البارت الثامن والعشرين ماقبل الاخير
#قلوب_على_جرف_الهاوية
......................
قلوب على جرف الهاوية
للكاتبة Nuha-d-h
فرح
طبعا كان دخول سماح من بعد الحادث الى بيت جدي مفاجئة للكل واولهم سرور وسلوى وكانت لحظات اللقاءجدا مؤثرة بين الخوات لاتخلو من الصدمة والمفاجئة تتبعها الفرحة بمعرفة ان اختهم على قيد الحياة
وبعدها گعدنا اربعتنا سوية بغرفتي مثل ماكنا قبل ننجمع سوة وصرنا نسولف
وگعدو البنات يسألن سماح عن حياتها وشلون عاشت
سلوى-صدك سماح احجيلنا بالتفصيل شلون عشتي من بعد ما اتزوجتي علي خصوصا ظروف زواجكم كانت كلش غامضة
سرور -اي عفية صدك احجيلنا شصار وياكم من بعد ما اخذوج من عدنا
ابتسمت سماح للبنات
وهي تسافر بذاكرتها الى ذاك اليوم البعيد وبدت تسولفلهم شصار بحياتها من بعد ماتركتهم
سماح
-في بداية زواجي بعلي كنت متوقعة ان هو مجبور علية او كانت هاي شهامة من عندة حتى يستر علية وكنت جدا متخوفة منة
لان اني ما اعرفة ولا اعرف اطباعه ومن جاب عمي سيرة الزواج خفت لان كانت عندي هواي حواجز بيني وبين علي
ما انكر شكد عجبتني شخصيتة ورزانتة ولا راح انسى نظراتة الي من اول لحظة دخلت عليهم هو وعمامي شلون كانت تاكلني وابد ما انتبه على نفسه ولا حاول يداري روحة وينزل عينة عني
بحيث اني من يمي خجلت وصرت حمرة من وراه
يعني هسة اني شايفة واحد يباوع بس هو هيج لهدرجة
لكن من عرف اني اسمي سماح شفت بعيونة نظرة عمري ما راح انساها كانت نظرة عطف وكأنه كسرت خاطرة وهذا الشي جدا قهرني وكسرني وبوقتها هذا صار اول حاجز بيني وبين علي
لكن نظراتة استمرت تراقبني من صعدنا بالسيارة مالتة اني وخواتي ركبت سرور يمة بالصدر واني والبنات
صعدنا ورة المهم شفتة عدل المرايا على وجهي وصار على طول الطريق يباوعلي بس ما احجيلكم شصار بگلبي بوكتها اول مرة ينبض گلبي ويخفق
بس رجعت دنگت وبعد ما رفعت عيوني مرة ثانية
حتى ما اعشم گلبي ولا راح احاول الفت انتباهة الي
لان اعرف ان هذا الشخص حلم بعيد المنال يعني نجوم السما اقربلي منة
فاحسن شي لا اظل ابني عليه امال وشنو يعني واذا باوعلي يعني مو معناها ان هو معجب بية
وعلى فكرة يسماح لاتنسين نفسج المثلج وبوضعج هذا
تحلمين احد يفكر بيج كزوجة لان انتي مكسورة
وبقيت طول الطريق اصد بنظراته ما انظرله
لكن هو متركني بحالي
وصار كل ساعة يسألني
علي -سماح انتي شمخلصة دراسة
اني رفعت عيوني الة وابتسملي
-اني ممخلصة دخلت كلية تربية سنة ثانية لكن بعد حاث وفاة ابوية بطلت وگعدت بالبيت اعتني بالبنات واشتغل
وبعدين شفتة كام يتحين الفرص حتى يلفت انتباهي وارفع عيني واباوعلة بالمراية ونزلنا بالطريق بمطعم استراحة ونزلو ويانة عمامي وطلب النا اكل بس عيونة ابد منزلها عني بحيث
صرت من وراه مثل الثولة وكل ساعة اتخردل واعثر بمشيتي لو انضرب بجامة الباب مالت المطعم بالقران خردلني بنظراته ومراقبة الي
والله بوكتها بس واحد يسويلي بز انفجر بوجه من البجي
وفعلاً ثولني وخربط احوالي الله يلعن ابليسة
خلصنة اكل اني والبنات واني كنت ملتهية بعلي وما انتبهت على البنات راحو للحمامات ورجعو وظليت بس اني
بعدها كمت ورحت للحمامات لوحدي لان وحدة من خواتي قبلت تروح وياي
و اشوفلك هذا استاذ علي گام يمشي وراي
واني صارت رجل تطك برجل
ووصلت عالحمامات اشو هذا صار كلش قريب علية ولزمني من زندي وسحبني عليه والله و هنا انفجرت بوجه ذاك الانفجار
سماح برتباك -ترة والله مصختها حضرت جنابك وين اروح جاي وراي ترة عيب عليك اني بنت عمك يعني صدك متستحي توصل بيك المواصيل تلحگني للحمامات
علي وهو يخزرني وعلى حلگه شبه ابتسام
-والله شوفي الاول على وين رايحة وبعدين احجي واشرلي على اللافاتات مالت الحمامات كنت داخلة على حمام الرجال يبوي تعالو دورني
علي -يالله بالله هسة منو الي جاي يركض ورة الثاني
ههههههه دشوفي نفسج داخلة وياي بحمام الرجال متستحين لاحگتني
سماح وهي تبجي من الفشلة
-اة اة
طكتها بجية مثل الطفلة وبعد مگدرت تداري دموعها
علي -هَـا هَـا هَـا ليش البجي شكو ياستار شسوينالج
سماح وهي تناشغ وتسحب النفس من خشمها
-كلة من وراك انت خليتني ادخل لحمام الرجال والله خردلتني انت ما تنتبه على نفسك
علي -اه ها نوب صارت من وراي دخلتي بحمام الرجال
سماح-اي والله خردلتني انت وعيونك بس تباوع عليه
علي - ههههههههههههت والله انتي فلم
سمعنا صوت زلمة من ورانة يحم حم
اني لبدت خلف علي
علي -يالله يامرة روحي كعدي وانتظريني برة لاتخافين اني جاي وراج
حتى يوهم الرجل هاي مرتة وخطية داخلة وياه بالحمام لان تخاف تبقى لوحدها هههههه
