فقراء لم يخلقوا للحب

/15/

#فقراء_لم_يخلقوا_للحب_
ل: #روز_الفياض_
ج١٥
دخلنه زرنه ودعينه وصلينه وكعدنه شويه الكعده هناك تشرح الكلب..
كاعده صافنه شويه واجت بنيه حلوه حيل كعدت يمي وبيدها طفله زغيره.
الطفله توها تتعلم مشي تكوم توكف تمشي خطوتين وتوكع.
وانه اباوعلها مبتسمه واشرلها بأيدي تعاي هي تضحك.
بعدين وكعت والظاهر تأذت ظلت تبجي كامتلها امها وانه هم فزيت كمتلها.
امها تريد تسكتها ماتسكت استحيت حسيتها صارت بوجهي كلت هسه امها يمكن تكول حسدتها..
رحت يمها حاجيتها ولاعبتها ضحكت.
التفتت امها علي كالت:
هاي شنو بس الج ضحكت ياسبحان الله متحب احد هي وتستغرب حيل.
رنا:يكولون بين الكلب والكلب مرسال يمكن حست بيه حبيتها هههه.
امها:مبين ماعندج اطفال؟
هزيت راسي لا.
كالت:الله يرزقج ان شاءالله.
رنا:شكرا بس انه مامتزوجه.
كتلها وابتسمت.
كالت:معقوله كل هالجمال واللطافه وممتزوجه؟شعجب؟
رنا:مااريد اتزوج جربت حظي مره وكرهت الزواج.
كالت:عادي هوايه بنات متنجح عدهم اول تجربة زواج بس مو معناها يكرهون الزواج بعدين الله يعوضهم بالاحسن.
رنا:ماكو احد يعوض.
ابتسمت كالت:
جنتي تحبين؟
ضحكت على كيف كتلها:
ليش؟؟
كالت:مبين عليج من حجيج وقصتج المختصره مبين جنتي تحبين.
سكتت بعدين كتلها:
سوالف قديمه هاي.
كالت:مااتصور قديمه مبين عليج ماناسيه منها شي.
اني فضوليه حيل عفيه ولو اضايقج احجيلي شويه ليش مااتزوجتوا؟
رنا:لان اتزوج بت عمه.
كالت:ايا حقير ولو يمكن تزعلين مني.
بس شلون بعدج تحبيه اذا تركج واتزوج بت عمه؟
رنا:الظروف مرات تجبر الانسان على وضع هو اصلا كارهه.
سكتنه شويه بعدين كالت:
الله يساعدج انه حاسه بيج الحب من طرف واحد مؤلم.
باوعتلها كتلها:
مااتصور انتي تحبين احد ومايحبج.
كالت:ليش؟؟
رنا:لان ماشاءالله جمال وحلاوة ولطافه.
كالت:اكو شبه بينه اني وانتي ياسبحان الله.
رنا:شلون؟
كالت:انتي هم حلوه وهم مثلي ماعندج حظ تحبين واحد ميحبج.
رنا:يكولون المتزوجه حرام تحب غير زوجها.
كالت:واني مااحب غير زوجي بس مااحسه يحبني.
رنا:ليش؟
كالت:ماادري هو زين ويايه ويه بنته ومدللنه وممخلينه محتاجين شي وطيب وحنون بس احس كلبه مو الي.
رنا:لا اكيد متوهمه بس هي الحياة وهموم الحياة تخلي الرجل ماله خلك.
كالت:لا مو هسه حسيت بهالشي من اول مااتزوجنه من اول يوم يعني احنه مخطوبين ومايتصل علي ابد ولايسمعني حجي حلو وحتى من اتزوجنه حسيته بارد مامتلهف مثل مااسمع من المتزوجات ابد عبالك من زمااان متزوجين.
رنا:يجوز مايعرف يعبر عن مشاعره؟
كالت:
لا بس جان يحب وحده ثانيه قبل لايتزوجني.
رنا:منو كلج؟
كالت:
تره واضحه الرجال اللي مايحب مرته ويحب وحده ثانيه معروف وتصرفاته واضحه صفناته بروده طريقة كلامه وحتى سكوته.
رنا:الله يهديه ان شاءالله ويخلي الج.
كالت:امين يارب ماعندي غيره احد.
شويه وكامت كالت:
زوجي تأخر كال يصلي ويطلع اشو سواها طواله.
اروح اشوفه؟؟
رنا:بكيفج.
كالت:بس عفيه راح اخلي بتي يمج دقيقتين مااتأخر.
رنا:اوكي ماكو مشكله بس لاتتأخرين خاف تبجي.
كالت:دقيقتين.
راحت وانه ومؤمن كاعدين نلعب ويه البنيه وهي تضحك.
اتونسنه عليها شويه واجت امها كالت:
يالله رناوي اجه بابا.
انه عبالي تقصدني كتلها:
هاا؟وين تعرفين اسمي؟
كالت:بتي اسمها رنين.
رنا:هااا ههههه الله يخليها الحلوه عبالي تقصديني.
كالت:ليش انتي شسمج؟
رنا:رنا..
كالت:
يااا شلون صدفه حلوه لهالسبب حبتج طلعت بينكم اكو قواسم مشتركه ههههه.
ضحكت وبست بتها وانطيتها الها.
وسمعت صوت وراها...
كال:
يالله نروح؟
التفتت هي عليه كلتله:
اي عيني يالله.
مد راسه من وراها كال:
السلام عليكم...
انه بذيج اللحظه حسيت على كولت المصريين نزل علي سهم الله.
حرف ماطلع مني بس مؤمن رد عليه السلام وانه صافنه عليه وهو صافن علي.
بعدين كال:
رنا..!!!!
دارت عليه مرته كلتله:
وين تعرف اسمها؟
ظل ساكت مايعرف شيجاوب وانه كلبي اتخربطت احواله يدك يدك بعدين اتشجعت وكتلها بصوت ناصي:
جان موظف وياي قبل.
كالت:
يااا شوف شلون صدفه ياربي.
درت انه على مؤمن كتله:
مؤمن هذا ارشد سابقا جان يشتغل وياي.
ودرت عليه كتله:
هذا... هذا اخوي مؤمن.
مد ايده مؤمن سلم عليه وهو مايحجي بس يباوعلي.
بعدين كالت مرته:
معناها اتفضلوا ويانه اليوم.
رنا:مشكوره مانكدر جايين ايفاد وباجر راجعين.
كالت:
اي وشكو بيها اليوم نضيفكم وباجر الله وياكم.
رنا:والله مانكدر يادوب هسه نطلع نشتري منا للاهل حلويات وشغلات ونرجع للفندق حتى نرتاح وباجر نطلع.
ارشد:شكد صارلكم هنا؟
درت عليه ودنكت ماكدرت اباوع بعينه كدام مرته ولان هو نظراته مفضوحه ومانزل عينه مني.
رنا:البارحه اجينه.
مؤمن كال:
امس بالليل وصلنه.
ارشد:لو ادري بيكم جايين جان ماخليتكم تبقون بالفندق.
رنا:مشكور ماتقصر.
ارشد:بيا فندق نازلين؟
سكتت ماردت انطيه العنوان بس مؤمن جاوبه.
بعدين كال:
معناها انه.. احنه نوصلكم.
رنا:لا لامايحتاج مشكور اصلا نريد نروح نتسوك للاهل.
ارشد:اي وشنو يعني احنه هم نريد نشتري ومن تخلصون نوصلكم على طريقنه.
رنا:ماله داعي بعدين خاف تتعطلون احنه نطول.
خزرني كلي:
ماتحرجيني اعرفج بس انه اكدر احرجج.
سكتت ماحجيت شي كافي نظراته انوب طلع حجيه كله مو طبيعي كدام مرته ومؤمن..
اخذ بته ومشى كدامنه ومرته وراه وانه ومؤمن مشينه وراهم بس كلبي يدك يدك من الخوف.
هو يمشي وانه اباوع عليه وعلى بته ومرته وافكر بحجيها معقوله لهسه يحبني ويفكر بيه مثلما انه لهسه احبه وافكر بي؟؟
طلعنه للسوك وهو ظل يمشي بصفي وانه مسويه نفسي اباوع عالمحلات وهو كل شويه يباوعلي.
بعدين كال:
اي رناوي شلونج؟