فقراء لم يخلقوا للحب

/16/

#فقراء_لم_يخلقوا_للحب_
ل: #روز_الفياض_
ج١٦
طلع مؤمن وبقيت وحدي بالغرفه حسبه تاخذني وحسبه تجيبني.
مستحيل اللي صار صدفه معناها اتخبل معناها الله صدك غاضب علي ويريد يعاقبني...
لا لا لا مو صدفه انه متأكده عصام وره الموضوع بس ارجع لازم احط حد للموضوع وواكف عصام عد حده كافي عاد مصخها هو واخوه شيردون مني مو كافي القهر الشفته؟؟
ضجت ابحدي ونعست اجيت انام بس كلت ماتسوى مابقى شي للليل وماناقصه سهر وتفكير.
كمت لبست ونزلت جوه كعدت بالبهو مال الفندق ولكيت جريده عالميز كعدت اكلب بيها واباوع عالصور..
بس ماكو شي بيها من الضوجه رجعت قريتها كلها كلمه كلمه حتى المواضيع السياسيه..
خلصتها ورجعتها عالميز كبالي شويه وشفت ارشد دخل للفندق..
يمه ظل كلبي يرجف وضجت رجعت فتحت الجريده وغطيت وجهي بيها بحجة اقرا.
شكد مااكول مااريده ومااحبه ومااريد اشوفه جذب بس اشوفه ارجع لنقطة البدايه..
مديت راسي شويه من وره الجريده شفته واكف يحجي ويه الموظف بالريسبشن شويه وطلع راح..
الحمدلله ماشافني بس يمكن الصدك بداخلي اتمنيته يشوفني.
ذبيت الجريده وجريت نفس شلون بينه ياارشد انه وانت ومرتك؟؟
ضاك صدري اتمنيت اروح اركض وراه واكله هنا انه هنا بس انت ماشفتني..
كمت من مكاني ردت ارجع للغرفه انغثيت مشيت خطوتين وشفته رجع دخل وبيده علاليك..
اتحنطت بمكاني لاكدرت ارجع لمكاني ولاكدرت اكمل طريقي واروح للغرفه.
هو من شافني حسيته اتفاجأ رأسا ابتسم واجه بأتجاهي..
ارشد:هلو
رنا:هلو
ارشد:من شوكت كاعده هنا توني فتت ماشفتج؟
رنا:من مساع.
ارشد:ماشفتيني من دخلت؟
رنا:لا ماشفتك
ارشد:همزين شفتج.
رنا:ليش؟شكو؟
ارشد:سلامتج بس اشتهيتلج حلويات.
رنا:ارشد وين تريد توصل؟
ارشد:النه
سكتت بقينه واكفين وساكتين..
بعدين كال:
خل نكعد شويه هنا تعاي..
راح كعد وخله العلاليك عالميز ودار علي.
رحت كعدت بدون مااحجي.
يباوعلي درت وجهي كتله:
مرتك حلوه وحبابه..
ماحجه باوعتله كال:
وتحبني وخوش بنيه فقيره.
رنا:الله يخليكم لبعض.
ارشد:بس انه مااحبها.
رنا:غلطان اذا خوش انسانه شتريد بعد اكثر من هيج؟
ارشد:اريدج انتي.
رنا:على كولت امي انت متعافي..
ارشد:يجوز بس مو بيدي اريد احبها بس مااكدر كلما احاول الكاها بت عمي لحمي ودمي وبس.
رنا:شتريد اكثر من هيج؟
ارشد:اريد احس تجاها مثل مااحس تجاهج بس مااكدر.
رنا:ماعرفتك طماع؟
ارشد:انه طماع ومتعافي،وانتي؟اذا هيج انتي قنوعه وراضيه وناسيه ليش بجيتي الصبح بالسياره؟وليش مااستمريتي بحياتج؟
يمكن لو انتي متزوجه انه اكطع الامل بس انتي ماتردين غيري وانه ادري بعد شلون ترديني اقنع واعيش عادي؟
بقيت ساكته لان تعبت من الحجي والعناد ومحاولة اقناعهم بجذباتي مال نسيت واريد اعيش واستمر بحياتي..
ارشد:رنا انه بتي سميتها رنين حتى خاف بيوم انساج كلما اصيحلها اتذكرج.
رنا:تتذكر من حجيت وياي اول مره وكتلي معجب بيج؟؟
تتذكر من كتلي ابوي يريدلي بت عمي؟
يعني المفروض انت مهيأ نفسك لهيج شي كل اللي صار بينه غلط وغباء ولعب سوالف جهال.
ارشد:ولج الصبح جنتي تبجين بسيارتي وهسه تردين تقنعيني بحجيج هذا يعني؟
ضجت وانقهرت دمعت عيوني وصرت عصبيه كتله:
تدري انه اليوم ليش رحت للكاظم؟رحت حتى ادعي الله ينسينياك واعيش واتزوج واكون عائله..
جرحك بكلبي جبير مايرضى يطيب..
عوفني ارشد عوفني وخليني اعيش حياتي وانت هم شنو ذنبها مرتك؟
ارشد:وانه شنو ذنبي وانتي شنو ذنبج؟
رنا:انسى هسه انسى هالحجي اللي حجيناه كله مو مشكله..
كلي شتريد هسه؟
شنو المطلوب مني؟عندك حل مثلا لهذا الموضوع؟
سكت بقى يباوعلي بعدين كال:
همه اليحبون شنو تاليتهم؟
رنا:ماادري انه اسألك لاتسألني لان انه حبيت وبقيت معلكه مالي تالي.
ارشد:تاليتج وياي الي..
رنا:جبت عمري وياك موجوده بس بالاسم وماموجوده بالصوره بس للاحتياط موجوده للتسليه يمكن.
ارشد:والله مو للاحتياط حرام عليج تشلعين كلبي رنا.
رنا:انت رجال متزوج هسه ارشد شلون بعد مو للاحتياط قبل جنت مخليني منتظره لحدما تخلص من بت عمك وتالي ماخلصت ومدري انه الي اتورطت بس المهم ماصرنه لبعض..
وهسه هم وانت متزوج تريدني ابقى حاطه ايدي على خدي وباقيه انتظرك؟؟
زين شأنتظر؟تطلكها وترجعلي؟لو تريدني احبك وتحبني وانت متزوج وعندك عائله وانه مااتزوج باقيه بيت وقف الك.
ارشد:لا مااطلكها حتى لو انتي ردتي هي شنو ذنبها بعدين انه من الاول ماكدرت اعوفها لان مالها احد اعوفها هسه وره ماصارت عندي طفله منها.
طاحت دمعتي كتله:
بعد شتريد مني؟اذا ماتكدر تطلكها ولاتكدر تعوفني شتريد مني؟
ارشد:اريدج الي ... رناوي خل نتزوج؟
بقيت ساكته من الصدمه..
ارشد:مو تردين تعرفين الحل وتاليتنه هذا هو الحل خوما نبقى متعذبين..
مارديت عليه كال:
شو ماتحجين؟
جريت حسره وطاحت دموعي كتله بتعب:
تعبت... كلللش تعبت... واريد ارتاح.. ماعندي صبر بعد يمكن تاليتي اسوي بروحي شي واخلص..
ارشد:مثلما سويتي قبل وردتي تنتحرين؟؟
بس هالمره حسبي حسابج انه بدونج اموت..
رنا:مو جنت عايش صار سنتين شو مامتت؟
ارشد:والله عايش على اخبارج عصام يطمني كل فتره يكلي بعدها منتظره..
دنكت وجهي وخليت ايديه على وجهي وظليت ابجي..
ارشد:حتى اليوم من رحت هو كلي روح للامام بس ماكلي شي عليج..
كلي حلمت بيك رايح تزور وتطلب مرادك من الامام باجر روح حتى يطيك مرادك..
رناا بيش احلفلج بيش تصدكين احبج وبعد مااكدر اتحمل واصبر اكثر من هيج..
الله يخليج ماله داعي نبقى هيج مشلوع كلبنه ومتلوعين..
رنا:روح ارشد روح لاتشلع كلبي بعد اكثر من هيج.
انه هسه اخذت قرار بس ارجع اقبل بأول واحد يتقدملي لو شمايكون جبير زغير متزوج مامتزوج مو مهم المهم استمر بحياتي مثلي مثل بنات الناس.
سكت ماحجه ظل يباوعلي وانه ابجي بعدين كال:
هذا اخر كلام عندج؟؟
هزيت راسي اي ..
ارشد:اوكي...
براحتج.. ماكو مشكله... مدام تردين هيج كيفج بس اتذكري انتي اللي اختاريتي رنا انتي مو انه.
انتي اللي اختاريتي الطريق الصعب..
ماحجيت اتوقعته يكوم يروح بس بقى كاعد يباوعلي..
مسح وجهه بيده واتنهد وكال:
اكو اغنيه تحبها داليا ودائما تسمعها بس انه مااحبها لان تذكرني بيج وتخليني اتخيل ماكو امل نكون سوا..
اسمها (هم تعود) سامعتها؟..
بقيت ساكته بعدين كتله:
اعتبرني ميته..
ارشد:يعني اليموت ينسي؟
رنا:يمكن وعالاقل تستمر بحياتك ويه عائلتك عادي وتبدي تتأقلم.
ارشد:الله عليج لاتسوين شي اذا تحبيني صدك اذا الي خاطر عندج؟
رنا:شسوي؟
ارشد:مثل قبل تنتحرين.
ضحكت على كيف كتله:
لا ماانتحر لاتخاف بركبتي عائله مسؤولين مني مااكدر اعوفهم بدون معيل.
بقينه ساكتين مانحجي بعدين كتله:
مرتك تكول مايحبني..
رفع حاجبه بتعب كال:
شبيدي؟
رنا:تكول يحب وحده ثانيه..
ارشد:والثانيه شالعه كلبي ماتصدك.
رنا:لا مصدكه بس مو كل شي بالدنيا نتمناه نحصله لااحنه اول ولااخر اثنين تكون الظروف ضدهم ويضطرون يتزوجون غير اللي يتمنونه.
ارشد:مايفيد الحجي بعد رنا انتي هسه قررتي واختاريتي وانه لهنا وبعد ماراح اضغط عليج ولا راح الح بس كون تطلعين كد كلمتج وتتزوجين اول واحد يدك بابج ماتتراجعين بعدين من توصل للصدك..
رنا:لاتخاف اكيد كد كلمتي ومستحيل اتراجع.واذا مامصدك مرتك مو كالت عدها عريس؟صديقك يمكن؟
كام وكف خزرني وكلي بعصبيه:
انه ماعندي اصدقاء..
ورقمي اللي عندج بالورقه شكي وذبي واذا حجه وياج عصام بعد بأي شي يخصني طيحي حظه،زين؟
مشى جم خطوه وانه كاعده بمكاني اباوعله بعدين دار ورجع وكف على راسي كال:
صورتج لهسه عندي بمحفظتي مااتخيلت بيوم راح اكدر اشيلها بس هسه لا..
مد ايده على جيبه وطلع المحفظه ..طلع الصوره وخلاها عالميز..
ارشد:هاي اتصور هسه صرنه ماشين بالاتجاه الصحيح ان شاءالله..
ماعلقت بشي باوعلي وراح طلع..
وانه اباوع وراه وخانكتني العبره اخذت الصوره وصعدت للغرفه رحت كبل لجنطتي طلعت الورقه اللي مكتوب بيها رقم وشككشتها وذبيتها بالزباله لان طلع رقمه هسه.
ثاني يوم رحنه للاجتماع ومن خلصنه طلعنه كبل للفندق اخذنه اغراضنه ورجعنه للبيت..
داومت شفت عصام سلمت عادي وانطيته حصته من الصوغه.
عصام:هاي شنو؟
رنا:الحلويات الجابها اخوك.
ابتسم نص ابتسامه بس ماحجه شي.
كعدت خلصت شغلي بدون كلام وهو نفس الشي بعدين وكت الغدا كال:
انتي كلما تتعاركين وياه تكطعين الحجي وياي؟
باوعتله كتله:
ماعندي مشكله وياه كل الامور انحلت وانتهينه ونسينه كل شي وقررنه كل واحد يشوف طريقه.
فماعندي بعد اي مشكله وياه بس انت اي عندي.
نزع نظارته الطبيه وفرك عيونه بيده كال:
وياي؟
ليش؟شسويتلج؟
رنا:يعني ماتعرف شسويت؟
عصام:لا والله مااعرف كولي بالله خل اشوف شمسوي يجوز مامنتبه.
رنا:اللي سويته كلش مو حلو ومو مقبول.
عصام مو لهدرجه.. يعني هالمره اتماديت حيل وخلينتي بوضع محرج ومؤذي..
انت هيج تصعب علي الموضوع.
دمعت عيوني رجعت دنكت سويت نفسي اكتب كال:
رنا تره انتي اللي مأذيه نفسج وانتي اللي مصعبه الموضوع يعني هو الولد رايدج
بالحلال حتى لو متزوج شبيها يعني انتي مو تحبينه؟المفروض تتنازلين شويه وتضحين علمود تنجمعون سوه مو تسدين كل البيبان بوجهه.
رنا:الحجي سهل.
عصام:لا مو حجي وماكو شي سهل لعلمج اذا قبلتي راح تصير مشاكل كومه وابوي ماراح يوافق ويمكن مايجي وياه اذا صارت القسمه ويمكن مايخلينه احنه اخوانه وخواته نوكف وياه ونحضر بس هو هذا كله مو هامه اللي هامه انتي وبس.
يعني شوفي شكد رايدج ويحبج لدرجة بايع اهله كلهم علمودج شوفي شكد عنده استعداد يضحي في سبيل تنجمعون سوه انتي بالمقابل هم لازم تضحين وتعبين وتواجهين الكل علموده.
لازم ماتخلين احد او شي يمنعج او يخليج تتراجعين او تخافين.
لاتفكرين بأحد انسي الكل فكري بي هو وبس.
رنا:وانت تشوفها سهله ابوك مايقبل بيه ومايريدني ويمكن اخوانك البقيه وخواتك هم مايقبلون وياخذون مني موقف لخاطر بت عمكم ومرت اخوكم.
عصام:شجاي اكلج انه؟لاتفكرين بشي او احد غيره هو بالنهايه كلها راح تتقبل الموضوع واول وتالي راح تنحل كل المشاكل بالتدريج اهم شي هسه موافقتج حتى نخلص.
ماحجيت ظليت ساكته ليش انه من دون البنات هيج كل شي شده وصعب ومشكله دائما اكو عوائق؟
عصام:فكري
رنا:ماكو شي افكر بي خلص كتلك حجينه واتفقنه ووضحنه كل شي وانتهينه.
عصام:شتفقتوا؟
رنا:راح اقبل باي واحد يتقدملي شنو ماتكون ظروفه وعيبوبه حتى بعد ننتهي من هالسالفه وكلمن يشوف حياته.
سكت ماحجه شي.
وره تقريبا شهر جنت معزومه بزواج صديقتي لبنى ورجعت متونسه وفرحانه لان لبنى حبابه وخوش بنيه.
دخلت للبيت اتلكتني امي من الباب:
وين صرتي صار ساعه متانيتج.
رنا:ها شكو؟
امي:العصر اجو عليج خطابه.
رنا:منو؟

شتكولون تطلع كد كلمتها وتوافق؟