فقراء لم يخلقوا للحب

/21/

#فقراء_لم_يخلقوا_للحب_
ل: #روز_الفياض_
ج٢١
‎ج21
‎اتذكر جانت يم بيتنه مدرسه ومن صار السقوط الناس الفقيره سوت هجوم على مؤسسات الدوله مابقوا شي بيها كله اخذوه..
‎فصعدنه انه وداليا فوك السطح نباوع عليهم والناس كلها طالعه بالشارع تباوع وانه بيدي حمودي ورنين تبجي تريد واحد يشيلها تباوع..
‎داليا:لج رنا نزلي الولد لايوكع..
‎ماجاوبتها ..
‎داليا:رنا لج ابنج نزليه تره اخاف هيجي نزليه ياعيني هاي تشوفه وتظل تبجي.
‎رنا:يابه شكد جبانه وتتنغوصين اني واني ذبحتيني هاج اخذيه انتي شيليه.
‎انطيتها احمد وهي تضحك وشلت رنين حتى تباوع:
‎ياا عزا انوب راح توكع بتي..
‎رنا:تسكتين لو اشمرج انتي واخلص منج واكول مخبله وذبت نفسها..
‎ظلت تضحك وتدردم وتحجي وانه اباوع عالناس شفت واحد اعرفه شكله مو غريب جاي باتجاه بابنه كلما يقترب اكثر كلبي يظل يدك اكثر الى ان وصل للباب قبل لايدكه ...
‎ركضت ..نزلت ركض وداليا تصيح وراي ماتدري شكو..
‎مالتفتت عليها ولاحاجيتها عفتها هي والجهال عالسطح ونزلت على مافتحت باب المطبخ كلبي خلصان..
‎ركضت للباب الخارجي انه مخليه بي قفل وهو يدفع بالباب.
‎اريد اعرف شلون احط المفتاح ايدي ترجف..
‎فتحته وشفته كدامي حبييب كلبي حب السنين وابو ابني بس ابتسم انه بجيت راسا حضني هو يبجي وانه ابجي بوست وجه كله..
‎اخذ ايدي باسها ورجع حضني..
‎بقينه هيج ماادري شكد بس متحاضنين مامصدكين...
‎اجت داليا طلعت شايله حمودي وتجر برنين اول ماشافتنه صاحت:
‎يمه !!.... ظلت صافنه مصدومه..
‎وخرت انه حتى تجي تحضنه وتسلم عليه بس هي ماخذتها الصدمه لان شكله متغير ضعفان وعنده لحيه وشعره طويل مكفش..
‎راح هو حضنها هي وحمودي ظلت تبجي اخذت منها الولد وظليت واكفه همه يبجون وانه ابجي..
‎سديت الباب ودخلنه جوه للبيت اخذ الجهال بحضنه يبوس بيهم ويبجي:
‎باباتي اشتاقيتلكم.. حياتي كبرانين حبايبي .. دعيت الله يخليني عدل لحدما اشوفكم واطمئن عليكم مااريد شي بعد..
‎هو يحجي ١وانه وداليا نبجي..
‎بعدها الناس من هجمت على مؤسسات الدوله طلعوا حتى الاوراق والمستمسكات والملفات مال الامن والحزب والمخابرات مابقى شي ولابقى سر..
‎كل واحد عنده شخص مفقود انعرف مصيره اما مسجون وطلع من السجن حاله حال ارشد واللي مثله او معدوم...
‎والصدمه من هجموا على الفرقه الحزبيه اللي بمنطقتنه اكتشفنه ابو تغريد مقدم بأرشد 15 تقرير خلال الشهر الاخير بس..
‎يعني وارشد وهو عدهم جان ابو تغريد مستمر يحفرله ويقدم بي تقارير.. ولهذا السبب فصلوني من شغلي..
‎يعني لو باقيه الحكومه السابقه يمكن ارشد جان راح ينعدم 100%...
‎ارشد من عرف اتخبل وانصدم لان مابينه وبين ابو تغريد اي شي مو زين بالعكس يعني اتوسطلي شغلني وساعد ارشد هووااي بشغله جابله زباين  مرتاحين وعدهم خير..روز الفياض
‎ومن سألنه ارشد على موضوع الشقه ارشد مانكر كال:
‎صحيح انه اشتريت منه شقه وانطيته تقريبا 3 ارباع المبلغ مو نصه وعلى اساس بنهاية الشهر اللي اعتقلوني بي جان لازم انطيه الباقي وكاتبين بالمبلغ كمبياله وموجوده العقود عندي بالمكتب...بس هو اله عندي فلوس شستفاد من اشتكى علي وبلغ عني واخذوني لو انه معدوم هو شيحصل حتى فلوسه ماماخذهن كلهن؟؟
‎ردت احجيله بس خفت وماانطاني كلبي اضوجه وهو طالع تعبان وماله خلك..سكتت ماحجيت.
‎بالليل جنت نايمه انه وحمودي وهو يم داليا..
‎حسيت بي دخل للغرفه كعدت كتله:
‎ها حبيبي شكو؟
‎كعد يمي ودنك باس خدي كلي:
‎صدك هذا النذل هيج كايلج؟
‎رنا: يانذل ياستار؟
‎ارشد:ابو قند... صدك كايلج امشي وياي للشقه؟
‎ماحجيت خفت ومااعرف شنو المفروض اجاوب كال:
‎ماتحجين؟
‎رنا: يعني داليا ماتجوز من هذا طبعها تحشر نفسها بكل شي؟
‎ارشد:ليش ماكلتيلي؟
‎كعدت عدل وحضنته كتله:
‎لان راح وراحت ايامه الله لايرده وينتقم منه وين ماجان ان شاءالله.
‎ارشد:المثل هذا مسألة ايام وياخذ جزائه لان هو والوصخين من عينته مأذين هواي ناس وكومه ناس طلعت رايحه بالرجلين لابد واحد ينتقم منهم الله بالمرصاد..
‎رنا: ونعم بالله.
‎لاتضوج حبيبي خلص غمه وانزاحت الحمدلله هسه لازم نفكر نحمي نفسنه لان الوضع بره مو زين خطف وكتل وتسليب اللهم ياكافي..
‎ارشد:الله كريم.
‎لزمت ايده بستها كتله:
‎كلما اباوع لحمودي اكول بكلبي لاتحرمه من ابوه هسه بعده زغير ولاتحرمني منهم اموت..
‎دمعت عيوني ومسحتها كال:
‎خفت اموت وانه ماشبعان منكم بعدني اشوفج عروس وبعدني من اطلع لاي مكان اشتاقلج..
‎لاتبجين...
‎دنك باس عيني ..دفعته كال:
‎ليش؟
‎رنا: لا لاتبوسني من عيني مو زين..
‎ارشد:اي ليش؟
‎رنا: ماسامع الاغنيه مال( بلاش تبوسني من عنيه دي البوسه من العين تفرأ)..
‎ضحك حيل كال:
‎تحجين صدك؟
‎رنا: والله شبيك ماسامعها؟
‎رجع ضحك كال:
‎عبالي عاقله جنت اكول اعقل من داليا طلعتي مثلها هههههههههه.
‎رنا: لاتره انه سامعه بيها هاي المعلومه صحيح فلا تضحك.
‎ارشد:ههههههه يامعلومه؟ هي هاي هم معلومه..
‎رنا:صوتك الولد نايم لاتكعده.. وبعدين اذكرك عود من نتفارك ..
‎حضنته وهو يضحك رجعت كتله:
‎يمه اسم الله تف من بؤي للموت ان شاءالله سوه.
‎ظل يكركر من الضحك كال:
‎يمكن من انسجنت لحدما طلعت انتن بس تباوعن افلام ومسلسلات مصريه ههههههههههههههههههه..
‎الايام الوراها سمعنه ابو تغريد كتلوه مانعرف منو بس اكيد ناس مأذيهم على كولت ارشد:
‎المثله مايصعدون هيج ويعلون الا على حساب ارواح ناس ثانيه..‎ثانيه..
‎رنا:يمهل ولايهمل سبحان الله.
‎داليا:وبشر القاتل بالقتل ولو بعد حين..
‎ضحك ارشد وضحكت انه كالت داليا:
‎شبيكم؟
‎ارشد:احس نفسي كاعد ويه شياب ههههههه.
‎ظلينه نضحك..
‎ثاني يوم الصبح ارشد راح للمكتب يجيب اوراقه واغراضه وانه انظف وداليا نايمه هي والجهال..
‎اندك الباب فتحته لكيت وحده لابسه بوشيه رفعتها طلعت الحجيه ام تغريد اتفاجأت سلمت علي ومبين عليها تعبانه ومتغيره حيل.
‎دخلتها وردت اسويلها جاي ماقبلت كالت مستعجله.
‎ظليت ساكته مااعرف شكللها بس هي راسا جرت ايدي وتبوس بيها انه خفت ماادري شبيها ..
‎جريت ايدي كتلها:
‎اسم الله خاله شبيج شصايرلج؟
‎ام تغريد:بالله وبيج خاله فدوه اروحلج جايتج لاتفشليني.
‎رنا:كولي خاله شتريدين مااقصر ان شاءالله.
‎ام تغريد:اني ادري بسواية ابو تغريد الله يرحمه ولو يمكن الله مايقبل نترحم عليه.. الولد حجولي وكلولي عالمسويه ويه ابو رنين والله صرنه بنص هدومنه من الناس مسوي بلاوي بس والله العظيم ولدي مالهم علاقه ولامسوين شي ولامأذين احد ابد صدك يطلعون وياه بس مايأذون احد والله العظيم ياخاله مايأذون..
‎ظلت تبجي كسرت خاطري خايفه على ولدها حقها..
‎ام تغريد:اتحملته هذا العمر كله لان ماعندي احد واكول عيب بعد كل هالعمر اتطلك واروح اكعد عد اخواني ونسوان خواني واني بيبيه..
‎ادري بي عنده سوالف مكسره وشرب وعربده وهو بهالعمر بس متحمله وساكته لخاطر ولدي بس اطلع يضيعهم وياه علمهم عالشرب وانه جنت معلمتهم عالصلاة من جانوا جهال..
‎شنكول وشنحجي بعد هسه هو صار يم ربه وياخذ جزائه..
‎رنا:الله يساعدج.. روز الفياض
‎ام تغريد:عليج بداعة ابو ابنج ورجعته سالم لاتسوون لولدي شي والله مامأذين احد ..اذا الي شوية معزة وخاطر عندج واني حاسبتج مثل تغريد واحبج تعرفيني.
‎رنا:لاخاله لاتخافين صدك جذب الحمدلله احنه مو من هيج نوعيه من الناس احنه ناس بحالنه واللي يأذينه نكول منه لله.
‎وولدج مامسويلنه شي ولابنيتنه احنه نسوي لاي احد شي .. بعدين همه شنو ذنبهم ونحاسبهم على سوالفه.. انه وحده من الناس ابتزني علمود الشقه الي بايعها لارشد بس من عرف ارشد كتله هو والله عوفه..
‎صفنت كالت:
‎شسوالج؟وياشقه؟
‎رنا: ابو تغريد قبل لايدخلون الامريكان بايع شقه بزيونه لارشد وباقيله بعد ربع المبلغ مااستلمه..
‎ام تغريد:ايي؟ هاي الشقه مالتي واني جنت مسويتله وكاله عامه بكل شي عندي يبيع ويشتري ويتصرف بكيفه..
‎حجيتلها اللي صار وسوالف ابو تغريد وحجيه وياي..‎رجعت دنكت على ايدي تريد تبوسها ماقبلت:
‎ازعل عليج خاله والله انتي عزيزه علي هواي ومااقبل هيج تسوين وهو بعد راح لدار حقه وانتهت هاي السوالف والله يحفظلج الولد ان شاءالله ويخليهم..
‎ام تغريد:والله ماادري شكول وشحجي بعد اذا انتو على اعتبار اصدقائنه وبيناتنه طبه وطلعه وزاد وملح وهيج سوه وياج وويه زوجج بعد شكول..
‎رنا:الحمدلله على كل حال.. بس بقت فلوسكم خل يجي ارشد هسه على جيه ان شاءالله وهو يتفق وياج لان هسه البنوك اتفرهدت بقت فارغه مابيها فلوس بعد..
‎ام تغريد:لا لا مااريدهن مااريد الفلوس ولا الشقه عليكم بالعافيه..
‎رنا:لاخاله شهالحجي هذا حقج ينطيج فلوسج وتنطينه الكمبياله المسجله عليه بالباقي..
‎ام تغريد:والله مااريدهن الشقه الج بالعافيه عليج والباقي مااريده هم الج اعتبريهن اعتذار عن اللي سواه بيكم..
‎ظلت تحجي وتتعذر وتتوسل خايفه على ولدها ولهذا السبب ماتقبل تاخذ باقي الفلوس يمكن جانت تتصور احنه جان بنيتنه نأذيهم بسبب سوايت ابوهم..
‎راحت وره ماطمنتها وكتلها مانسوي شي.. وره شويه رجع ارشد وحجيتله اللي صار..
‎ارشد:لا خلص مريت على ابو اوس واخذت منه فلوس وراح اوديهن الهم باجر واخلص..
‎وثاني يوم ارشد راحلهم ينطيهم الفلوس بس ماقبلت الحجيه تاخذهن وانطت الكومبياله لارشد بدون مقابل..
‎رجع ارشد مذهول وكلي:
‎كسرت خاطري شكد خايفه..
‎ومن ردت اروح كلتلي سلم على رنا وكللها الباقي هذا هديه مني الها ولحمودي وخل تبرينه الذمه خاف مااشوفها بعد..
‎وفعلا وراها ماشفتها لان ارشد سمع بيهم تاركين العراق ومنهزمين..
‎واحنه هم من شفنه الوضع شلون يخوف ابغداد قررنه نروح يم اهلنه لحدما يهدأ الوضع ونرجع..
‎صار 6شهور من سقطت بغداد وبدا الوضع يرجع بس بطيئ لان جانت فوضى ماكو قانون..
‎اجه عصام وابوه حتى يشوفونه ويتطمنون علينه..
‎ولحد الان مايحبني ابوهم ولايسلم علي ولو سلمت مايرد السلام ولازم اسمع كلمة مطلكه حتى لو يحجيها بينه وبين نفسه بصوت ناصي من يشوفني..
‎صح جنت انقهر كللش بس من اشوف ارشد شكد ينقهر ابلعها واسكت واكول خطيه مااريد ازيد عليه واقهره..
‎وصاهم ارشد يشوفولنه بيت يمهم نأجره ونسكن بي لحدما الله يفرجها ويصير الوضع امان ونرجع لبغداد..
‎وره ماراحوا بشهر احنه لمينه اغراضنه واجرنه بيتنه ورحنه وراهم..
‎استأجرنه بيت زغير غرفتين وهول.. غرفه الي انه وحمودي وغرفة لداليا ورنين.روز الفياض
‎جان قريب على اهله بنفس الشارع.. بنائه قديم وتعبان ومن دخلت انقبض كلبي وضجت ماادري ليش..
‎بس ارشد كلي شي مؤقت مانطول بي.
‎سكنه بي شهر وخلال هالشهر جانت داليا فرحانه رايحه جايه على بيت عمها.
‎بس انه مااروح بسبب ابو ارشد ..
‎امي وخواتي يجن وخوات ارشد مرات يجن بس ابوه لا.