتطلع ولاء لان اسامة اكبر من رواد وبعدها رواد
عائشة بتفكير .. زعمك الوقت يسد
انا.. يخش سراج بدري
نرجس .. بس زعمك العرايس مايضايقنش لان يعتبر الوقت بيقضنه جوا الدار واجد
انا.. هو صح كلامك نرجس حيلقن روحاهن انهن قضن عرسهن في دار   به ليش بدل مايقعدن في الدار ليش كل وحدة ماتطلعش مع راجلها
اسيمة .. كيف
انا.. يعني لما يخش سراج ويقعد شوي ولما بيجي يطلع يطلع معاه جوري ويمشو للشقتهم بدل ما الوقت يضيع في قعادهن جو الدار خصوصا يعني لو قعدن في الصالة شنو بيديرو
فاطمة .. راي كويس نحس فيه
امال .. ونقدمو العزومة ساعة والعرايس يجن بدري على الاقل بيش يقعدن وقت كويس مع الضيوف
ازهار .. بس كيف يصير في الزفة هكي حيخرب اللي خططتو ليه
زينب .. صح يا احمد انتم مش متفقين انكم تطلعو بيهم بزفة كبيرة
انا.. ساهلة هو نحن اللي قاعدين سند وانا وايمن ونقسمو السيارات سند مع سراج وانا مع اسامة وايمن مع رواد والسيارات تتقسم على الاصحاب بحيث كل زفة يطلعو فيها اصحاب العريس
اسيمة .. راي سليم وصح ليك حمودي جبتها والله ونحن من بعد ما اطمنا على زادا ونحن مشغولين كيف الحل
عائشة .. معناها بكرة الجمعة نحكو الموضوع للكل ونتفقو حتى على مشيتنا لفريال وزادا
اسيمة .. حتى جوري وولاء ورندا كلموهن بكرة عشان نحكو معاهن التفاصيل هذي
وطلعت من عندهن بعد ماحليت مشكلتهن طبعا نحن عيلتنا صح ماننفصلوش رجالة وصبايا لكن باحترام عمر خواتي ماطلعن قدام رجالة خواتهن بدون محرمة او لبسة مستورة وحتى نرجس الله يسامحها من يوم ماجتنا عمري ماشفت ليها شعر او مكياج قوي لو سميت كحل العين مكياج فبطبيعي ان العرايس مش حيقعدن بڤيلوات عرايا ومكياج قدام خوتي وكان الحل اللي عطيته ليهن افضل حل ومشن الايام وانا كل يوم نراسل في زادا وهي ترد عليا بس بتحفظ لكن مادورتهاش فرحان انها ترد عليا وهذا المهم عندي وجاء يوم مشيت الصبايا لهل زادا وفريال بعد ماقضن يومين وهنا يشرن في حاجات السوابيت الحق ربي يعينهن خواتي قديش مايتعبن وان شاءالله نسوانا يطلعن زي نرجس وخية لخواتي ومعاهن في كل شئ وطبعا لبست بدلة سودا انا وايمن وقميص دمي وايمن قميص ابيض وطلعنا شور حوش عمي علي عشان نبي نصور مع زادا وايمن مع فريال وبنخشو نلبسوهن بس زي ما خططت للصالة في عرس الشباب خططت لينا وفهمت اسيمة على هذا بيش تقوله ليهم وفعلا بعد فترة خشيت انا الاول قمعزت في صالة واسعة وطلعت ليا زادا واه من زادا وشكل زادا صح مانيش قايل انها تبادلني الحب لكن نظرة الراحة في عيونها مع الحشم سادتني كانت لابسة فستان طويل منفوخ شوي ومش عريان كمامه للمرفق من الدانتيل برقبة واسعة بشكل مثلث لونه ازرق ملكي تحفة طالع عليها وشعرها البني القصير للكتوفها والواضح انه ناعم واجد مع مكياج خفيف ما زادها الا نعومة صبيت من قمعيزتي وقربت منها دخلتها عمتي راضية وسيبتنا شوي قبل ماتجي المصورة ومانندريش على روحي قربت منها وبستها على جبينها بوسة هادية وخفيفة وحسيت برعشتها وارتباكها وبعدت عليها
انا.. مبارك علينا زادا مبارك عليا انتي
وماردت عليا شئ غير انها رفعت عيونها فيا
انا.. شنو ماتبيش تقولي مبارك
زادا بصوت واطي .. مبارك
انا.. زادا انتي مرتي تو وماتخافيش معاي بكل انا مستعد نحتويك ونحتوي احلامك وكل شئ
زادا وفهمت شنو نقصد بكلمة احلامها .. معاش في احلام خلاص معاش بنشوفه
انا باستغراب .. شنو عرفك
زادا بصوت واطي يادوب سمعته.. لانه مطمن عليا معاك
انا بحب .. وعمرك ماتنوجعي معاي
زادا .. بس عندي طلب
انا بحب .. ادللي
زادا .. تعطيني وقتي بيش نقدر نبادلك شعورك ناحيتي
انا.. العمر كله خوذيه
زادا بضحكة خفيفة .. مش للدرجة هذي
وخشت علينا المصورة وخذت لينا صور حلوات ولبستها الدبلة والمحبس وطاقم بسيط خذيته ليها لان مايليقش بيها الحاجة الاوفر وطلعت وطلعت زادا وانا راضي وقانع بنظرة الراحة اللي نشوف فيها في عيونها  وبعدها جاء دور ايمن اللي كانت السعادة واضحة بعيونه بعد ما طلع من عند فريال وفطنت بيه
انا.. هاك امسح فمك زين خزيه ماقدرت تصبر
ايمن بخوف.. قصدك قاعد
انا بضحكة .. لا مش باين واجد لكن مازال آثار للي بيركز عليك
ايمن بتنهيدة .. الحمدلله كنهدا حيكون موقف بايخ لفريال قدام خوتها
انا.. ياراجل مرتك على سنة الله ورسوله
ايمن .. حتى انكان يا راجل هذين حاجات خاصة بينا بس المفروض
انا.. وطالما عارف هكي ليش ماصبرتش روحك
ايمن بحب ورغبة .. ماقدرتش كان مادرتها كنت متت فيها
انا.. بعيد السو عليك
وكملن الصبايا وطلعنا ونحن طايرين من السعادة وبدن تجهيزات الفرح بتاعت الشباب وكلمنا عمر ولد عمي سليمان انه تم في الحجز وحجزلهم في شاليهات وانه هو اللي حيقوم بمهمة الدهوير ليهم وويريهم الاماكن والحجز حيكون بعد اسبوع من فرحهم عشان يقدرو يسافرو بسيارتهم  ونحن انا وايمن نعاونو فيهم بجهدنا من شقة لشقة وتجهيز مع الصبايا حاجات الفرح ومن سوق لسوق والله مابعدهن وفي الاخير بكل نوضوا بكل ثقة ونقولو شنو اديرو نحن غير درنا اروحانا ساعدنهم في تطبيق العلب ماهن يجن مفتوحات لازم نطبوقهن بيش ياخذن شكل العلبة تعبنا وحسينا ظهورنا خلاص لابال هنا من تجهيز برا وجوا واللي عندها صغار لاهية من سوق لسوق غير باهي خواتي اول حاجة دارنها شرن دبش عيالهن ودبشهن هنا الاولات حتى من نرجس وانا رسائلي مع زادا زي ماهنا ماتغيرتش مابيتش انغير العادة هذي لان مرات الكتابة تخليك تحكي اكثر من الحكي بروحه وقبل نبي ناخذ ليها لبسة لفرح جوري لكن هيا مابتش قالتلي بتلبس الفستان اللي جبناه ليها يوم الفاتحة وعدن الايام وجاء فرح الشباب والحمدلله كمل على خير والعرسان في شققهم متهنين بعد يوم الصباحية اللي درناه كبير وطبعا الحاجة الوحيدة اللي كويسة بس حضر عمي الصغير ومرته وعياله اللي واحد من عمر اسامة والاخر من عمر رواد وتعرفو علينا وفرحتنا الحق جيت عمي بالذات عمتي مريم فرحة بخوها وبمرته وعياله ورجع حوشنا لحركتنا نحن بس او الاصح حركة شركة التنظيف لان خالي مباش يخليهن يغسلن حاجة قال سادهن تعب الفرح بروحه وطبعا نسيت انقوللكم ان حتى فرحي انا وايمن تحدد بعد شهر من فرح الشباب وبدينا طول في تجهيز شققنا والبنات لما طلعو يكملو في فرش شقق الشباب دارن برمة لشققنا واختارو لنا حاجات وطبعا المطبخ ودار المعيشة قالت زادا شوري وفريال حتى هي المطبخ ودار الجلوس قالت شوري فالبنات عرفن شنو يفرشو الباقي وعدى من الشهر اسبوعين وتفرشن الشقق غير حاجات العرايس بس اللي بيجيبنهن والعرسان روحو من طرابلس وعجبتهم الرحلة واجد بالذات الصبايا لانهن عمرهن مازارن مغرب وتكو على الخمس ومشو لبحرها واثار لبدة وبعدها مشو لمصراتة وقعدو فيها يوم وفرحنا بجيتهم طيبين وكملت لمتنا وزادت عليتنا والبنات كملن حاجتهن بدري بالنسبة للفرح وخصوصا انهن وهنا يجيبن في حاجات فرح الشباب جابو حاجات واجد ودسوهن لفرحنا وطبعا خواتي ولله الحمد انهن متواليات كل حاجة نحن نعطو الفلوس وكل حاجة شورهن حتى الذهب والدبش بعد مايتفقن مع العروس يوتن في كل حاجة وانا مشيت للمحل الذهب وطلبت يصنعلي طاقم مخصوص لزادا  وجاء اليوم المنتظر يوم فرحنا وقررت انا وايمن اننا بنديرو زي مادرنا مع الشباب نخش انا الاول وبعدها نطلع بزادا يخش هو وقررت انا وايمن نخالفو الشباب ونلبسو بدالي بيض بقمصان بيض وببيونة سودا وكندرة سودا والفرق بس بين بدلة ايمن وبدلتي ان بدلة ايمن فيها من الحواشي خطوط سود ارقاق يعني داير الرقبة والبطم بتاع الجاكيت اسود وخشيت على ملاكي اللي تمنيته وربي حققلي امنيتي وخشيت ادرج فيا عائشة واسيمة ربي يحفظهن وسلمن عليا امي وعمتي ومرت عمي وعمتي راضية وعمتي رحمة وعمتي خديجة مرت عمهم عطية وبعدها وصلت لعروستي الحلوة اللي طلعة زي سندريلا بحكم جسمها وشكلها ونعومتها  لابسة ڤيلو حلو منفوخ كله من الدانيتل بنص كم ورقبة واسعة نازالة على الكتوف مبين شوي من صدرها زادها نعومة على نعومتها على طوق شعر من الورد الابيض محطوط على شعرها البني الناعم بنفخة بسيطة من قدام ومكياج يهبل طالع عليها مش قوي لكن مش خفيف  وطاقم لونه ابيض حلو بشكل فراشة مزين رقبتها وصلت لعندها وبستها على جبينها وكان خاطري في بوسة في مكان ثاني لكن هانت
انا.. بسم الله ماشاءالله سبحان الله فيما صور
زادا بصوت واطي .. شكرا
انا.. الحمدلله يارب تمنيتك وتميتي لي
زادا.................
شديت ايدها وقمعزتها وحسيت برعشة ايدها بين ايديا فرفعت ايدها وبستها بشويش وبدل ما الرعشة تقل زادت واستغربت رفعت بايدي الثانية وجهها شوري
انا.. زادا انا راجلك
زادا .. عارفة
ولاحظت رعشة شفايفها وزاد استغرابي
انا.. كنك زادا ترعشي ماتخافيش مني كوني مطمنة انك معاي في امان وعمري ماندير حاجة اضرك او ضد رغبتك
زادا بهمس دوبك سمعته.. عارفة
انا بضحكة .. كنك زادا تقول عليك عفريت اسمه عارفة
زادا بحشم .. شنو تبيني نقول
انا.. احكي معاي عادي
زادا .. العمر قدامنا ونحكو
انا.. عندك حق به تو شنو انديرو
فاطمة .. بدل الدبلة واعطيها هديتك اللي نفختنا بيها
انا بنظرة لفاطمة .. به به يا فاطمة غير تو مش فاضيلك 
فاطمة .. اليوم عريس خوذ راحتك
وصبينا وبدلن الدبل  وقلت لفاطمة تحول الطاقم اللي لابساته زادا وشيرت لعائشة ومدتلي العلبة اللي مديتها ليها لما خشيت للصالة وفتحت العلبة وكانت عبارة عن طاقم  سلسلة بحرف A وحرف Z وبينهن قلب ومعاها خاتم وانسيال ودناديل بنفس الشكل وقعدت انلبس فيه لزادا بمساعدة عائشة
انا بهمس .. هذا حرفي وحرفك وحرف A يجي حرفي ويجي حرف علاء
رفعت راسها ليا لانها كانت مركزة مع الانسيال وانا نلبس فيه ليها وشفت في عيونها نظرة سادتني معاش نبي غيرها نظرة اعجاب نظرة احترام وابتسامة شفتها في عيونها قبل فمها بستها على شفايفها بوسة خفيفة ماقدرتش نشد روحي وبعد ماجتنا المصورة وصورتنا صور حلوات وكل ماكنت الصور حميمية شوي وتقرب مني زادا نحس في جسمها يرعش واستغربت بزيادة رعشتها وبعدها طلعنا مع بعض وخششت زادا للدار بيش تستعد وتلبس الكاب وطلعت سيبتها تاخذ راحتها وطلعت لايمن
زادا بخوف .. كلمولي عمتي راضية تو
جوري .. كنك يازادا ترعشي هكي
زادا بدموع .. كلمولي عمتي راضية نبي عمتي
جوري بخوف .. باهي غير بطلي بكا
طلعت جوري تنادي في عمتي راضية
عمتي راضية بلهفة .. كنك يازادا وكنك ترعشي هكي
  زادا ببكا .. خايفة ياعمتي
عمتي راضية بهدوء .. خايفة من شنو يازادا
زادا ببكا .. مش عارفة شنو اندير خايفة ياعمتي
عمتي راضية .. بطلي بكا اولا وبعدين شنو اللي مش عارفة اديريه
زادا .. اللي جايني ياعمتي
عمتي راضية بارتياح لانها فهمت سبب خوفها .. سيبي روحك ليه وخلي هو كل حاجة عليه بس
زادا .. بس خايفة يضايق مني لاني مانعرف شئ
عمتي راضية باستغراب .. كيف ماتعرفي شئ يابنتي بعمرك هذا قصدك ماتعرفي شئ شئ
زادا بهزة راس بمعنى لا
عمتي راضية .. يابنتي انتي كان عرسك الاول مش مازال عليه شئ لولا اللي صار
زادا .. ماهو علاء الله يرحمه كان يقولي ماتقري شئ ولاتسئلي حد اللي تبيه انا نعلمه لك
عمتي راضية باستغراب كبير .. قصدك حتى بوسة كبيرة مافيش بينكم 
زادا .. بهزة راس بمعنى لا وخدودها تمو حمر من صراحة عمتها
عمتي راضية .. كيف يابنتي وعلاء يعتبر راجلك من عمرك 16 سنة كيف فهميني
زادا باحراج .. علاء الله يرحمه كان يقول ان الدنيا مافيهاش حاجة معروفة او شنو النصيب وين يعزقه  والواحد مايندريش على نصيبه وين وانا مش عارف نكون ليك لاخر العمر او لا (وبغصة كملت ) تقول قلبه حاسس اني في الاخير مش حنكون ليه فكان عمره ماباسني الا على جبيني او خدي حتى على فمي بوسة عادية مش زي بتاعت الافلام حتى لما ياخذ فيا لحضنه مايضغطش عليا واجد وقالي مستحيل انديرلك حاجة الا وانتي في حوشي
عمتي راضية .. الله يرحمه عرفت كيف انربي
زادا.. الله يرحمه
عمتي راضية .. ماتخافيش يابنتي احمد شخص متعلم ومتفهم وحيتعامل معاك بالشوي لكن المهم انتي ماتتمنعيش واذا خفتي عادي قوليله فهمتي عليا
زادا بحشم .. اه فهمت
عمتي راضية .. والليلة هذي بالذات مانبيش نقولك انسي علاء لكن حاولي بنتي عشان ماتغضبيش ربي انك ماتفكريش فيه اليوم لان هذي اهم ليلة بينكم وعليها توقف حياتك كلها معاه
زادا .. ان شاءالله
عمتي راضية .. به نخليك ونكلمك جوري والله عبير تجي تلبسك
زادا.. كلميلي جوري عبير تلقيها حايسة هيا وعيالها
عمتي راضية .. عقبال نشوف عيالك يارب
زادا .. يارب
انا كنت واقف برا مع ايمن وموسى والشباب وايمن ماباش يخش قال نين نطمن عليك انك طلعت وطلعت عمتي راضية ونادت على موسى وحكت معاه شوي وبعدها جاني موسى وخذاني بروحي بعيد عن الشباب
انا بلهفة .. ان شاءالله خير زادا فيها حاجة
موسى .......................
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة