عمياء في يد المافيا (باللهجة الجزائرية)

part #40

#عمياء_في_يد_المافيا
الحلقة 40
وقفت جاكلين فنص الساحة ودارو بيها الرجال من كل جهة وقفت عاقدة دبزتها وتستنا تبسمت شطر ابتسامة
جلال بصوت عالي : اهجمو عليها فاش راكم تستناو
هجمو لكل ضربة وحدة جاكلين عدلت من وقفتها فتحت يديها وبدات تجري باتجاه رجال لي مقابلينها كانت تضغط بصبعها على بلايص معينة في الرقبة ومنطقة القلب بعدها يجي الراجل طايح بلا حراك في غفلة منها جاتها دبزة للكرش طاحت على ركايبها زاد ضربها راجل اوخر بركلة لكرشها حست بطعم الدم في فمها ناضت شافت مع جلال : تحب تقول كلمة نهائية لرجالك؟ ... متقول والو؟ ... اوك
في غمضة عين كانت قدام رجال بداو يطيحو بلواحد موتى كانت سرعتها كبيرة مقدروش الرجال يرصدو حركاتها رمات آخر راجل توال رجلين جلال :نظن ضرك التحالف تم
جلال وهو مشوكي : ايه تم
جاكلين : غدوة نتلاقاو فنادي *** ع 8 ومنقبلش تأخير
جلال : الزمي حدودك
قربت جاكلين منو وهبطت حتى ولا وجها مقابل وجهو؛ شوف سي جلال لحد الساعة كنت ظريفة معاك وتحملت اوامرك وصدقني نت لي محتاجني مش انا لي محتاجتك والاحسن ليك تربحني كحليفة خيرمن عدوتك ونظن عندك مخ تخمم بيه خاطر ضرك راك وليت تعرف بلي بلمسة وحدة من صباعي تموت
حرك جلال راسو بايه ولعرق لب جبينو
دارت جاكلين رفدت أسلحتها غمزت لزيد ومشات : يالا لبنات....

🌹🌹 🌹 🌹 🌹 🌹 🌹 🌹 🌹 🌹

عند مارك
قعد يقلب فالسنسلة في يدو ممبعد تفتحو عينيه صفاحي كي تفكر هذيك الذكرى كي كان فعمرو 10 سنين
#flash_back
كانت الليلة مقلبة رياح ولمطر مداير حالة كي دخلت المديرة في يدها طفلة مولات عامين شعرها اصفر حرير وبشرتها بيضا حليب عينيها زروقة كي سما خدودها حمارو من لبكا
المديرة : هذه طفلة جديدة معانا شوفولها بلاصة ترقد فيها حتى لغدوة
خرجت المديرة تكورت ذيك الطفلة توال لباب وتبكي صوت شهقاتها وهي تكتم فيها ناض من فراشو
كريس : وين بيها مارك
مارك : نشوف ذيك الطفلة الصغيرة
كريس : اوكي ورجع رقد
كمل يمشي بخطوات ثابتة وصل لعندها يشوف فيها حاكمة سنسلة وتبكي: لاه لحتي ماما لاه خليتني ثوفي وين ذابوني لملا هليك تخوف
بقا واقف يسمع فيها وقلبو يتقطع تفكر روحو نهار جابوه للميتم قعد قدمها رفدت رأسها تشوف معاه بعينين يلمعو بالدموع رفد يدو باه يحطها على رأسها حاوطت وجها بيديها :متضلبنيش تعيش مدلتلك والو انا
حط يدو على رأسها :شششت زينة مش حنضربك تجي معايا نحكيلك قصة قبل مترقدي
كلوي بصوتها الطفولي:قثة نتاع اميلة (قصة تع اميرة)
تبسم مارك ورفدها بين يديه:ايه
داها لفراش حطها فجيهة تكى بجنبها ومد ذراعو حطت رأسها عليه باسها من جبهتها وبدأ يلعبلها بشعرها لين رقدت
#back_to_the_future
مارك : لا مستحيل تكون نفسها صغرونتي
طلع يجري لشومبرتو وين خلاها دخل صابها متكمشة فلفراش وتبكي قدم لعندها رفدت رأسها جا يحط يدو على شعرها غطات وجها بيديها : متضربنيش تعيش مدرتلك والو غدوة نروح لا حبيت
تبسم مارك وحط يدو على شعرها : شششت متبكيش زينة نحكيلك قصة تع أميرة باه ترقدي
نحات يديها على وجها وعينيها صفاحي : وين تعرف هذ شي وين تعرف بلي نحب هذ لحكاية
مارك جبدها طول لحضنو : ماهو قتلك رح نولي علاجالك استنايني لاه رحتي
كلوي بصوت مخنوق : م..مارك
مارك بصوت حنين : شششت صغرونتي متبكيش راني هنا. ...

🌺 🌺 🌺 🌺 🌺 🌺 🌺 🌺 🌺 🌺

وش رح يكون حال كلوي بعدما عرفت بلي شخص لي جات دمرو هو نفسو حب طفولتها؟
يا درا راح تقدر تنفذ الخطة وتعفس على قلبها ولا لا؟
وش تحوس جاكلين من جلال وعلاه طلبت تتلاقاه وهدداتو؟
وش حيكون موقف كريس كي يعرف بكلوي؟
كل هذا واكثر في الحلقة القادمة
#Ñøūçhå 💋 💖 🌹
وصلو الحلقة ل 20 نجمة ☆ و 10 تعليقات