فقراء لم يخلقوا للحب

/18/

#فقراء_لم_يخلقوا_للحب_
ل: #روز_الفياض_
ج١٨
من راح الكل وبقينه بس احنه كعد يمي وحضني حيل.
ارشد:واخيرا.
ماحجيت كال:
هذا اليوم تأخر هواي.
هم ماحجيت باوعلي كال:
شبيج انخلستي؟
رنا:احبك
ضحك على كيف كال:
ادري .
ثاني يوم الصبح طلعنه لبغداد.
وصلنه لبغداد الظهر واخذنه تكسي للبيت وصلنه ونزلنه ونزل هو الجنط بعدين كال:
باوعي ..
اشر بأيده فوك كتله:
شنو؟
ارشد:هاي شقتنه فوك.
باوعت بيت ومقسوم الفوك شقه ودرج خارجي وباب منفصل.
ماحجيت شي جنت مستسلمه لكل شي من البدايه ماسألته عن شي ولااشترطت عليه اي شي.
دخلنه للشقه زغيره ومرتبه هو مأثثها ومرتبها.
ارشد:شرايج؟
رنا:حلوه عاش ذوقك.
ارشد:حبيبي ارتاحي على مااروح اجيبلنه غدا واجي.
بست خده كتله:
اوكي.
طلع وانه بدلت وغسلت وفتحت الجنط وبديت ارتب ملابسي بالكنتور.
بس انتبهت هو مامخليله ملابس هنا ليش؟؟
يجوز داليا ماتقبل؟شنو موقفها بالله من عرفت يريد يتزوجني؟
اكيد هسه كالت عني وحده حقيره خطفت زوجها منها..
اوووف شكد موقف مو حلو ..
ذبيت الملابس من ايدي ضاك صدري..
اتمددت عالجربايه وظليت افكر بالمشاكل الجايه بالطريق..
غفيت ماحسيت الا من حضني وباس خدي.
ارشد:حبيبتي كافي نوم كعدي طول الطريق جنتي نايمه اشتاقيتلج.
بقينه 4 ايام بالنهار نايمين وبالليل نطلع يوميه ياخذني لمكان.
وره هالاربع ايام جانت دنيا العصر تونه كاعدين من النوم ورحت اسويله جاي.
ارشد:رناا؟..رنا؟
رنا:ها حبيبي؟
دخل للمطبخ كال:
شتسوين؟
رنا:اسويلك جاي.
حضني كال:
تدرين شكد احبج؟
رنا:لا شكد؟
ارشد:كلما اشوفج تحوسين بالبيت مااصدك انتي هسه مرتي خلص وانتهت المعاناة.
رنا:يعني شكد تحبني؟
سكت شويه بعدين حسيته ضاج..
ارشد:ماتتصورين شكد.
يالله صبي الجاي وتعاي حتى نحجي.
صبيت الجاي ورحت يمه بالهول متمدد عالقنفه.
خليت الجاي يمه وكعدت بالكاع يم الصوبه.
كعد هو يشرب جاي بعدين كال:
انه اليوم اروح.
باوعت عليه كتله:
وين؟
ارشد:للبيت.
رنا:يابيت؟
ارشد:لبيت عمي اشوف رنين..
سكتت شويه انقهرت بس حقه كتله:
يعني رايح لمرتك الثانيه كول هيج.
ارشد:هذا الصحيح مرتي الثانيه وبتي هذا حقهم.
ماحجيت.. شويه وطفت الكهرباء بس اكو ضوه مال الصوبه مضوي المكان.
رنا:شوكت ترجع؟
ارشد:باجر ان شاءالله.
خوما تخافين بحدج؟
رنا:يعني اذا كتلك اخاف راح تبقى؟
ارشد:ياريت بس مو بيدي هم همه هناك خطيه يجوز يحتاجون شي او يصير عدهم شي بعدين صدك مشتاق لرنين.
هزيت راسي اي بس جنت مقهوره ماخطر على بالي هالموضوع من يروح يم داليا منو يبقى يمي؟؟
شينومني بالليل؟
شلون لو صار شي؟
ظليت افكر بسكته،دنك باس راسي وكعد يمي بالكاع وحضني.
خليت راسي بحضنه وغمضت عيوني الظاهر هذا قهر جديد من نوع ثاني.
ارشد:بردانه؟
هزيت راسي اي رغم ماجنت بردانه بس مااريد احجي بعد مالي خلك.
حضني اقوى بعدين كال:
التليفون يمج خاف تحتاجين اي شي اتصلي على بيت ابو أوس اللي جوانه خوش ناس وحبابين وابوهم صديقي رقمهم موجود بدفتر التليفونات يمج.
عبالي راح يكلي اتصلي علي عالبيت ظليت صافنه ليش اتصل على بيت ابو اوس ليش ما اتصل عليه؟؟
ارشد:يمج فلوس بالكنتور خاف تحتاجين ومفتاح الشقه والقفل وره الباب بس اطلع اقفليه حتى لايظل بالي يمج ومشغول عليج.زين حبي؟
رنا:ان شاءالله
ارشد:زين معناها دوري علي.
درت عليه باوعتله كال:
مايلوكلج تضوجين بعدج عروس لازم تضحكين.
ابتسمت جذب كال:
مايطاوعني كلبي اروح واخليج.
اتنهدت وخرت من حضنه وكمت رحت للمطبخ ادور شمعه او فد شي.
اجه وراي كال:
شتدورين بالظلمه؟
رنا:شمعه او فانوص.
ارشد:ماكو والله راح من بالي مااشتريت يالله هسه اروح اجيبلج وارجع.
رنا:لاخلص ماتسوه عود من تجي باجر جيب وياك.
ارشد:لاظلمه عليج.
كتله بصوت ناصي:
متعوده عالظلمه.
اتدنه يمي وحضني انه هم حضنته بعدين بست خده كتله:
روح لاتتأخر.
باس خدي وراح يبدل.
بقيت احوس جذب بالمطبخ.
شويه وصاح علي رحتله لكيته مبدل وواكف يم الباب كتله:
هاا؟
ارشد:تعاي شويه يمي.
اتدنيت يمه كتله:
شنو؟
ارشد:ماكو شي بس حتى تقفلين الباب وراي.
مشى خطوتين ودار علي كال:
تعاي انطيني بوسه قبل لااروح..
ابتسمت واتدنيت حضنته وبست خده ووخرت بقى لازمني كال:
لا مااريد بوسه مال قشمره اريد بوسه هيج💏.
رنا:كافي يالله روح لاتتأخر.
ارشد:اوكي .. بالليل اتصل عليج ان شاءالله.
هزيت راسي اي.
ارشد:يالله مع السلامه.
رنا:مع السلامه بوسلي رنين.
ابتسم كال:
صار.
طلع وسد الباب وانه رحت وراه قفلته.
ورجعت كعدت يم الصوبه وافكر شيخلصه الليل بحدي وظلمه شلون بيه.
الوقت يمشي بطيئ كوه.
صار الليل والكهرباء ماكو والصوبه هسه يخلص نفطها والدنيا بارده ومااشوف شي والسما مغيمه.
ماكو بس صوت البزازين يتعاركن بالسطح وشكد صوتهن مزعج ومخيف بالليل.
ظليت مكابله الشباك اباوع عالشارع بعدين كلت خل اكوم اجيب فراش انام هنا بالهول اخاف انام بحدي بالغرفه.
فرشت فراشي بسرعه لان الصوبه بدت تخف نارها راح تطفى اتغطيت وبقيت كاعده بفراشي كبال باب الشقه ماكدرت اتمدد وانام واحجي ويه نفسي:
مااتفقنه هيج ارشد مااتفقنه.
باوعت للساعه صارت ب٩.
نعست من الضوجه والظلمه..
طفيت الصوبه وكلت خل انام ان شاءالله ماكو شي.
اتزحلكت بفراشي واتغطيت وافكر شلون لو الشقه بيها صراصر وانه نايمه بالكاع؟
لااسم ان شاءالله ماكو حرامي ولاصرصر كون..
شويه وسمعت صوت احد عالدرج خفت غطيت راسي وانه اكول ياربي دخيلك.
سمعت صوت مفتاح بالباب كلبي اجه يوكف من الرعب..
انفتح الباب وانه طفرت من مكاني وصرخت..
ارشد:بسم الله الرحمن الرحيم.
سمعت صوته ارشد ركضت شبكته.
حضني كال:
خفتي؟
هزيت راسي اي باس خدي كلي:
همزين اجيت..
جبتلج فانوص ولاله وشموع حتى ماكو ظلمه بعد.
شعلنه الشموع وكعدنه.
رنا:شعجب رجعت؟
ارشد:شفت صديقي بيتهم هنا وحجينه عن الكهرباء وكال اليوم ماكو المحوله مال كهرباء المنطقه طاكه فطلعت جبت الفانوص وهالسوالف واجيت كلت هسه تخاف.
رنا:اجيت اموت من الخوف.
ارشد:ليش مااتصلتي على ام اوس؟
رنا:ام اوس شتسويلي اذا دخل علي حرامي لو طلعلي صرصر.
دار علي كال:
ياصرصر؟ شبي الصرصر؟
رنا:لو طالعلي صرصر شسوي؟
ارشد:هههههههههههههههههههههههههههه.
رنا:على كيفك تره ماتضحك لهدرجه.
ارشد:هههههههههههههه آخ ياربي هههههههه.
رنا:اها شالقصه؟
ارشد:شجاب الصرصر عالحرامي هههه يعني تقارنين الحرامي بالصرصر.
رنا:الحرامي ارحم.
ارشد:هههههه.
بقيت اباوعله يسكت ويرجع يضحك لحدما تعب بعدين كال:
اتعشيتي؟
رنا:لا
ارشد:نتعشى؟
رنا:يالله هسه اجهز العشا.
من ردنه انام كتله شعجب راح تبقى هنا خاف داليا تزعل؟
ارشد:ماانطاني كلبي اعوفج بحدج بالظلمه كتلهم صاحبي مريض وماعنده احد يبات وياه بالمستشفى.
تعاي عندي..
حضني بست حجنه كال:
رنا.
رنا:امم؟
ارشد:رنا؟
رنا:ها
ارشد:رنا؟
رنا:ياا شكو؟
ضحك على كيف وباسني كال:
ماكو شي بس حتى اصدك انتي هسه مرتي وهذا بيتنه ونايمين بغرفتنه وبالمستقبل ان شاءالله يصير عدنه جم سنفور وسنفوره.
ثاني يوم الصبح من راد يروح كتله:
ملابسك خليها حتى اغسلها البس من اللي جبناهن ويانه.
ارشد:لا شلون البس غيرهن اذا سألت داليا شكللها منين جبت هدوم وبدلت.
سكتت شويه بعدين كتله:
ارشد داليا تعرف احنه اتزوجنه لو لا؟
جان يمشط شعره ذب المشط وراح كعد يلبس حذائه.
من شفته ماجاوب ضاك صدري كتله:
يعني ماتعرف؟
ماجاوب..
رنا:ليش؟ ليش ماكتلها؟
ارشد:ليش اكللها؟
رنا:لان معناها انه هسه متزوجتك بالسر.يعني ابوك مااجه وزعل ميخالف كلت على كولت عصام اول وتالي يقبل حتى لو بعدين خواتك6 بس وحده اجت كلت ميخالف بت عمهن ولخاطرها ومقهورات على قهرها يمكن او يمكن ابوك ماقبل يجن كله هذا يهون بس اطلع متزوجتك بالسر لا.
كام وكف كال:
يا سر شبيج عرس وناس وزفه يا زواج بالسر بعد؟
رنا:مدام هي ماتعرف معناها بالسر.
ارشد:اول وتالي راح تعرف.
رنا:شوكت؟
ارشد:رنا لاتسويلنه مشكله من لاشي.
رنا:كلبي جان حاس من فتحت الكنتور وماشفتلك ملابس.
ارشد:شتفرق عندج؟
رنا:شلون شتفرق؟يعني تظل تجيني هيج بالبوكه مثل الحراميه؟البارحه صاحبك مريض وبعدين شلون؟
ارشد:اتحملي فتره راح اجيلج بس بالنهار واذا كدرت اجي بالليل راح اجي.
رنا:ياااء !!!!
اتدنه راد يبوس خدي وخرت كتله:
لا لاتجي فد مره احسن.
ماحجه شي اتنهد وطلع راح..
ظليت بيومها طول النهار احس مشتعله نار.
ظلت تمطر ضجت اكثر بعدين طلعت للسطح كعدت جوه المطر شعور حلو من تحس رذاذ المطر يوكع على وجهك..
بعدين بردت وشفت الكهرباء اجت كمت دخلت..
اتصلت بأهلي وحجيت ويه امي ومؤمن شويه بس امي ضوجتني لا شلونج لامشتاقتلج لاان شاءالله مرتاحه بس هالشهر الراتب ماراح يكفينه وشوكت ترحين تقدمين على وظيفه حتى شويه تساعدينه..
اختنكت كلش بس ويه مؤمن من حجيت ارتاحيت رغم فرق السن اللي بينه بس احب اسولف وياه لان هادئ وياخذ الامور بعقلانيه ويحاول يحلها بدون مشاكل.
حجيتله على اللي صار ويه ارشد كال:
معذور المواجهه مو سهله بعدين انتي اذا تحبينه لازم تتحملين لان هو مدام هيج يحبج اكيد ماراح يكدر يبقي الوضع هيج يعني اول وتالي راح يكللها حتى يجيلج براحته.

الايام اللي بعدها حاولت ابقى هادئه ومااحجي بمواضيع تسبب توتر بيناتنه وهو جان يجي يوميه الظهر ويبقى للعصر ومرات للمغرب ويروح بس مايبات يمي.
اتعودت ابقى بالليل بحدي واتعرفت على جيراني اللي ساكنين جوه جنت متصورتهم كبار بالعمر بس طلعوا تقريبا كدنه وعدهم 2 جهال جانوا مرات يصعدون يمي يلعبون.
عصام جان مرات يتصل يتطمن علي لان يعرف ارشد مايكدر يبقى يمي بالليل ومااعرف احد تقريبا لاصديقات ولااندل اطلع واتمشى واروح واجي.
اجه عصام بقى اسبوع عد بيت عمه بس جان يمر يمنه العصر.
ارشد جان مستلم بيت لواحد رفيق جبير بالحزب وجان توه مخلصه ومن خلصه عزمنه صاحب البيت هو وعائلته على عشا بنادي الصيد وجان بوقتها نادي الصيد ما يروحله الى الناس المرتاحه كلها تجار ورجال اعمال ومسؤولين.
رحنه انه وارشد وعصام..
اتعرفنه عليهم وكعدنه جانت حفلة بيه لباسم العلي.
الرجال جان جبير بالعمر ووياه مرته هم جبيره بالعمر وولده 2 شباب وبنيه وحده.
يسولفون ويضحكون بس انه ماارتاحيت حسيتهم يخوفون الرجال وولده نظراتهم وحجيهم.
دنك عصام يم اذني كال:
لو ندري ماجايين.
رنا:ليش؟
عصام:عينهم وصخه.
رنا:ليش؟
التفت علي كال:
انتبهي شلون هذا الشايب يباوعلج هو وابنه.
غلست لان انه فعلا حاسه بهالشي.
شويه وكال ارشد:
نروح؟
عصام:اي كافي.
رنا:اي
كمنه نريد نروح بس ماقبلوا جلبوا بينه انه ضجت وغيرت مكاني كعدت يم الام وظلت تسولف على ولدها وبتها وشلون ماتحب تجي لهيج اماكن لان تستحرم بس لخاطرنه اجت اليوم.

شرايكم؟
تعليقاتكم قليله متشجع😑