فقراء لم يخلقوا للحب

/10/

#فقراء_لم_يخلقوا_للحب_
ل: #روز_الفياض_
ج١٠
مرت الايام وانه محتاره مابين جواد وقهره هو واهله ومابين ارشد اللي مااعرف شبي وليش يلومني من يوم الحنه بالليل بعد ماعرفت اخباره.
وجواد جان ماكل راسي على ولد عبالك مدري شكد صارلنه متزوجين هن كلهن شهرين جنت اخابر صاحباتي لبني وساره واشتكيلهن يكلي صبري واتحملي هو هذا الزواج اول وتالي تتعودين عليه.
جنت اسألهن عن ارشد واخباره يكولن ماعدهن علم ومايعرفن عنه شي.
حجيتلهن مره شكلي اخر مره من اتصل بليلة الحنه وشلون ذب الصوج بيه.
ساره:حبيبتي انسيه انتي هسه متزوجه بعد هالحجي مايفيدج حرام تفكرين بغير رجلج.
رنا:ليش؟قابل شمسويه؟حتى التفكير حرام؟قابل بكيفي احبه وافكر بي؟
ساره:والله ماادري يارنا شكلج انتي قصتج معقده ومالها حل.
بس اكلج خافي الله بالرجال اللي شايله اسمه حتى لو مو زين مايصير تحبين غيره.
حجيها حسسني بتأنيب الضمير بسبب حبي لارشد بس مو بيدي مو بيكفي احبه الله مبتليني شسوي.
ولبني من حجيت وياها كلتلي:
خيولي مو هو اللي كلج بت عمي اوله بيه؟
المن جاي يلومج هسه؟
مو اتصلتي بي كم مره ومارجع اتصل؟
خيولي.
رنا:لبنى احبه.
لبني:حبتج حيه.
رنا:زين انتي سأليه ليش هيج كال؟
لبنى:لو تموتين مااخابره انتي ماعندج كرامه؟واحد مارادني اتصل بي وأسال عليه ليش؟
رنا:مااريد منه شي والله بس اريد اعرف ليش هيج سوه كلبي كارصني.
لبنى:كتلج خل يولي مااتصل.
ماقبلت لبنى تتصل بأرشد وتجيبلي اخباره وساره كلما كتلها كالت انتي متزوجه حرام.
عبالك انه رجعتله لو مدري شسويت وياه انه ردت بس اعرف شبي..
بهالفتره انه جنت ماخذه احتياطاتي من سالفة الحمل مااريد من جواد اطفال عالاقل هسه بعدني مااعرفه عدل ومن البدايه معرفته ماتبشر بخير.
كل فتره جانت تجي مرته ومن تجي تعفس البيت وتروح.. جواد يتخبل علينه ويسويله مشكله من اتفه الاسباب وبالنهايه لازم يضرب احد يالله يرتاح.
مره سلوى مره نجوى مره اخته الزغيره روئ وكل كتله جان يكسرهن وانه وامه هم تلوحنه جم كفخه لان نحجز بينهم ونجره منهن.
مرت الاشهر على هاي الحاله وانه كل يوم اكرهه اكثر من اللي قبله.
وكل يوم ملحته تزيد على موضوع الولد.. وانه مغلسه.
وخلال هالفتره امي جانت تتوسل بجواد حتى يخليني ارجع للدوام لان الراتب مايكفيهم والعيشه صعبه وجواد معاند مايقبل.
وره 6 شهور من زواجي اتصلت بيه ساره حجينه وسولفنه عادي بعدين كالت:
رنا منو يمج؟
انه جنت كاعده جوه بالهول وام جواد وخواته يمي بس مااكدر اكللها همه يمي.
رنا:محد.
ساره:تمام.اريد اكلج شي بس كلت تكونين بحدج احسن.
رنا:كولي اسمعج.
ساره:عرفت فد شي عن ارشد.
رنا:اي كولي شنو؟
ساره:فعلا طلع رايح يخطب بت عمه قبل زواجج من جواد.
حسيت بألم بكلبي رغم هذا الشي االي جنت اعرفه من وقتها مو جديد بس لان جان عندي امل انه ماخاني ومافضل بت عمه علي لاخر لحظه فحسيت خيبه امل جبيره ومو طبيعيه مثل مايكولون.
لدرجه صدك حسيت نفسي دخت اترخصت منها وسديت التليفون.
اتمددت وخليت راسي على رجل ام جواد.
ام جواد:شبيج؟
غمضت عيوني حتى لاتطيح دموع وتفضحني.
رنا:مابيه.
ام جواد:نعستي شنو؟
هزيت راسي لا اختنك بدموعي بلعت ريكي وكتلها كوه:
دخت.
ام جواد:خاف حامل.
هزيت راسي لا.
ظلت تلعب بشعري لحدما غفيت.
حلمت نفسي صاعده بسياره والسياره تمشي وكبالي ارشد بس مايحاجيني بعدين اختفى وبقيت بس انه بالسياره كاعده بحدي ادور ناس اعرفهم ماكو محد بس انه.
فزيت على صوت جواد يصيح.
عرفته جان عد مرته..
جواد:نايمه؟
ام جواد:تكول دخت.
كعدت عدل كعد يمي كال:
خاف حامل.
هزيت راسي لا.
صعدت للغرفه وصعد وراي واكل راسي خاف حامل وخاف حامل.
رنا:جواد لاتلح مالي خلك.
جواد:ولج اكلج خاف حامل.
رنا:كتلك لا.
جواد:شمدريج؟
رنا:اعرف نفسي.
جواد:اردي شو طولتيها مو كنالج نريد ولد شوكت يجي.
رنا:شعندك مستعجل.
شوكت ماشافني كلي شوكت تجيبن الولد عبالك الولد لو البنيه بيدي.
جنت ادعي ليل ونهار مايصير حمل رغم انه ماخذه احتياطي بس كل شي يصير.
وفعلا ثاني يوم اخذني للدكتوره وطلعت حامل!!
سودت الدنيا بعيني جنت متأمله اخلص من جواد بيوم من الايام بدون مااتورط بطفل يشلع كلبي ويكسر ظهري ويربطني بي.
بيومها جواد عنده عيد.
جواد:هاي اجه الولد هههه اذا طلع ولد شتردين طلبي.
رنا:واذا بنيه؟
جواد:فال الله ولافالج
رنا:صدك تحجي؟هاي طفله ونعمه.
جواد:مااريدها
كتله بكلبي رادتك ريده اكو واحد هيج يحجي على طفله بته..
دخلت بفترة كآبه مو طبيعي جنت 24 ساعه ابجي.
مخنوكه وحاسه نفسي بسجن وكل يوم يمر جان وضعي يصير اسوء من اللي قبله.
جواد جان ملتهي بشغله ومشاكله ويه اهله ومرته.
وانه مليت من هالعائله الماتخلص مشاكلهم وجوهم كئيب.
جنت اتمنى يقبل جواد ارجع للوظيفه بس مايقبل.
من تجي مرته جنت ماانزل ولا اسلم عليها ولااريد اشوفها اصلا.
وهو جان يكلي احسن ابقي ارتاحي لاتنزلين وخاف تنغثين ومو زين عالولد.
ماجان عنده موضوع ثاني غير الولد.
ظليت ماانزل جوه حتى يم امه وخواته ماانزل كل الوقت بالغرفه.
جابلي تلفزيون بغرفتي حتى مااضوج.
اهلي ماظليت اروحلهم امي وخواتي مرات هن يجن يشوفني.
خوات جواد صارن يحبني ويجن يمي بالغرفه من يكون طالع وامه خوش انسانه جانت معتبرتني حالي حال بناتها.
جنت انقهر عليها بس هالولد عدها ومابي خير ولابي محنه.
دخلت بالشهر الثالث وشويه بينت بطني وجان مسيطر علي وسواس مو طبيعي انه رايح يصير عندي ولد وراح يكون عنده اعاقه مثل ولد جواد.
جنت افكر هذا انتقام الله من جواد يمكن يبتلي بولده مايستفاد منهم بس تعب مثل ماامه مامستفاده من عنده وماجايبلها بس التعب والقهر والمغثه.
جان ينطيني مصرف بس ماينطي خواته ولا امه ومن جنت اسأله يكول هن وين طالعات.
كل موضوع وكل صفه اكتشفها بي تكرهني بي.
ظليت كلما ينطيني مصرف اقسمه نصين نص لامه ونص لامي حتى اخلص من شكاويهن اثنينهن.
ذاك اليوم جان يوم جمعه وجواد جايب سمج علمودي.
بيومها متت من ريحة السمج رغم شكد مشتهيته.
قبل الغدا بشويه قررت انزل اتغدى وياهم مليت من الكعده بحدي بالغرفه.
نزلت وسمعت جرس الباب راح جواد يفتحه وانه كعدت يم البنات بغرفتهن.
سمعت صوت سلام وشلونكم وشخباركم بس ماكمت بقيت نايمه بغرفة البنات.
جانت كاعده يمي سلوى وكل شويه تكلي:
عفيه من يتحرك كليلي.
رنا:ليش؟
سلوى:اريد اخلي ايدي اريد احس بحركته.
رنا:مالي خلك سلوى.
سلوى:شبيج كله ضايجه ومكتئبه الحامل اول مره تفرح بس انتي ضايجه.
ماسيطرت على دموعي ظلن ينزلن وحده وره الثانيه.
سلوى:انتي ماتردين الطفل؟
ماكدرت احجي بعد شحجي وشكول..
ردت اغير الموضوع اخذت ايدها خليتها على بطني..
رنا:حسيتي بي؟
هو اصلا ماجان اكو اي حركه بس حتى اغير الموضوع.
شويه ودخل ابن جواد الزغير سلم علينه وبقى كاعد يمنه شويه.
سلوى:حسين منو جاي وياك؟
حسين:كل احنه اجينه.
ضاك صدري لو ادري مانازله مالي خلك مغثة امه.
بقى كاعد يمنه شويه وسلوى كل شويه وخلت ايدها على بطني.
سلوى:ماكو شي مايتحرك،اتحرك عفيه اتحرك انه عمتك واحبك ولك.
اتحرك لخاطري.
ضحكت عليها كتلها:
شبيج بعد وكت مايتحرك هسه خالتي تكول من ادخل بالرابع يالله تبين حركته.
سلوى:يعني تضحكين علي تكليلي اتحرك؟
رنا:هههه شسويلج كسرتي خاطري.
كام حسين طلع وبقينه انه وسلوى نسولف.
شويه واجت ام محمد مرت جواد دخلت علينه سلمت عشتوا من بعيد وظلت واكفه تباوعلنه.
احنه ردينه وغلسنه سكتنه كمت انه عالمرايه رفعت شعري حتى اروح اتغدى لان جنت فاتحته.
انتبهت على ام محمد تباوعلي من فوك ليجوه وتباوع لبطني.
ماحاجيتها غلست.
طلعت رحت كعدت بالهول واتجمعوا كلهم حتى نتغدى.
اجه جواد كعد يمي بس حسيته يريد يحجي شي.
رنا:شبيك؟
جواد:مابيه.
سكتت منه مالي خلك.
شويه ودنك يم اذاني كلي بصوت ناصي:
رنا.
رنا:ها؟
جواد:اكلج عود لاتكولين كدام ام محمد انتي حامل.
رنا:ليش؟هي ماتعرف؟
جواد:لا ماتدري انه ماكتلها.
رنا:ليش؟
جواد:احسن احسن مااريد احد يعرف لحدما يثبت ويطلع ولد يالله.
رنا:والله موتتني بسالفة الولد كرهت حتى الولد من وراك.
جواد:افتهمتي مو تكولين.
رنا:خوش.
خلوا الاكل وبدينه ناكل جنت كوه اكل كوه متحمله الريحه.
جواد كل شويه يأشرلي اكلي بدون مايحجي.
اكلت شويه وكمت خفت اكل اكثر تلعب نفسي واتقيئ اللي اكلته غسلت ورجعت كعدت يمهم.
شفت مرته عافت السمج والتهت تفصخ الراس.
اباوعلها آفه مو مره كرطت الراس كرط عبالك عجايز قبل.
لعبت نفسي كلللش كوه اتحملت كمت رحت كعدت بغرفة البنات كبل اتقيئ.
خصلوا وسووا جاي وجابتلي نجوى جاي للغرفه واجن البنات وبقينه كاعدين بالغرفه نشرب جاي ونسولف.
دخلت ام محمد كوبها مال الجاي بيدها كعدت يمنه تشرب جاي.
سكتن البنات وانه هم سكتت.
تشرب جاي وتطلع صوت تشفطه شفط وانه معدتي مكلوبه.
ام محمد:وجهج اصفر؟
رنا:مريضه.
ام محمد:شبيج مريضه صايره جنج فيل.
باوعت عليها كتلها:
خيعون الفيل اذا جسمه مثلي جان ضربوا المثل برشاقته بدل الغزال.
ام محمد:هههههه صدك؟
رنا:وداعتج
ام محمد:يالله همه العراقيين يموتون عالفياله.
رنا:تره انه طويله يعني اذا عندي وزن زايد مايبين بس وزني 67يعني كلش طبيعي ومناسب لطولي.
ام محمد:والله فارغه تقيسين وزنج وتقيسين طولج.
اجيت اكللها من رحت للدكتوره قاست وزني بس اتذكرت جواد كلي لاتحجين.
رجعت تشرب جاي وتشفط.
مااتحملت بعد اكثر كمت بسرعه للحمام اتقيأت الاكلته كله.
بقيت كاعده بالحمام مااكدر اتحرك.
اجت وراي نجوى غسلت وجهي وطلعتني رجعتني للغرفه.
ام محمد:شبيج؟لعبت نفسج؟
ماحاجيتها روحي طالعه.
سلوى:نامي نامي وارتاحي شاكلتي انتي حتى تتقيأين هن لكمتين.
ام محمد:خاف مستبرده؟
حسيتها تريدني اكللها حامل ولو علي اكللها واضوجها بس جواد مايقبل.
والبنات هم ماحجن يمكن هم موصيهن.
بقت واكفه على راسي متجتفه وتباوعلي.
بعدين كالت:
متعافيه مدري ماماكله سمج كبل؟حقج.
حسيت بعد مااكدر اتحملها كعدت عدل كتلها:
روحي من وجهي... جواااد... جواد.
اجه جواد يركض كال:
شكو؟
رنا:اخذ مرتك من يمي تره والله ابتلي بيها.
ام محمد:على كيفج حبوبه على كيفج شكنالج؟
جواد:شبيجن؟
ام محمد:شبينه حبوبي المدلله تدلع حامل وماتكول خااف نحسدها مدري ماتريدني اعرف.
جواد انصدم باوعلي وبقى ساكت.
ام جواد:تعبانه خاله البنيه تعبانه وانتي تلحين عليها بالحجي.
ام محمد:هااا شو ساكت وينه الحجي؟ وينه الاتفاق؟احنه شمتفقين؟
جواد وجهه ظل ينطي الوان.