فقراء لم يخلقوا للحب

/5/

#فقراء_لم_يخلقوا_للحب_
ل: #روز_الفياض_
ج٥
بقيت كاعده ومكابله المرايه منتظره يصيحولي.
اباوع لوجهي تعبان وشاحب وعيوني ذبلانه طلعت قلم الكحله كحلت عيوني حتى ماتبين عيوني ذبلانه من البجي.
كاعده واهز برجلي من التوتر شراح يصير هسه معقوله اتزوج هذا الهمجي اللي اسمه جواد؟؟
معقوله ارشد طلع يلعب علي؟
معقوله كل اللي جاي يصير وياي؟
حسيت باب غرفتي انفتح وسمعت صوت امي تحاجيني بس ماانتبهت شنو كالت ولامركزه وياها.
بقيت بمكاني مثل ماانه صافنه والف فكره براسي.
شويه ورجعت امي صاحت:
ولج رنا مو احاجيج؟
انتبهتلها درت وجهي عليها كتلها:
شنو؟
امي:ياا صار ساعه من اجيت وكتلج تعاي كعدي يمنه الرجال جاي يريد يسمع جوابج.
اتنهدت وذبيت حسره جبيره.
امي:روحج الج شبيج تتحسرين؟
درت عليها كتلها:
لا مو الي ماكو شي الي حتى روحي.
طلعت ورحت دخلت يم جواد شفته كاعد يدخن.
شافني طفى الجكاره وكام وكف.
كتله بكلبي شنو هالذوق منين نزل كل هالادب.
كعدت بدون مااسلم وهو اكلني بعيونه من كعدت هو هم كعد.
جواد:هلا بالحلوه.
ماجاوبت كال:
شدعوه يابه كلش ماملكيتنه وجه؟
امي:لا خطيه تعبانه من الصبح تكعد وتروح للدوام وترجع متأخر حتى ماتلحك تاكل لكمه تريد بس تنام وترتاح هسه كعدتها من النوم ماتشوفها مالها خلك.
ابتسم هو كال:
لا حقها اذا تعبانه ليش كعدتيها جان خليتيها نايمه ترتاح.
امي:لا مايجوز شلون تبقى نايمه ليش علمود منو جاي غير على مودها.
جواد:اي والله علمودها اجيت اعرف جوابها طلباتها شروطها.
مالي خلك افتح حلكي بكلمه كلش قافله عندي وماعندي استعداد انطي واخذ بالحجي وياه.
جواد:اي رنا كولي شنو طلباتج شروطج؟
جريت نفس حيل وجبرت نفسي غصب احجي:
منو كلك انه موافقه بالاول حتى تعرف شروطي وطلباتي؟
جواد:امج كالت موافقه.
دار باوع على امي وانه هم درت باوعتلها باستهجان.
ماعبرتني وجاوبت من يمها:
اي موافقه طبعا موافقه وين تلكه احسن منك.
رنا:ليش ماالكه احسن منه شنو عانس لو مو حلوه لو ناقصه ايد لو رجل.
جواد:ابد ماتنطي مجال منشار مو لسان ماتضيع حقها هههه.
رنا:انه اذا اوافق لازم انت توافق على شروطي.
جواد:كولي ياحلوه شروطج.
رنا:هو شرط واحد البيت.
باوعلي هو باستغراب:
شبي؟
رنا:البيت هذا ينكتب بأسمي.
ضحك هو كال:
لا مو لهدرجه كالوا حلوه واموره ويحقلج تتدللين وتدلعين بس مو بيت.
رنا:كيفك هذا شرطي وماعندي غيره.
جواد:مااتفقنه هيج.
رنا:مامتفقين على اي شي اصلا.
جواد:زين البيت راح تبقون كاعدين بيه بعد شنو تردين اكثر؟
رنا:كتلك شرطي البيت يتسجل بأسمي حتى اصير بأسمك.
باوع هو لامي امي سكتت ماحجت وانه هم بقيت ساكته هو ماعجبه الحجي اترخص وطلع.
وامي استلمت الخط السريع تحجي وتدردم ماعندج اسلوب ماتعرفين تكسبينه هسه يذبنه بالشارع من وراج ضيعتي هالفرصه من ايدج ... ظلت لنص الليل تحجي.
دخت وصار راسي مثل الطبل فتحت الباب ورحتلها كتلها:
اذا مايسجل البيت بأسمي لو يموت مااقبل.
امي:وشلون يسجله وانتي كالبه خلقتج بوجهه؟
رنا:لاتتوقعين اضحك بوجهه لو مو بيت لو عماره ولو مو يذبنه بالشارع لو يعدموني مااجامله واضحك بوجهه جذب هو عجبته هالخلقه وهالاسلوب يتحمل بعد.
مو تردون تورطوني وياه علمود البيت خلص هذا اسلوبي عاجبه اهلا وسهلا ماعاجبه دفعة مردي وهوا شرجي.
طلعت وسديت الباب ورجعت لغرفتي خليت التليفون يم راسي لهسه عندي امل ارشد يتصل.
لو يتصل ابطل حتى لو يطردنه جواد من البيت المهم مااتزوج غير ارشد.
ظليت الليل كله اتكلب طار النوم من عيني ثاني رحت للدوام ورجعت امي بالدوام واخواني هم دوامهم عصري خواتي بس بالبيت اتغديت ونمت .
دك التليفون يم راسي كمزت وبنفس الوقت فرحت اتوقعت ارشد بس طلع جواد.
الو
رنا:الو
جواد:مرحبا
رنا:اهلا
جواد:رنا موجوده؟
رنا:نعم اتفضل منو وياي؟
جواد:جواد جواد وياج
رنا:ياجواد؟
جواد:مفوض جواد
اختنكت بس سمعت اسمه كتله:
نعم مفوض جواد خير شكو؟
جواد:ماكو شي ردت احجي وياج واسمع صوتج.
رنا:خير
جواد:شنو خير مايصير احجي وياج يعني؟
رنا: شنو المناسبه؟
جواد:ماكو مناسبه ردت اعرف ماغيرتي رأيج؟
رنا:جواد الحجي اللي عندي كلته شرطي ماراح يتغير اتريد تذبنه بالشارع براحتك بس مااغير شرطي تريدني هذا العندي ماتريدني كيفك.
جواد:اريدج شلون مااريدج بس هذا مو مهر انتقام.
رنا:ليش هواي علي؟مااستاهل؟
جواد:لا والله مو هواي وتستاهلين قصر مو بيت بس على كيفج وياي.
رنا:العندي كلته والباقي يمك مو يمي.
جواد:اوووف
رنا:يالله من رختصك تعبانه واريد انام توني راجعه من الدوام.
جواد:اي حقج يالله مع السلامه.
رنا:مع السلامه.
سديته ونمت غفيت ماكعدت الا المغرب.
بقيت كاعده بفراشي مالي خلك اكوم لا اراديا سحبت التليفون بحضني واتصلت على ارشد طلعتلي بنيه سألتها عنه كالت:
مو هنا ارشد مسافر.
رنا:وين؟
كالت:راح لبيت عمه لبغداد عنده شغله.
انعصر كلبي من سمعت طاري بيت عمه معناها راح يخطب بت عمه.
سديته بدون مااسلم ولااحجي وكعدت ابجي شبيه مااتوب منه شبيه افكر بيه وهو مايفكر ولا باله يمي شبيه مااكدر اطلعه من تفكيري وهو طلعني من كل حياته؟؟
وره يومين جنت بالدوام ومااشوف الا جواد على راسي واكف اتفاجأت!!
جواد:السلام عليكم
رنا:وعليكم السلام
بقيت متعجبه واباوعله هذا شجابه هنا؟
جواد:كولي اتفضل شدعوه عليج ؟
رنا:اتفضل
كعد كبالي عالكرسي وحسيت بالاحراج من الموظفين واللي يطب ويطلع يباوعله.
والاحراج الاكبر من المدير استاذ بشار اذا شافه شنو اكله؟
جواد:اي خوش مكان سكرتيرة المدير العام مو شويه.
رنا:شنو عندك شغل هنا؟
جواد:لا والله ماعندي بس اجيت حتى احجي وياج.
رنا:تحجي وياي هنا كدام الموظفين والمدير؟
جواد:شكو بيها؟
رنا:كول امري لله
ضحك على كيف كال:
هو انه شمسودني بيج غير عصبيتج.
حصرتني الضحكه وكلت بكلبي مدام عاجبك اسلوب الحكران وكل شويه اهانه كيفك.
رنا:اي اسمعك؟
جواد:رناوي..
رنا:رنا لو سمحت اسمي.
سكت بعدين كال:
رنا طلبج صعب بس انه اكول انطيج مهر جبير فلوس يعني وخليهن بأسمج بالبنك شتكولين؟
رنا:انت شايفني شروه لو بيعه؟شايفني سلعه؟تنزل من سعرها؟
تره اذا انت مستغلي علي البيت مو مشكله واذا تريد تطلعنه منه هم مو مشكله..
جواد:لا لا انتي مالج ثمن عندي مو سلعه لو شي رخيص لا صدكي قيمتج جبيره..
بس شلون ماكو مشكله؟اذا اطلعكم وين ترحون يعني انه خايف عليكم.
رنا:لا شكرا لاتخاف الحمدلله اكو اللي يعرف قيمتي غيرك هواي.
صفن هو وباوعلي بنص عين كال:
يعني اكو غيري يريد يشيل؟؟
خزرته كتله:
شيشيل جيس التمن؟
ضحك هو كال:
لاقصدي اكو غيري حاط عينه عليج؟
رنا:هواي مو هاي انت؟شنو متوقع بس انت مثلا حاط عينك عليه؟
جواد:هاا منو يعني موظفين هنا؟
رنا:وشتستفاد من تعرف؟وحتى اريحك من التفكير مو موظفين.
اشرتله بعيوني على باب المدير.
باوعلي مافهم كتله:
المدير العام اتقدملي.
جواد:مديرج؟
رنا:اي مديري شبيك مستغرب؟
جواد:شيريد منج؟
رنا:شيريد بعد يريد يتزوجني على سنة الله ورسوله رجال محترم ومثقف وعنده خير من الله صح هم متزوج بس عالاقل ماعنده جهال يعني خالي مختلي وعنده استعداد يخلي بيت ابحدي انه واهلي وانه موظفه هنا وياه شريد بعد اكثر من هيج دلال؟؟
صفن هو عليه وسكت.
بعدين كال:
ليش ماوافقتي عليه؟
رنا:ماوافقت على احد لا انت ولاهو ولاغيركم بعدني افكر واشوف اللي يناسبني اكثر.
بعدني احجي طلع المدير من مكتبه وشافنه كاعدين سلم وفات.
جواد ظل صافن عليه كال:
هذا هو؟
هزيت راسي اي.
استاذ بشار اصلا هو انيق ومرتب وجواد ظل يباوع وراه.
رجع دار علي كال:
مبين خوش مدير؟
رنا:جدا محترم ومثقف وقمة الادب والذوق وفد خدوم بس احتاج شي بدون مااكول يعرض خدماته.
جواد:اييي.
وهز راسه بعدين كال:
يعني هسه الا البيت بأسمج؟
رنا:هذا الموجود مفوض جواد.
جواد:لا كولي جواد احلى تطلع من لسانج.
باوعتله وانه افكر خرب حظي يريد يعيش دور مراهقه متأخر براسي بس يالله كيفه.
رنا:لا جواد من اصير بأسمك هسه انت بعدك غريب.
جواد:لا ان شاءالله مو غريب ماغريب الا الشيطان.
رنا:اوكي هسه بعد تعذرني لازم تروح حتى اخلص شغلي وزحمه من مديري شيكول عني منو هذا الكاعد يمها صار ساعه وعايفه الشغل علموده.
جواد:اي حقج حقج انه احرجتج بس المفروض منا وهيج ماكو احراج اللي يسألج كولي خطيبي.
رنا:يصير خير اذا اكو قسمه اكيد اكللهم خطيبي.
جواد:لا ان شاءالله اكو قسمه عود هم امراج للبيت ونحجي.
رنا:الله كريم.
راح واتمنيت لو يمي حجار واذب وراه 7 حجارات وارتاح منه.
خليك هيج محموس من المدير عابت شكد غثيث.
بيومها بالليل من رجعت نمت من وكت تعبانه ومالي خلك حجي امي تعيد علي نفس الاسطوانه مال يوميه.
ماادري بيش الساعه اجت اختي عبير كعدتني.
رنا:ها شكو؟
عبير:ماما تكول خل تكعد جواد اجه.
رنا:ياجواد بهالليل صدك جذب بيش الساعه هسه؟
عبير:ب11
رنا:ادري شنو هذا ماعنده احساس هذا وقت زياره؟وليش ماكلتوله نايمه؟
عبير:ماادري والله ماما كالت كعدوها وخل تجي.
رنا:اهووووو شهالبلوه البليتني بيها ياربي.
ظليت ابجي بفراشي هم نعسانه هم تعبانه هم مااشتهي احجي وياه ولا اشوف شكله مااتحمله غثيث.
دخلت امي تحجي:
بعدج بالفراش كومي الرجال هنا.
رنا:ليش ماكلتيله نايمه؟
امي:هاي المتعافيه وحده غيرج هي تخابره تكله تعال.
رنا:لا حول الله ياربي الله ياخذني وارتاح.
امي:بسرعه استعجلي عدلي وجهج وابتسمي مو تدخلين مغندبه بوجه الولد.
رنا:ولد؟هسه صار ولد؟
امي:اشش صوتج انه رايحه قبلج اسولف وياه لاتتأخرين.
اجت باستني وكلتلي بضحك:
صيري شاطره شوفيه شلون ميت عليج خليه يسجل البيت بامسج وين تلكين هيج واحد مريش؟
راحت واني متلفلفه باللحاف عبالك جفن مااشتهي اكوم ومالي طاقه امثل الذوق والذرابه وياه.
كمت على اعصابي جريت روحي جر من الفراش رحت غسلت وجهي ودخلت يمهم بدون ماابدل ملابس وبدون مااخلي مكياج دخلت باوعتله كتله بكل برود:
هلو.
هو باوعلي وابتسم ابتسامه عريضه كال:
كل الهلا.
كعدت ماباوعتله كال:
شكلج جنتي نايمه بس لاجنتي نايمه وكعدتج خالتي.
رفعت حواجبي متعجبه خالته؟ على اساس زغيرون وامي خالته..
درت عليه كتله:
شمتوقع بيش الساعه انام وانه عندي دوام ولازم اكعد الساعه ب6 الصبح؟
وهسه بيش الساعه؟ تتوقع اللي عنده دوام الصبح يبقى كاعد لهيج وقت؟
جواد:لا ماعبالي نايمه لان كتلهم نايمه خاف نايمه خلوها كالت خالتي لا كاعده هسه اصيحلها تجي.
باوعت لامي خزرتني لان حجيت.
اتنهدت كتله:
يالله بعد كعدت.
جواد:لو ادري نايمه والله فلا اكعدج ولااجي اصلا.