فقراء لم يخلقوا للحب

/2/

#فقراء_لم_يخلقوا_للحب_
ل: #روز_الفياض_
ج٢
فتحت الباب حيل وصرت بوجههم...
مااعرف منو بيهم المفوض اللي مخصصيله بيتنه لان كلهم لابسين زيتوني ومااعرف شنو معنى الرتب اللي على جتافاتهم.
سحبت امي من ايدها كتلها:
لاتتوسلين العنده غيره من كاعه مايحتاج احد يحشمه وينبهه ويتوسل بي..
التفتت عليهم كتلهم:
العنده غيره غيرته عالطفله قبل الجبيره.
همه ساكتين ويباوعولي وواحد منهم جان واكف وظهره الي ولامي التفتت خزرني وباوعلي من فوك ليجوه بعدين باوع لامي وكللها:
هاي بتج؟
امي جرتني من ايدي لوره الباب ومدت راسها الهم كلتله:
بتي الجبيره اعذرها على اسلوبها بس انقهرت.
رد على امي:
لاحقها معذوره ههه.
رجعت فتحت الباب كتله:
لاتعب نفسك ويوميه تجي ابوي وعدكم بالتوقيف معناها مالك شي هنا لان مانطلع من هالبيت ماعدنه مكان تفهمها لو اعيد بالبطيئ؟
صافن علي ومبتسم نص ابتسامه بعدين دار على جماعته باوعلهم وابتسم كللهم:
ها شتكولون؟تعيد لو افتهمتوا؟
ضحكوا رجع دار باوعلي كال:
نشوف بعدين شلون نتفق.
بس انتي فكري بالموضوع تطلعون من البيت لووووو؟
رنا:لو؟
امي:كافي رنا فوتي جوه عيب.
رنا:ماما هاي الناس مو مال عيب واحترام.
خزرني كلي:
لا مامقبلوه منج هاي مو تونه نكول لو؟
يالله عموما بعدين مو هسه نحجي بالاختيارات لو هيج لو هيج ماكو غيرهن ولازم تختارون.
امي:على بختك يمه وين نروح؟
كال:
كيفكم.
دار باوعلي وغمزلي وهو مبتسم وراح واشر لجماعته راحوا وراه.
بقينه انه وامي مره نبجي مره نحجي مره نفكر نريد نوصل لحل بهالمصيبه ماكو ماعدنه اي حل.
بليلتها بالليل من ناموا امي واخواني اخذت التليفون لغرفتي واتصلت بأرشد وحجيت وياه وطلعت القهر اللي بكلبي.
ارشد من النوع النظيف بتفكيره وآرائه ونظرته للناس من النوع الطيب وفقير مو من مثل باقي الشباب..
جان عاقل ومؤدب واول مااجه حجه وياي كلي:
آنسه رنا ممكن 10 دقايق من وقتج؟
باوعتله وضحكت لان هو جان ويايه صار اكثر من سنه عادي مابينه غير سلام وعليكم السلام رغم كل تصرفاته ونظراته الي جانت مفضوحه بس هو جان مايتجرأ يحجي وياي بصراحه.
جنه انه وصديقاتي متراهنين على لفة اذا اجه واعترف همه جانوا يكولون مايعترف شخصيته ضعيفه ويستحي ماعنده جرأه ويشوف هواي طلاب معجبين بيج احلى واحسن منه من ناحية الوضع المادي والاجتماعي فما يجازف.
بس انه جنت متأكده راح يجي وماراح يصبر اكثر لازم يتشجع بلحظه.
واجت اللحظه وضحكت كال:
ليش تضحكين اكو شي يضحك؟
رنا:10 دقايق؟مو جنك طماع؟
ارشد:زين نحجي ونشوف شكد نحتاج وقت يجوز مانطول بس دقيقتين.
رنا:يعتمد.
ارشد:على شنو؟
رنا:الموضوع اللي تريدني بي.
جان من النوع اللي جدا حنون وجدا صادق لدرجه تجلط اول ماصارحني بمشاعره
كلي:
معجب بيج حيل بس اكو مشكله.
رنا:وهي؟
ارشد:ابوي يريدلي بت عمي.
باوعتله ورفعت حاجبي وكتله بسخريه:
ابوك يريدلك بت عمك؟والله؟زين مدام تعرف هيج المن جاي تكلي معجب بيج حيل؟تريد تكضي وكت وياي يعني؟
ارشد:لا ابدا مو هذا قصدي ولاهاي نيتي قصدي شريف ونيتي صادقه بس انه مااحب اجذب واحب يكون كل شي واضح وتكونين على بينه.
رنا:هههه والله ماادري شحجي.امرك غريب شتريد هسه؟
ارشد:اريدج تنتظريني لحدما اتخرج واخلص من بت عمي واتقدملج.
رنا:لا بالله؟
ارشد:صعبه؟
رنا:ارشد انت خوش ولد وحباب ومؤدب وانه احترمك بس طلبك مو مقبول ومستحيل.
ارشد:ليش؟
رنا:شنو ليش؟انت كلي شنو السبب اللي يخليني اربط نفسي ويه واحد شبه خاطب ويمكن باجر تتخرج وتتزوج بت عمك وانه ابقى مركونه عالرف انتظر.شجابرني؟
ارشد:واذا كتلج ........
رنا:شنو؟
ارشد:احبج مو بس معجب بيج.
ظليت صافنه يعني انه هم معجبه بي هو حلو ومؤدب ومثقف ومختلف مو مثل البقيه بس مااتوقعت يحبني ولا اتوقعت لهدرجه جريء وصريح.
رنا:مااوعدك بشي ارشد حتى لو تحبني مااضمن ابقى انتظرك تخلص من بت عمك وحتى لو اكدر كرامتي ماتقبلها مستحيل اقبلها على نفسي ابقى انتظر واحد مايعرف باجر يكدر بخطبني لو مايكدر.حتى لو يحبني مااكدر.
ارشد:زين بدون وعود نبقى هيج قابل مادام عرفتي مشاعري خلص معناها وصلت للي اريده.
وبقينه هيج نحب بعض بس بدون احتكار رغم بقيت منتظرته بدون مااكله وبقى مافتح موضوع الزواج ويه اهله منتظر بت عمه تتزوج قبله حتى لايجي الرفض منه وتصير مشاكل بينه وبين ابوه وبين بيت عمه.
صحيح موقفه سلبي بس يمكن معذور مايريد يكسر كلمة ابوه.
وهاي جانت فرصه الي حتى اتعين واداوم واحسن وضعي ووضع اهلي لحدما يرتب هو وضعه ويتوظف.
كلما يتقدملي احد جنت اتحجج بالدراسه قبل وبعدين ظليت اتحجج بالشغل والوظيفه.
اتذكر اخر يوم دوام من اتخرجنه كعدنه وسولفنه عن وضعي وضعه بالبيت عن عوائلنه وكلي:
رنا لحد هسه احنه مقاومين او الاصح انتي مقاومه ادري هواي يتقدمولج واسمع بأذني هواي كلمات اعجاب من الطلاب بيج مالي حق امنعج من الزواج بغيري بس اتمنى تبقين منتظرتني ارتب وضعي هانت ان شاءالله مابقى شي.
هالحجي جان مو جديد علي دائما جان يعيده علي ولان ادري بي يحبني صدك جنت ابقى ساكته مااعترض ولا ارد اعرف نفسي احبه وراح ابقى منتظره بدون مايكلي وبدون مايطلب مني.
اتذكر جاوبته بكلمه وحده:
احبك.
ظل صافن علي لان اول مره اكولها اول مره يسمعها مني.
ابتسم واتنهد كلي:
يعني هسه وكتها؟4 سنوات وياج ماكلتيها الا هسه وين تردين توصلين؟
تربطيني حتى ماافكر بغيرج مثلا؟
بقيت ساكته ومبتسمه كال:
مايحتاج اصلا مامفكر بأي وحده قبلج ومستحيل افكر بوحده ثانيه بعدما حبيتج.
وهالكلمه هسه احسها مثل السيف..
سيف وخليتيه على ركبتي بكل لحظه تذبحني لحدما تصيرين الي.
ضحكت كتله:
شعر هذا لازم اسميك ارشد قباني.
بقينه نحب بعض بدون لقاءات وبدون تواصل دائم بس هالمره محتاجه احجي وياه وافضفضله يمكن يكدر ينطيني حل لمصيبة البيت يمكن يعرف احد ممكن يتوسطلنه او حل قانوني يخلينه نوصل لنتيجه.
حجينه وفضفضه لبعض بس ماوصلنه لحل..
ثاني يوم الصبح رحت للدوام كالمعتاد اجه السايق اخذني ورحت.
بعدين اجه المدير والتهيت بالشغل بس جنت متضايقه حيل ودمعتي بطرف عيني.
المدير انتبه مالي خلك وضايجه وسألني:
شبيج رنا اليوم مو على بعضج؟
رنا:مابيه شي استاذ سلامتك.
المدير:لا مبين اكو شي.
احجي يجوز اكدر اساعدج..
بقيت ساكته ومتردده احجي لو لا بعدين كلت صدك يجوز يكدر يساعدني خل احجيله قصة البيت.
كعدت عالكرسي مقابيله وحجيتله كل القصه.
بقى ساكت بعدين كال:
اذا على موضوع طلعت الوالد من التوقيف سهله هسه بتليفون واحد يطلع اعرف ناس تريد خاطري بعد أمري.
رنا:مشكور استاذ مايأمر عليك ظالم.
وفعلا اتصل على ضابط كدامي وانطاه اسم ابوي وكله:
هالموضوع اريده منك اليوم ينتهي مو باجر.
وفعلا رجعت للبيت لكيت ابوي راجع ومنتهيه القضيه والقاضي مطلعه.
ثاني يوم رحت اتشكرت منه واخذتله صحن فطاير امي سوتله.
رنا:مشكور استاذ ماقصرت الف شكر.
ابتسم كلي:
ان شاءالله هسه راضيه؟
رنا:الحمدلله وهاي صحن فطاير حاره من ايد الوالده ان شاءالله تعجبك.
مد ايده اخذ وحده وكلي:
رنا اذا اتقدملج واحد متزوج بس ماعنده اطفال واكبر منج بهواي وحالته الماديه ميسوره تقبلين؟؟
اتفاجأت وظليت مصدومه وساكته هاللحظه بالذات ماجنت اريدها تجي ولااريد امر بيها ولااريد هالموضوع ينفتح بيني وبينه لان كل الوضع يتخربط ويصير محرج ويمكن مو حلو.
شافني بقيت ساكته كلي:
شبيج خفتي وانخطف لونج؟تره انه مو كلش جبير هههه.
اخرسيت بلحظتها لساني الشطوله ماادري وين راح.
بقى يضحك على كيف بعدين كلي:
لا كافي شقى هسه نحجي جد.
اذا اتقدملج تقبلين؟
انه متزوج من زمان بس ماعندي اطفال وانتي خوش بنيه حلوه وحبابه مؤدبه وانه صار فتره افكر اتزوج بس مالكيت بنيه تناسبني بس من شفتج اول مره كلت هاي البنيه هي اللي اريدها.
هم ماحجيت بقيت اباوعله يحجي وانه كلبي معصور ليش ربي تحطني بهيج موقف رغم ادري كلش زين عينه مني من اول يوم بس مايوم قل ادبه وياي بكلمه لو تصرف لهذا السبب جنت احترمه حيل.
وهسه صرت بموقف محرج جدا..
شافني صافنه عليه كال:
احجيلج كلمه جامليني هههه.
بلعت ريكي واتشجعت كتله:
مشكور استاذ على كلامك وتفكيرك بيه وتكول شفتني البنيه اللي اناسبك هذا شي يفرحني لان انت شايفني انسانه لائقه اكون بهالمكانه عندك يعني الزوجه شريكة حياة وهذا شي جبير.
وبصراحه مااعرف شجاوبك انه جدا احترمك وانت ماقصرت وياي من اول يوم دوام مقدرني ومحترمني وتساعدني بكل طريقه ممكنه.
بس ...
سكتت ماعرفت شحجي بعد ماعندي عذر مو زغيره حتى اتحجج بحجة ماافكر بالزواج عمري 25 سنه ومتخرجه ومتوظفه شنو منتظره اكثر.
ماحبيت افشله وخفت من رد فعله وكسر خاطري.
راسأ جاوبني هو:
البس عوفيها هسه اخذي وقتج وفكري بالموضوع عدل وشاوري اهلج وبعدين نحجي ان شاءالله.
رنا:ان شاءالله.
خليت الصحن يمه عالمكتب وطلعت كعدت عل مكتبي ادك صفنات شجاوبه بالله شكله
لاعندي ابن عم واكله ابن عمي رايدني ولا انه بعدني طالبه واكله اريد اكمل دراستي ولامنتظره وظيفه مالي اي عذر ومااكدر اكله الصدك.
بقيت بيومها مشدوهه بالي مو يم شي وفكري مشغول حتى شغل ماكدرت اشتغل ارتبكت شسوي.
هو حس بيه كلي:
رنا اذا تعبانه روحي للبيت عوفي الشغل يولي.
انه هم ماصدكت كلي هيج اخذت جنطتي وطلعت لكيت السايق بره ينتظرني هو متصل بي حتى يوصلني للبيت.
طول الطريق وانه صافنه ليش ياربي ماسهلت امري وامر ارشد جان هسه احنه مخطوبين ومرتاحين.
وصلت للبيت ماحجيت شي لاهلي بقيت ساكته وافكر بحل.
اهلي لو عرفوا راح يوافقون رأسا السالفه بيها فلوس وهذا مدير عام صيت ونسب.
مااتغديت عفتهم يتغدون واخذت التليفون لغرفتي اتصلت على ارشد طلعت بنيه سألتها عنه كالت بالدوام بعده مارجع.
بقيت متوتره محتاره اسألمن؟ واخذ رأيمن؟ ومنو اللي ينصحني بدون انحياز وطمع؟
نمت غفيت ...
العصر كعدت راسي يوجعني باوعت مالكيت التليفون يمي طلعت للهول شفت امي تحجي ويه مدرسه وياها.
كعدت يمها انتظر تسده حتى ارجع اتصل بأرشد.
خلصت واخذته ورحت للغرفه وسديت الباب توني اريد اتصل دك التليفون ارشد:
الو
رنا:الو هلو.
ارشد:هلوات اليوم منين طالعه الشمس؟
رنا:شدعوه مو قبل يومين اتصلت بيك.لو قبل يوم مااتذكر.
ارشد:المفروض يوميه.
رنا:لا شنو نسيت احنه مابينه مفروض؟
ارشد:مااكدر.
سكتت منين مابينه مفروض ومنين انه متصله بي اريد اكله تره مديري خطبني؟