البارت السادس والعشرون
#قلوب_على_جرف_الهاوية
.........................................
قلوب على جرف الهاوية
للكاتبة nuha-d-h
فرح
صحيت على ايد تتلمس بوجهي وصوت بكاء فتحت عيوني وبقيت ارمش وبعدين انتبهت اني بحضن منو يالله دخيلك هاي منو ابتعدت عنها بفزع
-منو انتي مستحيل مو معقولة ما صدك
-لا خية صدكي انة اختج سماح الي كانت غايبة ومختفية بحجة الموت
فرح بصوت كلة يرجف من اثر الصدمة
-انتي شتحجين منو انتي ما اعرفج لج اني اختي سماح ماتت وموتتني وياهة
لج اني اختي سماح ادمرت ودمرت حياتي وياهة بيوم الي ماتت بي لج اني اتدمرت من بعدج
شتحجين شنو جاي يصير راح اتخبل زين اذا انتي مو ميتة شلون هانت عليج اختج تشوفيها تتلوع وما حاولتي تبردين نارها بخبر وجودج بالدنيا
سماح وهي تبجي وتحاول توصل لفرح الي دخلت بحالة من الهستريا من ورة المفاجئة
فرح -ولج بعد موتج صرت اتگطع باليوم الف مرة من القهر والحقد والانتقام كنت كل يوم اصبح واني هدف واحد ببالي ان ادمر جدي الانسان الي استقبلني واتحمل جنوني واستهتاري زين ليش ليش هذا كلة شنو الغاية من اختفائج وخبر موتج احجي كولي يبنت امي
وبعدة فترة من السكون الذي عم جو الغرفة ومرت اللحضات
فرح
صارت مشاعري شوية شوية تتكيف مع الوضع
وبديت استوعب فكرة ظهور اختي المفاجيء بحياتي
وبعدما اتقبلت خبر ان سماح اختي عايشة وبعدها على قيد الحياة
انهاريت على الارض وصرت ابجي مثل الطفلة التي انهكتها الحياة المتلاطمة عليها بصعابها من جميع الجهات
صارت دموعي تلسعني من اثر الحرقة الي بداخلي
شفت اختي سماح اقتربت مني بكل هدوء مثل ماكانت تسوي وياي بالماضي من اكون حزينة حضنتني بين ايديهة
واني بلحظتها انهارت كل تحفظاتي بتجاهة وشمرت نفسي لحظنها اااااااخ الله يا حضنها وكعدت اشم بحضنها لكيت ريحة امنا الغالية بدفو حضنها ااخ الله رحمتك شكد واسعة
مر الوقت على الاختين بالكلام وتبادل الاخبار وبدت المفاجئات وحدة ورة اللاخ تظهر لفرح المصدومة
وصارت سماح تحجي لفرح الي صار وياهة
بيوم الي اخذني عمو توفيق وعلي وياهم بالسيارة
بوقتها دخلوني بمزرعة نزولوني من السيارة واني گلبي من الخوف اجة يوكف گلت هاي هي اقتربت ساعة موتي
شفت علي دخل لداخل البيت واني وعمي منتظرين بالحديقة وشفتة اجة بتجاهي وجايب وياه سجين جبير للذبح اني بوقتها اتخبلت وصرت مثل الطير المذبوح فرت روحي من الخوف وشمرت نفسي على رجلين عمي توفيق
وگعدت اتوسل
-عمي فدوة رحتلك والله مظلومة لاتدخلون بخطيتي ابوس رجلك لتذبحني ابوس ايدك عمو
حسيت على عمو توفيق دنگ علية ورفعني من زندي وگومني من الگاع واني جسمي كلة يهتز من الخوف
كمت ورفعت راسي وشفت علي اتقدم علية ورجعت للخلف كلت هذا ناوي يذبحني بيدة
-لا لا اااا عفية علي لاتظلم بختي
اقترب مني وغمضت عيوني بس ظليت فترة مغمضة منتظرتة يجرني ويذبحني لكن كانت المفاجئة من شفتة جاب خروف وذبحة گدامنا ولثك ملابس وايدين عمو توفيق بالدم وفتح كم دكمة من ثوب ابوه
توفيق-شوفي بوية سماح هذا كلة الي راح نسويه حفاظاً على سلامتج وسلامت خواتج هسة احنا رايحين اني وعلي لابوي حتى نثبت للكل ان اني ذبحتج واتخلصت من العار
بقيت صافنة وجامدة بمكاني من المفاجئة
علي-تكدرين تفوتين تدخلين جوة بالبيت محد موجود اريدج تقفلين الباب عليج من نطلع واحنا بعدين نرجع نفهمج بالسالفة كلها
وفعلا رحت دخلت بالبيت وقفلت الباب على نفسي ورحت اتوضيت وصليت ركعتين شكر على سلامتي والله بوكتها بجيت بجي مصاير ممصدگة الله نجاني من هالمحنة
فرح وهي تمسح دموعها
-زين وجدي عندة علم بالموضوع لو بس عمو توفيق وعلي يدرون بالسالفة
سماح -سمعي جايتج بالسالفة
المهم ورة ساعات اجة عمي توفيق وعلي ووياهم جدي
وفتحتلهم الباب وكانت اعصابي جداً متوترة
دخلتهم وكعدنا وبدوا يفهموني السالفة كلها
الجد-شوفي بوية اني خليتهم يجيبونج هنا حتى اكطع الشك باليقين بخبر وفاتج وسويت هذا كلة حتى تنطوي السالفة على الكل ويصدكونها واولهم عمج نبيل
سماح اني اول ماجابو سيرة عمي نبيل وجهي انگلب لونة لان هذا الشخص عمري ما راح انساه على الي سواه بينا
