فقراء لم يخلقوا للحب

/9/

لعيون السهرانين بعد بارت
#فقراء_لم_يخلقوا_للحب_
ل: #روز_الفياض_
ج٩
نزلت دخلت للاستقبال شفت جواد كاعد بصف مره جبيره لابسه عباية راس وحجاب ومخليه مكياج مو مال عمرها باوعت منا منا محد بس هي كاعده وجواد وامه معناها هي هاي مرته ام محمد.
رحت سلمت عليها وبوستها ردت علي عادي.
رحت كعدت كابلهم يم ام جواد اباوعلها ساكته ماحجت ولاكلمه بس استلمتني خزرات كصتني من راسي لرجليه.
انه جنت لابسه بدله قصيره سوده وشجره بورد ملون وردي وبنفسجي ومسشوره شعري.
بعدين دارت على جواد كلتله:
هي هاي الكتلت روحك عليها؟
باوعلي هو وابتسم وكللها:
اي هاي رنا.
رجعت باوعتلي وكالت:
ياااا؟ انهجم بيت الباميه رنااا.
وتعوج بحلكها.
باوعت انه لام جواد ساكته بعدين كامت تسوي جاي.
انه هم بقيت ساكته متعجبه عليها كامت نزعت عبايتها وراحت تفتر بالبيت اسمعها فتحت الباب على خوات جواد كلتلها:
جا شبيجن ظامات روسجن ماتعرفن تجن تسلمن لو لسانجن بي عظم؟
اباوع لجواد احسه مرتبك ماادري شبي ويباوع وراها.
شويه وسمعت صوتها صاحت:
يااا هذا التليفون شيسوي هنا عدجن بالغرفه؟من شوكت تخابرن وتدخلن التليفون بالغرفه؟
كام جواد بسرعه راح وراها.
ماادري ليش كلبي كرصني بس حسيت مرته هاي مو فقيره ولاهينه كمت وراهم رغم صوتها شلون صوت ينسمع من الحديقه.
جواد:ياهو جاب التليفون هنا؟
ماحجن بقن ساكتات حسيتهن خافن.
ام محمد:موديل جديد هذا يدخل التليفون للغرفه ويخابرن ههه.
ام جواد اجت ظلت واكفه ووجها ينطي الوان لان جواد عصبي ومرته مستمره بحجيها مال الثول.
جواد:ماتحجن منو مدخله التليفون للغرفه؟ شعدجن تخابرن بالغرفه؟
جواد مايحجي حجي يصيح صياح حتى انه ظليت ارجف من الخوف.
اخر شي اتشجعت من شفتهن كلش خايفات كتله:
انه سحبته الصبح للغرفه خابرت لساره صاحبتي ونسيته مارجعته لمكانه.
دار هو علي عيونه بكصته كال:
ليش سحبتيه لغرفتهن؟ليش ماخابرتي بالهول؟
رنا:مو الصبح جنت دايخه شويه فسحبته لغرفة البنات واتمددت واتصلت بدل ماابقى كاعده خاف ادوخ اكثر.
بقى خازرني بعدين كالت مرته:
حبوبه بعد لاتخلين التليفون بغرفتهن بنات مامتزوجات مايتخلى يمهن تليفون بالغرفه شنو وين كاعدين انوب بنات يخابرن بالتليفون.
باوعتلها كتلها:
ليش على كولتج وين كاعدين حتى المامتزوجه مايصير تستخدم التليفون؟انه جنت مامتزوجه وعندي تليفون بغرفتي واخابر واطلع وادوم واشتغل شنو المامتزوجه تكعد بسجن لازم؟
خزرتني كالت بعصبيه:
على كيفج حبوبه على كيفج اكلتينه وشربتينه انتي وحد انتي بت الافندي يمكن وانه ماادري بس هو مو صوجج صوج الزلم التدور هيج نسوان كعدة البيت تكرصها مايردون المستوره.
رديت عليها بعصبيه:
كتلها ماراح ارد عليج بنفس اسلوبج لان مره جبيره ولخاطر جواد وخالتي بس انه مستوره الحمدلله اكثر من هواي كاعدات بالبيوت ومسدود عليهن الباب وجواد لو ماشافني هيج مااتزوجني.
جواد ظل واكف مثل الطنطل بس يباوع مايحجي درت عليه خزرته ردته يحجي ماكو كالت هي:
جواد؟!! شهالميانه شنو جواد اصغر جهالج وتصيحيله جواد اسمه ابو محمد.
رنا:ابو محمد رجلج انتي انه رجلي اسمه جواد مكتوب اسمه بالعقد.
جواد واخير نطق ولو ضال ساكت احسنله:
يالله كافي هسه هالحجي ماله معنى ام محمد انتي تعبانه روحي كعدي وارتاحي وهسه رنا والبنات يسوونه عشا من هذا المعتبر...
فتحت عيوني عليه بعد فوك لسانها المثل السم وحجيها الخبيث يريدني اسويلها عشا
كتله بكلبي مدامها حيه اسويلها سم ان شاءالله مو عشا..
اخذها وراح هو وياها كعدوا بالصاله ظليت واكفه اباوع بوجه امه وخواته.
بعدين امه جرتني من ايدي للغرفه مال البنات وسدت الباب كالت:
مشكوره خاله نقذتيهن اليوم من جواد ومرته.
دارت على بناتها وعضت اصبعها كالت:
آاااخ منجن جم مره كايلتلجن التليفون خلنه بمكانه وخابرن بس يشوفه بغرفتجن يطيح حظجن مااتوبن ماتاخذن الحجي.
سلوى:يمه شمدرينه هالحيه اليوم راح تجي.
ام جواد:حتى لو ماتجي هو ماخذ الاوامر من عدها ومخلص مايحتاج تجي وتحجي هنا الا تسولنه مصيبه يالله ترتاحن.
رنا:شالقضيه خاله شنو بكيفها؟
ام جواد:كله بكيفها زلمه شكبره وشواربه تارسه وجهه وولده بطوله ويمشي بحجيها هالصفرا هاي.
استغربت معقوله جواد ماعنده شخصيه يم مرته؟
شو نافخ روحه يمي وانه وانه وافر البروانه شحده اليجاجيج ومرت جواد معقوله كل هذا بوخه؟!!
رنا:المن اتزوج شلون اتزوج اذا كله بكيفها؟
ام جواد:ملت من عنده من كدما يكول اريد اتزوج وقبلت مو ميته عليه وحطت عليه شروط اكيد مو هيج.
رنا:شروطيش؟
ام جواد:ماادري شروطيش لا انه ولا البنات اتدخلنه بينهم لان هي هالشفتيها ما عدها صاحب وخبيثه وكطعيه.
سلوى:هسه عرفتي ليش احنه مانكعد ونسولف وياج هههه.
رنا:لا والله ماعرفت.
نجوى:نخاف منج كلنه اذا هاي بت عمنه هيج يوميه مشيشته علينه وجاي كالب الدنيا انتي الغريبه شلون.
رنا:الحمدلله والشكر هذا هم حظي.
ام جواد:يالله هسه كومن بسرعه خل نسوي عشا كافي حجي.
رنا:ختولي بعد فوك لسانها نسويلها عشا؟
ام جواد:النه اول وتالي احنه هم نريد نتعشى.
رحنه للمطبخ وبدينه نسوي عشا بس انه كل شويه اروح اباوع على جواد ومرته اشوفهم شيسوون وتجي ام جواد تجرني من ايدي للمطبخ.
نجوى:تغارين؟
حسيت ضاك صدري من سؤالها عبالها احبه وميته عليه واغار ماتدري وصلت لدرجة حاولت انتحر حتى لااتزوجه.
بقيت ساكته ماادري شجاوبها.
ضحكت هي يمكن عبالها استحي اجاوبها بعدين كالت:
اكلج هو وين شافج وعرفج؟
التفتت امه تباوعلي كتلها:
ماكللكم هو؟
ام جواد:لا كال انه سألته منين مرتك بتمن كال ابوها صاحبي.
ضحكت نجوى اكيد تضحك غريبه يتزوج بت صاحبه.
رنا:تره ابوي اكبر من جواد بهواي مو عبالج بكده.
افكر بكلبي ماكايللهم على سالفة البيت لا واليضحك يكللهم بت صاحبي منين صاحبك وانت جنت مشتكي عليه وذبيته بالتوقيف مره ويوميه مودي علينه الشرطه للبيت...
بقت مرته عدنه اتعشت وراحت،جواد راح وداها لبيتها.
بقيت انه وامه وخواته نسولف عرفت هي واهلها ساكنين بمنطقه شعبيه حيل لذلك كل شي عدها عيب ومايصير لان عدهم عيب البنيه تخابر وعيب تطلع وعيب تشتغل وعيب تكمل دراسه وعيب تدخل كليه.
ومن كلامهن حسيت جواد يحسبلها حساب..
قبل لايرجع جواد صعدت لغرفتي غسلت واتمددت ظليت افكر يمكن هاي مرته مو هينه ويمكن تسويلي مشاكل.
مثل ماكالت امي لازم احاول اكسبه بس شلون اكسبه وانه مااطيقه..
كمت لبست واتمكيجت وكعدت انتظره يجي.
بس اجه سويت نفسي زعلانه ووجهي ثكيل عليه ولو انه صدك جنت مفروسه منه يعني مرته جان باقي بعد بس تحجي على شرفي وهو واكف مثل الطنطل يتفرج لايهش ولاينش لا وجماله اخذها وراح كعد وياها حتى ترتاح مدري من شنو تعبانه عجوز النار.
دخل شاك الحلك بابتسامه لعبت نفسي كتله بكلبي عابت هالكشره.
اجه كعد يمي وحضني دفعته:
جواد رجاءا عوفني ولاتحجي وياي.
جواد:اه ليش شكو؟
رنا:شكو؟شنو شكو مرتك هزئتني وهانتني بقى بس تحجي على شرفي وانت واكف تتفرج ولاحجيت ولافتحت حلك..
جواد:افه عليج شحده اليحجي عليج لو يهينج وانه موجود غير اكص لسانه.
رنا:يااا منو اللي جان واكف ويسمع ويغلس خيالي مو انت؟ماشفتك كصيت لسانها؟
جواد:منو كلج ماحجيت مو اله احجي كدامج حجيت وياها ورزلتها مو شفتيني اخذتها ورحنه كعدنه بحدنه؟
رنا:اي شفتك بس اخذتها لان خفت عليها من التعب عيني نازوكيه ماتتحمل وكفه وحجي بسرعه تتعب.
ضحك حيل بعدين كال:
اموت عليج من تصيرين عصبيه.
رنا:مبارك على حظي.
جواد:شبي حظج متزوجه جواد شتردين بعد اكثر.
كتله بكلبي:
عابت اي والله.
رنا:بس خابصني اليحجي وياج اكص لسانه واللي مدري شيسويلج مدري شسويله.
جواد:هاا هيج طلعت؟
رنا:ها هم كول جذب؟
جواد:هههه اوف منج ومن لسانج مو اكلج لسانج منشار هههه.
رنا:وخر وخر خليني انام نكدت علي مرتك وخربت مزاجي.
جواد:لا ماتنامين وانتي زعلانه.
رنا:عوفني جواد عفيه عوفني لان صدك قهرتني واكف متفرج.
جواد:صدك زعلانه طلعتي؟
رنا:لا جذب.
اتغطيت وانطيته ظهري.
ظل الليل كله يتوسل وكل شويه وباس راسي حتى ارضى.
كل مايسوي شي لو يكول شي اكرهه اكثر ماعنده شخصيه ولاعنده كرامه.
بعدين كلي:
رناوي صدك جنتي الصبح دايخه؟
كتله بدون مااباوعله:
يعني اجذب عليك؟
جواد:لاحشاج بس قصدي اذا تحسين بعد بدوخه كولي.
رنا:مابيه شي بس يمكن من الضوجه هم واحد مرات يتمرض من الحبسه من الضوجه والروتين والملل.
جواد:لا ان شاءالله مابيج شي بس اذا دختي كولي حتى اوديج للدكتوره.
غمزلي مافهمت شي كلت بكلبي شبي الرجال مستخف ياربي.
رنا:يادكتوره؟
جواد:خاف حامل شبيج.
وابتسم هالابتسامه اللي تسببلي ارتفاع بالضغط وحموضه بالمعده.
رنا:شبسرعه؟بعد وكت.
جواد:لا لا هم يالله يابعد وكت اريد ولد كون يشبهج.
رنا:مو عندك 4 ولد شنو شبع؟
جواد:ميخالف 2 ماينحسبون.
رنا:ليش مايتحسبون لان على كرسي؟تره مرات واحد عنده اعاقه احسن من 10 صاحين ومتعافين كول الحمدلله.
جواد:الحمدلله بس اريد بعد ولد مااريد بنات بس ولد كون.
رنا:ليش يابه ماتريد بنات شبيهن البنات؟
جواد:البنات اذيه ودوخه ومابيهن فايده.
رنا:مابيهن فايده؟شنو الفايده اللي تريدها يعني؟
جواد:هسه مااريد بنات وخلص..
رنا:يعني اذا صارت عدك بنيه شنو تذبها؟
جواد:لا اذا تشبهج شلون اذبها هههه.
رنا:هو بعد اللي شفته اليوم منك ومن مرتك بطلت انه هم مااريد بنات.
جواد:ليش؟
رنا:البنيه ممنوع تخابر وخواتك كلهن مامكملات دراسه على ابو كافي هيج وبنات الكليه سمعتهن مو زينه لا ومرتك سوتلها قصه شلون التليفون ساحبينه للغرفه شدعوه شصار؟
جواد:اي حجيها صدك البنات مو مال واحد يطيهن مجال حتى لايفسدن.
رنا:عيب شنو يفسدن اكو واحد يكول على اهله هيج؟بعدين قابل زغيرونات شو كلهن اكبر مني خواتك.
وكافي عليهن حبسة البيت صار شهر من اتزوجنه ماشفتهن طلعن لو احد زارهن لاصديقه لاشي.
جواد:مالج علاقه بيهن عوفيهن مثل ماهن خواتي وانه اعرف شلون اتعامل وياهن واذا صارت عدي بنيه نفس الشي هي هاي تربية البنات الصحيحه.
درت وجهي وانطيته ظهري وسويت نفسي نايمه.
بقيت افكر هذا صدك همجي ومعيدي وبت عمه لايكتله مثله.
بعدين ظليت افكر بمرته هاي مو سهله واكيد راح تكعدي مثل العظم بالبلعوم بكل شي تدخل.
انه عصبيه مااتحمل ومااعرف اجامل واللي يدوسلي على طرف مااسكتله يعني على هذا اسلوبها راح تصير مشاكل بينه خير من الله.
المشكله مو بيها المشكله بجواد مبين يريد خاطرها ويجوز يحبها وبهالحاله انه مجرد زوجه حلوه وزغيره لتفريغ الرغبات والكشخه كدام الناس.
اووف ربي شضامتلي الدنيا بعد من قهر وشضامتلي الناس من اذيه....
شوراك ياجواد؟