البارت الثالث
#قلوب_على_جرف_الهاوية
قلوب على جرف الهاوية
للكاتبة nuha-d-h
فرح
اتخذت قرار بيني وبين نفسي ولازم اسويه لان ماعاد الامر ينسكت علية
رحت دخلت للغرفة
ولزمت مكص وكصيت شعري الطويل الي كان ابوية يحبة ويگلي ديري بالج تگصي
((اعتذر منك يا ابي فالزمن قد جار علينا
فلم يرحم ابنتك الكبيرة ولم يبالي بابنتك الصغيرة
فبرزت فيهم لاقاتل الاوجاع التي تدفع بي وباخوتي
الى حافة الهاوية
كان يجب ان اردعها عن حبيباتك يا ابي ))
واباوع على شعري الطويل شلون گدام عيوني يوگع وسويتة ولادي شفت بكل خصلة توكع مني بالگاع
حسيت بها حلم مذبوح بصدري
صار وية سقوط كل خصلة صار يسقط وياه امنية
وكأنني وقعت على انهاء شبابي بيدي
بعدها لزمت مكينة وحلقت شعري وصار ج ولادي
ونظرت لروحي بالمرايا وشفت شكل وحدة صغيرة خذلها الزمن
دخلت علية سماح
سماح وهي تشهك وتلطم وجها -عزة بعينج هاي ليش هيج سويتي بشعرج فرح شبيج تخبلتي
فرح -لا سماح ما احتاجة صار وكت الي لازم وحدة بينا
ان تگوم بواجب هذا البيت شوفت عينج شفتي شصار بيج من ردتي تشتغلين حتى تعيلينا لكن هالمرة اني راح اشتغل واصير ابو البيت
اني الابن الماجبتة امي لازم اسوي هيج
نظرت على شكل سماح كانت معالم وجها انرسم عليه البؤس واليأس
سماح وهي تبجي على شكل اختها-ليش ولج ليش هيج سوتي ولج مو هذا شعرج الي ابوي يتغزل بي ويحبة شلون انطاج گلبج هيج تكصي
بس سماح استسلمت للبكاء لان هي بنفسها مابيدها لاحول ولا قوة حتى تمنعني
انتبهت على حركة سماح المكسورة شلون دنگت ولمت خصل الشعر مالتي وهي تبجي
وشفت سلوى واكفة بالباب وايدها على حلكه
مصدومة من الشافتة
رحت لبست شالي وعباتي وطلعت على السوك ورحت اشتريت ملابس ولادية على مقاسي واشتريت جراوية او (چفية )شماغ حتى الفهة على راسي
كانت هدوم بسيطة
رجعت على البيت ودخلت للغرفة ولبست المشد مالت الصدر حتى يساعدني بأخفاء المعالم الانثوية ولبست فوكها الهدوم الرجالية
لفيت على راسي الجراوية وصار شكلي مثل عمال البناء وحطيت صخام اسود فوك شفتي العلوية
حتى تبين عبالك شوارب خفيفة وانطلقت باول يوم الي بمشواري في الشارع اني احس بروحي تايهة
طبعا مثلت القوة امام خواتي
بس الحقيقة اني داخلي ضعيفة بضعف الطفل الصغير الي لاحول ولا قوة
وصرت اروح اسأل اصحاب المحلات اذا كان يحتاجون عامل لكن الاغلبية المعروف عنهم مايشغلون عندهم عامل ما يعرفونه يخافون لان كلها تدور على عامل كون ثقة علمود الامان
لكن ودتني رجلي الى بانزين خانة هناك شفت هواي اولاد بعمري ينظفون السيارات وبعضهم يشتغلون يبيعون كلينيكس
والله ربي ماقصر الي دبر امري وخلة الرجال يحن علية
وكلي هاك يالله استلم روح الزم قطعة القماش وبطل التنظيف وشوف باب رزقك بس ترة هنا حدك ما تروح للكراج ترة الكراج حصة غير شباب احنا حدنا هنا سامع
فرح وبكل لهفة-اي سمعت تمام
-شنو اسمك
فرح بارتباك وهي تخشن صوتها -اسمي فلاح
-يالله بوية فلاح شد الهمة
وانطلق يومي بالعمل في الشارع
بالبداية كنت كلش مستحية وخايفة لكن كمت اصير وگحة وصلفة وموبس هيج اكتشفت ان عالم الشباب بي هواي مساحة حرية وهواي مساحة للعيش وتدبير الرزق
وصادقت اثنين اولاد بحلي كان واحد بصف رابع اعدادي والثاني مبطل
كان يشرب جكاير وعرض لي جيكارة
الشاب-هَـا تخاف ماتشرب جيكارة
فلاح -لا يخوي مو قصة اخاف لكن ما اكدر على مصرفها تفيدني بدل ما اذب فلوسي على السم اذبة بكيلو طماطة شفت الفرق
الشاب -اههوووووووو هاي شنو انتة والله تعبان
وداهية صدك جلف خايب دتعال اخذلك نفس وريح دماغك من الهم
عفتهم ورحت ما اريد اقوي علاقتي وياهم لان شي اكيد من تصير العلاقات قوية لازم صحبة ويجوني عالبيت وشلي بهالبهذلة
وعدت الايام بحرها وببردها جنت من ارجع للبيت بنص الليل اشوف سماح منتظرتي خايفة ورة الباب واشوفها كامت تعاملني عبالك صدك ولد هههههه الگاهة محضرتلي الحمام ومسويتلي العشاء
وكمت شحصل من فلوس اخلي بيدها لان هي مدبرة وتعرف شلون تدير امور بيتنا
ما انكر كانت حياة الشارع جدا صعبة
مرات اشوف اولاد يتعاركون ومرات يوصل لي السرة بالعرايك
يجون بدون سبب يتعاركون وياي لان يحسون ان اني ماخذ مساحة من شغلهم ومضايق رزقهم
وفد يوم اجة واحد مهتلف راد يتعارك وياي وضل يحجي ويدفع لكن اني ضليت ساكتة لان مهما كان اخاف على روحي لان ابقى بنية لو مهما كان
لكن من حجة الكلمة الاخير الي كانت تمس امي
و غلط على اهلي اني ما اتحملت ودمي فار كبل لزمت طابوكة كانت بالگاع وشمرتها عليه
وهو گبل هد علية وشبعني طن ضرب بوكسات ورفس
بحيث حسيت زهكت روحي من الالم
انشكت الشفة ونزل منها دم وعيني صارت زرگة
عبالك مو ايد بشر عبالك ايد حديد الله يكسر ايدة
