قلوب على جرف الهاوية
للكاتبةnuha-d-h
فرح
بعد ما وعيت على نفسي استغربت اني منو جابني هنا بكل ظني اني بعدني بغرفتي الظلمة الي مثل حياتي
كنت گوة افتح عيوني احس بثقل بالجفون انتبهت على شي بيدي اتحسست باللمس انتبهت هذا كانيولا مربوطة بالمغذي بعدين بدة نظري يوضح شوية شوية وانتبهت على وحدة كاعدة على كرسي قريب على السرير وكانت لازمة ايدي بين ايديها الدافية للوهلة الاولى شفت اختي سماح اي هاي اختي سماح بس الظاهر. اني جاي احلم
كوة طلعت مني الكلمة بس حسيت بشفايفي بدت تتحرك بكلمة بصوت هامس
-سسسماح
لكن انتبهت على الايد الدافية انسحب من ايدي وراها ماحسيت على شي
الا من صحيت مرة الثانية وكنت هالمرة اكثر سيطرة على روحي كدرت اصحى وما ارجع انام وكان جفوني هالمرة اخف
انتبهت على وحدة كاعد بصف السرير ووياهة وحدة لاخ واكفة رفعت نظري وشفتهم سلوى وسرور
ابتسمت من شفتهم
خطية هنة من شافني وعيت على حالي نزلت دموعهن الظاهر اني بالمستشفى وكانو البنات قلقانات علية
سلوى وهي تبوس راسي-الحمدلله على سلامتج يالغالية
والله خوفتينا عليج
سرور وهي تناشغ مثل الطفل وتحضني-فرح والله متت من الخوف عليج كرهت الدنيا المابيها انتي خية ربي لايفجعني بيج
فرح حسيت بخوف خواتي علية وشفتهن شلون كعدن يدارن بية مثل الطفلة
فرح-تدرون بنات اني شفت سماح اجت زارتني هنا سودة علية گلبها علينا حتى وهي ميتة
سلوى-الله يرحمها ان شاء الله من تطلعين نسويلها ثواب ونختم الها القران
ورة كم يوم كتبلي الدكتور على خروج بعد ما عرفت سبب دخولي للمستشفى
ودخلت بعد هاي الفترة بهدوء وسكون صرت ما احجي وية اي واحد حتى خواتي من وصلت للبيت دخلت على بيبي ابد ما حجيت وياهة اي كلمة بس حطيت راسي بحضنها ونمت احس اريد اهرب من الواقع لوباقية بالمستشفى هواي احسن على الاقل ما راح التقي بَـــأي واحد يذكرني بفضيحتي وانكساري
لكن هنا كلساعة واحد داخل علينا من اولاد عمي توفيق الي محد يقبل يعوفنا خصوصاً علاء رغم صدي الهم كلهم لكن هو استمر يجي ويطمن علية
وصارو بنات عمي وعمتي رسمية وعمامي كل يوم يجون احس بروحي اختنكت من وجودهم حسيت اكو حسرة بگلبي اريد اطلعها خصوصاً من شفت نبيل وبنتة نسرين وسندس احس بيهم جايين يتشفون بية لكن انتبهت على سلوى من اجت سندس گبل گومتني واخذتني فوك هي وسرور احس بيهن يردون يحموني من اي شي يقهرني وينرفزني لكن ما تركني لوحدي بالغرفة وعرفت سبب خوفهن بتركي لوحدي يخافن خاف ااذي روحي
فرح وبصوت مغلف بالجليد-بنات لاتخافون ما راح اسوي بنفسي شي ترة اني مو لهدرجة ضعيفة وعقلي تافه وانتحر علمود هيج سبب مايسوى
ترة ذيج المرة وتجرح ايدية كانت بسبب كنت اكص بشعري بدون ما انتبه على روحي انجرحت ادية ووكع المكص مني بدون حتى ما انتبه على جرحي لان كنت بوكتها مصدومة فلا تخلون ببالكم ان اني واحد بالمية اسوي بنفسي هيج شي علمود شخص تركني ما اتوقع هذا الشخص راح يكون اكثر اهمية من سماح وبابا وماما الله يرحمهم بيوم تركوني انتبهت على نظرات الخوف بدت تختفي من عيونهم وصارت بمكانها نضرت الاطمئنان على حال اختهم
بعدها طلبت منهم نقالي اريد اجري اتصال
جابت سرور نقالي وكانت متخوفة مني
اخذت نقالي منها وشفت سلوى تركتني لوحدي يمكن عندها شغل بالبيت وبقت سرور كاعدة يمي
اتصلت على شخص كنت محتاجة اسمع صوتة واو ل ما اتصلت
رد النقال باول رنة
رنا-هلة خية فروحة بشريني طمنيني عنج ولج متت بدمي من سمعت بيج وبعرسج والله اتخبلت
فرح-على كيفج وحدة وحدة شنو هذا الغزو من الاسئلة
انطيني مجال حتى احجي
انتي شلونج بالاول
رنا-اني بخير ما دام انتي بخير
طمنيني شلون صرتي هسة
فرح-الحمدلله زينة ما يصير بية شي لاتخافين علية ترة العار يبقى مايصير عليه شي
رنا-لاعفو عليج لاتحجين هيج هذا مو حجي فرح الي اعرفهة اريدج ترجعين فرح السباعية القوية واريدج هالمرة وتستغلين الوضع لصالحج
فرح-شلون شسوي اكوم الزم رشاشة واخرطهم كلهم واحد واحد واخذ حيفي وحيف اختي المرحومة منهم وابرد نار گلبي
رنا-لاحبيبتي هذا مو حل لا اريدج اول شي تبدين تنهضين بنفسج وتبدن تبنبن لنفسج مستقبل وسند لروحج يخليج تستغنين عنهم كلهم
فرح-شلون فهميني
رنا-اول شي اريدج تاخذين شهادة السادس الي بطلتي وما اخذتيهة وبعدين تكملين كليتج اريد تبينين للناس ان انتي قوية وما انكسرتي وهذا الي صار بيج قواج اكثر وصار بالنسبة الج عثرة بسيطة وراح تگدرين تجتازيها
وصدكي من راح يشوفونج هيج والله راح يهابونج اكثر من قبل ويصيرون يحسبولج الف حساب
