فقراء لم يخلقوا للحب

/1/

#فقراء لم يخلقوا للحب
للكاتبه #روز الفياض
جميع حقوق النشر محفوظه
ج1
سنين مرت على كل هالاحداث ومانسيت..
مانسيت شي منها ولامن تفاصيلها ولاحتى المشاعر اتغيرت..
كل حدث وكل موقف من اتذكره وتنعاد تفاصيله بذاكرتي احس بنفس المشاعر اللي حسيت بيها من سنين...
ماادري انه حساسه لو هذا الشي طبيعي ولو المفروض بعد كل هالتجارب اللي مريت بيها مشاعري تتجمد وتتبلد..
اي وحده بمكاني تمر بنفس ظروفي يمكن تنسى وتعيش وتتجرد من مشاعرها القديمه وبدل متصطنع القوه والسعاده والهدوء تكون فعلا قويه وهادئه وسعيده ويمكن هواي بنات يحسدني على كل مأساة وتجربه مرت بحياتي لان السالفه بيها فلوس...
وماالومهن بذاك الوكت جانت الناس جوعانه وحسره عليها كسرة الخبز..
ويمكن هي نعمه بس انه ماقدرتها لان كلبي مو الي.
جنت توني متخرجه شابه حلوه جنت بذاك الوكت اشبه نوال الزغبي المطربه..
قدمت على تعيين وانقبلت بالبلديه وجنت موظفه عاديه بالحسابات رغم انه خريجة ادارة واقتصاد قسم علوم ماليه ومصرفيه بس يعني نفس الاختصاص تقريبا..
داومت بالمكان اللي انقبلت بي شهرين
تقريبا ومره شافني المدير العام وفجأه نقلني من الحسابات للسكرتاريه...
ومن اول يوم انقلت بي حسيت المدير حاطني اباله رغم هو متزوج وشكله جبير مو زغير بس كل تصرفاته جانت تكول هيج غريب اسلوبه جان مو اسلوب مدير وموظفه مستجده.
لا جان اقرب لواحد معجب بوحده او حتى يحبها فتره بسيطه وصرت انه اللي اخلص اغلب الشغل واتخذ القرارات رغم جنت سكرتيرة المدير لكن هالمدير جان بكل شي ياخذ رأيي ويناقشني وجنت افكر بيني وبين نفسي هذا من كل عقله يشوفني لهدرجه شخص فاهم وعاقل لدرجة انه يأخذ رأيي بقرارته بالشغل ومرات بالبيت!!!
جنت احسه محتار شلون يبينلي اعجابه شلون يبينلي انه هو حاط عينه علي رغم هالشي جان واضح وضوح الشمس مو بس الي... لا حتى لبقية الموظفين.روز الفياض
يمكن لانه انه طبيعتي جديه رغم لطافتي ماكدر يحجي وياي بصوره صريحه وواضحه وهالشي جان مريحني بس بنفس الوقت جنت خايفه لو يتمادى بتصرفاته او اعجابه او يتجرأ ويحجي وياي بصراحه وبهالحاله لازم اما اترك الوظفيه او اقبل اكون عشيقه في اوقات العمل او يمكن زوجه ثانيه والاثنين فكرتهم العن من بعض...
جنت مغلسه ومنطيته اذن الطرشه ومتجاهله كل اهتمامه مدام ماكو شي معلن من عنده ومدام مامضايقني بالعكس باقل من سنتين صرت انه الكل بالكل بالدائره.
كلي مره:
رنا سجلت اسمج حتى ينطوج قطعة ارض هنا بمركز المحافظه.
رنا:شكرا استاذ بس ماعندي خدمه مااتصور ينطوني هسه بس يشوفون خدمتي سنتين يستبعدون اسمي.
المدير:لا مايستبعدونج خلص اعتمدي مدام انه كتبت اسمج معناها اعتبري قطعة الارض صارت بجيبج.
ظليت صافنه معقوله ينطوني قطعة ارض وانه جديده بس يالله هو المدير العام لمديرية بلدية المحافظه اكيد اله كلمه.
رنا:مشكور استاذ.
المدير:تدللين كما رنا عدنه.
جان يصرفلي مكافآت وكل فترة تجيني زيادة عالراتب حالي حال الموظفين القدامى.
جنت مغلسه اخاف احجي اخاف يحجي هو بالقلم العريض وساعتها اخسر وظيفتي وهالوظيفه اتحسن بيها وضعي ووضع اهلي هواي.
ابوي جان موظف متقاعد وامي مديرة مدرسه وانه الجبيره وعندي خوات 2 اصغر مني و2 اخوان ولد اصغر من عدنه
خواتي جانن يداومن بالجامعه واخواني بالاعداديه وكل احنه نحتاج مصاريف وجانت ايام الحصار راتب الموظف العادي جان 3000 دينار وكل شي غالي.
هالوظيفه فتحتلي باب لعالم ثاني عالم ماشايفته ولا حتى بأحلامي راتب زين مخليني مريحه اهلي وانه هم مرتاحه ماناقصني شي البس احسن لبس ومهتمه بنفسي يوميه للصالون.
كل هالمميزات جانت بالنسبه الي مؤقته مرهونه بأول كلمة راح يكولها مديري بخصوص مشاعره جنت خايفه من هيج لحظه لان مااريد اخسر لاوظيفتي ولا حبيبي..
ارشد حبيبي من ايام الكليه ولحد الان ومتواعدين عالزواج بس منتظرين يكون نفسه.
اتخرجنه وانه سبقته واتعينت يمكن شكلي اله دور جبير حيل بكل قصتي.
جنت حلوه وضخمه طويله وشعري مصبوغ اشقر وبشرتي حنطيه مايله للبياض.
ماجان بذاك الوقت اكو محجبات هواي.
شكلي وضخامتي جانت تبيني اكبر من عمري.
ارشد وره فتره يالله اتعين هم موظف بمصرف.
ماجنه نلتقي بعد التخرج بس جان بينه اتصال بالتليفون.
التليفون اللي جانت اغلب البيوت العراقيه تعتبره فد شي بس انه الموظفه المميزه عند المدير نصبولي خط تليفون ارضي للبيت وعلى حساب الدائره.روز الفياض
ابوي جان انسان مادي بشكل مايوم سألني ليش المدير ينطيج هيج ليش مهتم بيج شنو المقابل اللي يريده؟؟
وامي جانت تعرف وتغلس تعرف من خلال حجيي بالبيت انه المدير حاط عينه علي وانه مغلسه لكن الى متى؟؟
هواي جنت انخطب هواي يتقدمولي بس مااريد واهلي اصلا ماجانوا يوافقون
انه منتظره ارشد وامي وابوي جانوا منتظرين المدير بلكي يتقدملي..
ابوي جان من النوع المزعج اللي يدردم ويدقق بكل شي ويخلق من اتفه الاسباب مشكله... لكن هالحجي قبل مااصير انه موظفه واستلم راتب ومكافآت وغيرها من المميزات.
جنت كل شهر استلم الراتب واترس جيبه حتى لايبقى طول الشهر يسويلنه مشاكل بالبيت.
امي جان راتبها يادوب يكفي فاغلب الاعتماد صار على راتبي كل مصاريف اخواني وخواتي الدراسيه جنت انه اتحملها بدون تذمر لان اريدهم يكملون حتى يعتمدون على نفسهم.
الصبح جان سايق المدير يجي ياخذني للدوام قبل لايروح للمدير وبالرجعه جان يرجعني بعد مايوصل المدير لبيتهم..
يمكن وحده غيري جانت هي اللي اتقربت للمدير وماانتظرت هو يحجي بس انه جنت احب فلا المدير ولاغيره ممكن يملى عيني محد ياخذ مكان ارشد عندي.
ارشد جان جبير اخوانه همه 9 اخوان بالبيت ابوه موظف وكلهم عايشين براتب ابوه.
وضعهم المادي جان تعبان حالهم حال اغلب العراقيين اللي عايشين وامشين امورهم بالبطاقه التموينيه لان الراتب يادوب يكفيهم.
جانوا 3 ولد و6 بنات من غير امه وابوه يعني 11 نفر بالبيت..
شكد جانت حياة تعيسه وشكد تعبنه بيها لحدما اتخرجنه واتعينه يالله خف الحمل وخف الاحساس بالذنب بسبب مصاريف الكليه.
حتى من جنت بالكليه جنت ملفته للنظر ومثيره للاهتمام وهالشي جان يسبب مشاكل هواي بيني وبين ارشد لكن هذا شكلي شسوي يعني رغم ماجنت انيقه ذيج الاناقه الواضحه لان الحال عالكد.
بس جنت مرتبه.. هنه تنورتين وقميصين اليوم اغسلهن وثاني يوم اللبس الثانيات وهكذا الى ان خلصت ايام الكليه.
جنه ساكنين بدور حكوميه تابعه للوزاره اللي جان ابوي يشتغل بيها.روز الفياض
المفروض من طلع ابوي تقاعد نطلع منها لكن اذا طلعنه وين نروح؟؟
صح عندي قطعة ارض اللي اتوسطلي بيها المدير لكن البناء شلون؟منيلنه فلوس للبناء؟
واصلا ذيج المنطقه جانت مهجوره مابيها اي بناء عباره عن صحراء رغم جانت داخل المحافظه.
لذلك جنه باقين ساكنين بهالبيت ومغلسين عالوضع رغم كل فتره يدزولنه انذار الى ان بيوم اندك الباب بالليل وطلع اخوي مؤمن وره شويه دخل يركض صاح:
بابا.. بابا.. شرطه بالباب يردونك.
خفنه وطلعوا ابوي واخواني للباب وامي وخواتي وكفن يم باب المطبخ يباوعن وانه جنت اباوع من شباك الهول لان لافه شعري بالرولات ومااكدر اطلع..
بقوا شويه واكفين بالباب يمكن نص ساعه بعدين راحوا.
دخلوا ابوي واخواني كالوا:
هذا واحد مخصصيله البيت ويريدنه نطلع.
امي:يااا.وين نروح بالله؟منين هو؟موظف بدائرتكم؟؟
ابوي:لاا،شرطي مفوض بالشرطه.
امي:وشلون مخصصيله البيت؟شجابه على دائرتكم؟
ابوي:واسطه شرطي شتتوقعين عنده الف واسطه شلون مايخصصوله البيت..
امي:والحل؟
ابوي:ماكو حل نغلس مثل كل مره وشيريد يسوي يعني.
امي:شيسوي خل يسوي وين نروح قابل نكعد بالشارع..
يحجون ويسولفون واحنه نباوعلهم بقلق شلون لو طلعونه من بيتنه وين نروح حتى ماجان اكو شي اسمه بيت تجاوز بذاك الوكت ونكول ميخالف.
والحياه صعبه منو يتحملنه نكعد عنده 7سبع نفرات مو نفر ونفرين ونندحس بغرفه وحده..
نسينه الموضوع ومشت بينه الايام عادي لان مو اول مره يبلغونه او ينطونه انذار بالاخلاء ونغلس.
لكن اتكرر نفس الموضوع جان هالشخص اللي مخصصيله البيت يجي ويجيب وياه جماعته حتى يخوفونه يعني بلكي نطلع من البيت بهدوء وبسرعه وبدون هوسه ودوخة راس.
واللي عرفناه هو عنده غير هذا البيت 2 بيوت بس مجلب بهالبيت يريده ..
جنت افكر ساعات وين العداله ناس عدها بيتين و3 ويمكن 4 وناس مالاكيه حتى غرفه حيطان وسكف تنستر جواها.
جانوا مرات يجون بالليل ومرات بالنهار لكن ماجانوا يطلعون بنتيجه ويه ابوي لان ماعدنه مكان نكعد بي غير هالبيت.روز الفياض
اتطور الموضوع بعد مشاده كلاميه وصياح بين ابوي وبين هالشخص مفوض الشرطه فراح وبعدها بساعة زمن اندك الباب..
هالمره ابوي عليه القاء القبض.
وفعلا اخذوا ابوي للمركز وبقى بالتوقيف وبعدين وتحولت اوراقه لمحكمة الجنايات.
قبلها من جان ابوي بعده بالتوقيف ثاني يوم من اخذوه انه ماداومت ...
جنه محتارين انه وامي شنسوي حتى يطلع ابوي اهل ابوي كلهم ساكنين بغير محافظه واهل امي ناس على كد حالهم.
ماجان عدنه شخص نستشيره لو يركض ويانه حتى يطلع ابوي وجانت بوكتها الناس تخاف هذا مفوض بالشرطه جان المفوض ينحسبله الف حساب لان دوله بيها قانون الشرطه اله هيبه ومكانه بين الناس..
من ذاك الوقت جانت الدنيا بس للقوي للينحسبله حساب مو الفقير الماله ظهر..
كعدت الصبح كلهم اخواني وخواتي بالدوام بس انه وامي بالبيت.
بديت انظف وامي تطبخ واندك الجرس طلعت امي وانه واكفه عالسنك اغسل اماعين وعيني عالباب مااشوف منو لان الباب مردود شويه.
طولت امي بالباب استبطيتها اتوقعت موظف من دائرة الكهرباء جايب الفاتوره بس مايطول هلكد.
نشفت ايديه وطلعت وراها هي واكفه بره تقريبا نص جسمها بره والباب وراها صاير واسمعها تحجي وواحد يرد عليها.
امي:وين نروح يعني ترضاها مروتك نبقى بالشارع؟
يرد عليها هو:
مو مشكلتي وين ماتكعدون كعدوا هذا شي راجعلكم انه اريد بيتي.
امي:عدي بنات شابات تقبلها غيرتك بنات شابات ينامن بالشارع؟
ضحك كللها:
خوش سالفه بنات شابات هاا؟
يرد عليه واحد ثاني:
تالي يطلعن جبيرتهن بالابتدائيه ههههههه.
ظلوا يضحكون وامي واكفه تتوسل بيهم وهمه ولاجنهم.روز الفياض
امي:زين انت مو عندك بيتين بعد شلك بهذا حتى الله مايرضاها تصير عدك 3بيوت واحنه نبقى بالشارع.
كللها:
كيفي بيتين وهذا الثالث ان شاءالله.
امي:انت ماعندك بنات؟ماتخاف على بناتك؟
كللها:
ماعندي بنات بس عندي4 ولد هههههه.
صرت عصبيه وانغثيت من استهزائه بأمي مايستحي ولايخجل يحجي وياها بهالاسلوب مايكول مره عيب وجاي تتوسل.
واصلا ابوي بالتوقيف شيسوي هو جاي للبيت للنسوان ؟
اجيت انه رأسا فتحت الباب حيل.

توقعاتكم؟؟