فقراء لم يخلقوا للحب

/12/

#فقراء_لم_يخلقوا_للحب_
ل: #روز_الفياض_
ج١٢
ظليت واكفه متحنطه بمكاني..
اخاف التفت..
كال:
نعم؟
بلعت ريكي ودرت على كيف وماادري بالضبط شنو اتمنى.
اتمنى اشوفه؟
لو مااتمنى اشوفه...؟
رفعت راسي باوعتله شاب لابس قميص نيلي وبنطرون اسود.
طوله زين واسمراني ظليت صافنه بوجهه رغم الخوف اللي جنت حاسه بي لان جنت متوقعه التفت اشوف ارشد بس حسيت بخيبة امل لان مو هو.
كال:
اتفضلي اختي؟
رنا:أاا.. أااا...
ظليت مااعرف احجي من ارتباكي بعدين سكتت شويه وضحكت من فشلتي.
رنا:استاذ بشار موجود؟
كال:موجود بس مشغول.
رنا:بس كله رنا.
كال:هسه مشغول مااكدر.
رنا:اوكي مااريد ادخل بس كله رنا.
تأفف وسكت شويه بعدين كال:
ميخالف هسه اكله اتفضلي استريحي.
كعدت عالكرسي انتظر على مضض حتى ظهري ظل يأذيني على كدما كعدت لان اصلا انه جنت كاعده قبلها تقريبا ساعه الا ربع. 
هو يكتب وانه اباوعله عبالي ارشد من سمعت صوته خرش كلبي..
هم مثله اسمراني وماشاءالله طوله حلو بس مايشبه ارشد ..
ارشد احلى..
بعدين انتبهت على نفسي صافنه عليه درت وجهي كلت فشله يرفع راسه وينتبهلي ظليت كاعده وافكر بأرشد..
ياترى مرتاح وسعيد بحياته وزواجه من بت عمه؟؟
يتذكرني؟؟
يجوز يتذكرني ويضحك يكول هاي الغبيه الثوله اللي ضحكت عليها وظلت منتظرتني سنين وبعدين اتزوجت بت عمي.
شكول عليك ياارشد كرهتني بكل المشاعر الحلوه اللي جنت عايشتها وانه احبك ومنتظرتك وكلي امل.
المصيبه لاخر لحظه جنت مفكرتك انسان نظيف ونزيه ومؤدب وثقه وتحبني صدك ماجنت متخيله تطلع تلعب علي.
تطلع من هاي الشباب اللي ماتخاف الله يلعبون على بنات الناس ومن يوصل الموضوع للزواج يرجعون لبنات العائله او اي وحده تختارها امهاتهم.
مع الاسف عليك..
مع كل الاسف..
انتبهت عالسكرتير يحاجيني وانه صافنه.
جريت روحي جر من الذكريات والصفنه وهزيت راسي:
شنو؟
كال:
شنو اكله؟
مافهمت شي لان جنت صافنه كتله:
منو؟
كال:
المدير مو تردين تقابلينه؟
شنو اكله؟
منو انتي؟
رنا:رنا..رنا كله اجت.
كام راح لمكتب المدير دك الباب ودخل.
بقيت بره انتظر وره عشر دقايق طلع كلي:
اتفضلي.
كمت اريد ادخل وكلبي يدك حيل من المستحه والخجل والخوف.
انتبهت عالسكرتير يباوعلي بأهتمام.
دكيت الباب ودخلت لمكتب استاذ بشار.
اول مافتحت الباب حسيت برهبه للمكان حسيت إلي بي ذكريات حلوه وحسيت فعلا انه داخله على مدير عام اله هيبته وحضوره.
بس دخلت وشافني كام وكفلي ...
سلمت عليه ورحب بيه..
وكعد يسألني عن احوالي واخباري واموري وانه اجاوبه.
استاذ بشار:وهسه؟
رنا:هسه شنو؟
استاذ بشار:هسه شنو ناويه تسوين؟
رنا:اشتغل ارجع اداوم.
بشار:وبعدين؟
رنا:وبعدين ناويه ارفع قضيه على جواد اريد اتطلك مااكدر اتحمله بعد اكثر من هيج اريد اخلص اريد ارتاح احس نفسي بدوامه بكابوس مسببلي كآبه امرضني مجرد مااتذكره اكتئب.
ضحك على كيف وكال:
الله يساعدج،معناها جايه اتطالبين بوظيفتج مو صح؟
رنا:اذا ممكن؟
بشار:ممكن وتدللين.
صح عندي سكرتير شاطر بس مو اشطر منج عصام خوش ولد بس هذا مكانج وانه منطيج وعد سابقا.
رنا:يعني؟
بشار:يعني تكدرين تداومين شوكت مايعجبج.
رنا:شكرا جزيلا استاذ.
سلمت عليه واتشكرت منه وطلعت وانه جدا فرحانه ومتشوقه شوكت ارجع ادوام.
رجعت للبيت وانه طايره اريد اجمع مبلغ زين حتى اوكل محامي واخلص من جواد ومغثة جواد.
وفعلا رجعت داومت بوظيفتي لكن عصام هم بقى ما غيروا المسمى الوظيفي مالته ولا مكانه هم بقى سكرتير.
جان تعامله وياي جاف احسه ولاحظت منه نظرات ماحبيتها.
ومن اسأله على حاجه او شغله او موضوع احسه يظل يلف ويدور ومايريد يجاوب بالمختصر جنت احسه نحيس.
بديت اتجنبه واعامله بالمثل مثلما يعاملني لااكثر ولااقل.
جنت اضوج منه مو لان نحيس ومو متعاون لا بس جنت اضوج منه لان كلما يحجي افزع اتصوره ارشد.
من يدخل للمكتب اتصور ارشد نفس طوله نفس سماره.
فد يوم جنت مالي خلك لان ثاني يوم جانت عندي جلسة محكمه علمود قضيه طلاكي من جواد.
جنت خايفه وضايجه لان انحسب علي زواج بذاك الوقت الناس جانت فقيره ماديا فالاغلبيه جانت ماتكدر تتزوج خصوصا الشباب وجانت الي تطلك بذاك الوقت تبقى بعد بدون زواج لان اصلا البنات وكوه الشباب منين تجيب مهر ومصاريف زواج شحال بعد المطلقه..
وجنت خايفه من استاذ بشار يرجع يفتح وياي موضوع الزواج وهالمره شنو عذري لان اصلا كرهت الزواج كله..
افكار اشكال والوان براسي وصافنه وكلي عصام:
رنا استاذ بشار يريدج.
كمت رحت لاستاذ بشار ورجعت ادور على اوراق بمكتبي بس مالكيتها.
ماانتبهت لنفسي كلت لعصام:
ارشد ماشفت اوراق المشروع اللي جابوها قبل شويه من التدقيق؟؟
عصام:ياارشد هذا؟
رفعت راسي باوعتله استغربت كتله:
هااا؟
عصام:انتي تكولين ارشد.
رنا:ياارشد غلطت قصدت عصام.
عصام:يالله نفس الشي اخوي هم اسمه ارشد.
من كلي هالجمله حسيت ماادري شحسيت هو خوف هو ارتباك هو لهفه وفضول؟؟
ماادري بس فكري اتشتت.
بقيت طول اليوم سرحانه صافنه وافكر معقوله عصام اخو ارشد؟
اي ليش لا نفس السمار نفس الصوت ونفس الطول.
على طرف اريد لساني اسأله بس اتراجع اذا طلع اخوه معناها لهذا السبب نحيس وخبيث واحتمال يطلع حقير ونذل مثل اخوه خليني بعيده عنه وعن اخوه احسنلي.
ثاني يوم ماداومت جنت مستأذنه من المدير لان عندي جلسة محكمه.
الحمدلله وراها بفتره اتطلكت من جواد وخلصت من مثغته.
استاذ بشار جان عادي وياي مثل الاول واكثر حسيته مقهور علي وعاللي صار وياي بس عصام جان يغار.
عصام:اكلج شنو طبيعة علاقتج باستاذ بشار؟
رنا:شلون يعني طبيعة علاقتي مافهمت؟
عصام:يعني احسه مهتم بيج.
رنا:طبيعي صار كم سنه انه اشتغل وياه واعرفه طبيعي يعزني ويحترمني.
عصام:وانه هم صارلي سنه ونص وياه بس مايعاملني مثلج ليش؟
رنا:شلون يعني؟
عصام:انتي منتبهتله من يشوفج شلون يبتسم ابتسامه شكبرها؟
ضحكت على كيف كتله:
تره انه بنيه طبيعي يعاملني بذوق ولطف.
سكت ماحجه.
وراها بكم يوم واحنه نتغدا سألته:
عصام متزوج؟
ابتسم ابتسامه خبيثه يمكن عباله معجبه بي بس انه الصدك جنت اريد اعرف هو ارشد اخوه نفسه ارشد اللي اعرفه لو غيره..
عصام:لا مامتزوج.
رنا:شعجب.
عصام:قريبا ان شاءالله خل يتزوج اخوي الجبير وبعدين انه وراه.
رنا:عندك اخوان اكبر منك؟
عصام:ارشد اخوي الجبير.
حسيت نفسي احتريت من سمعت اسمه وبقيت ساكته ماادري شحجي.
عصام:شبيج سكتي؟ماتردين تعرفين تفاصيل اكثر؟
رنا:تفاصيل شنو؟
عصام:عن ارشد؟
رنا:لا ليش اريد اعرف عن اخوك تفاصيل؟ اخوك لو اخوي هو؟
عصام:لااخوي ... اللي جان يحبج وخنتيه.
حجايته هاي حسيتها سجينه بكلبي.
ظليت ساكته اباوعله مامصدكه اللي سمعته ظلت عيوني تمطر دمع.
عصام:ليش تبجين مو انتي اتخليتي عنه؟
ظليت ابجي حيل لان اكو شي غلط بالموضوع ومااعرفه شنو.
مسحت دموعي ورحت للمدير استأذنت وطلعت للبيت.
خلصت يومي بجي ونوم.
منين طلعلي هذا؟
شجابه علي؟
وانه اكول نفس الصوت ونفس الطول ونفس اللئم ..
شلون اتعامل وياه بعد الكلام اللي كاله؟
شلون احجي وياه؟
اكيد ينقل اخباري لاخوه النذل.
ياربي ليش تسوي بيه هيج مامأذيه بشر بحياتي ليش تأذيني؟
ثاني يوم رحت للدوام كوه كرهت حتى الدوام من وراهم هو واخوه.
بس دخلت ابتسم ورفع حواجبه.
اتصرفت عادي وكأنه ماسامعه شي منه.
بعدين كال:
ضجتي البارحه من حجيي وياج؟
هزيت راسي لا بدون مااباوعله.
عصام:لاضجتي.بس مافكرتي بارشد من عفتيه شكد اتأذى؟
مافكرتي حارب اهله علمودج؟
مافكرتي ظل جم سنه مايقبل يتزوج حتى مايتزوج بت عمه علمودج مايريد غيرج؟
تالي عفتيه واتزوجتي واحد ثاني.
هو يحجي وانه كوه لازمه نفسي حتى لااصيح واغلط بس دموعي ماكدرت اسيطر عليها بعدين كتله:
انت ماتدري شنو الموضوع فلا تحكم علي مو انه العفت اخوك علمود واحد ثاني..
سكتت شويه جريت نفس ومسحت دموعي بعدين حاولت اهدأ حتى مااعلي صوتي واحجي بعصبيه.
رنا:اخوك هو اللي تركني علمود بت عمه هو اللي من اول موقف احتاجيته بيه اتخلى عني وكلي بت عمي اوله بيه منج وسد التليفون بوجهي..
رجعت بجيت وكتله:
ايام وانه انتظر منه يتصل وكلما اتصل يكلولي ماموجود واكللهم كلوله رنا اتصلت بس مايتصل اتمنيت بس يتصل وابقى انتظره لاخر عمري بس ماعبر ولااتصل ولافكر يتصل يتطمن علي رغم جنت امر بظروف صعبه.
اتخلى عني باصعب وقت.
مااتخليت عنه وماعفته ابد حتى حاولت انتحر حتى مااتزوج غيره وهو ولا يدري ولا حس بس خابر رزلني ولامني رغم هو الغلطان بحقي هو اللي اتخلى عني يوميه واحد داك بابي يريد يخطبني ومااقبل لان منتظرته بس شجازاني كلي بت عمي اوله بيه منج..
لهنا وسكتت مااكدر احجي بعد ولا اكدر الوم واعاتب بقيت كاعده وامسح دموعي وهو سكت ماحجه اي شي بعد.
دخل استاذ بشار شافني ابجي صاحلي بمكتبه سألني كتله تعبانه.
انطاني اجازه يومين فعلا جنت محتاجه اجازه بعد هالحجي.
بقيت بالبيت يومين مالي خلك الدنيا حتى اكل ماآكل صار عندي هبوط حاد بالضغط شكلولي بطلين مغذي يالله شويه اتعدل ضغطي.
ثاني يوم داومت ايدي بيها كانونه.
دخلت سلمت بهدوء وكعدت على مكتبي حسيت عصام يباوعلي بس ماباوعتله.
عصام:الحمدلله عالسلامه.
رنا:الله يسلمك.
بقيت اكلب بالاوراق كدامي مارفعت راسي ولاباوعتله.
حسيته اجه كعد عالكرسي كبالي ضجت لان مالي خلك احجي بنفس الموضوع.
كال:
الحمدلله عالسلامه.
ابتسمت شويه وبقيت ساكته لان توه كلي الحمدلله عالسلامه.
كال:
رنا شلونج؟
بقيت مدنكه لان حاصرتني البجيه وصوته يموتني كتله:
عصام لخاطر الله عوفني بحالي مالي خلك احجي بهالموضوع بعد كافي اللي صار قبل وهسه.
كال:
من كل عقلج صدكتي حجيي؟
شفت بطرف عيني عصام كاعد على مكتبه..
كلبي حسيته ظل يدك بصوره مو طبيعيه اريد الحك اتنفس مااكدر.
اخاف ارفع عيني..
اخاف اشوف شي ماجابلي بس القهر والاذيه.
بقيت ساكته ماجاوبت.
كال:
شلون صدكتي من كتلج بت عمي اوله بيه؟؟
بقيت ساكته ومخنوكه وخايفه حسيت نفسي مثل الصنم مااكدر اتحرك اريد ارفع عيني اشوفه هو لو لا مااكدر..
ماعندي اي رد عليه بس الدموع.
شكد حاولت اقاوم دموعي بس ماكدرت الى ان هو كلي:
رنا احاجيج؟باوعيلي..
رفعت راسي مامصدكه عيوني هذا حبيبي هذا ارشد اللي عافني وراح لبت عمه هذا اللي جنت منتظرته وباعني وهذا اللي ماحبيت غيره.
لحد امس جنت اكول كرهته وادعي عليه هسه طلع جذب كله جذب.
حجي لسان هذا مو من كلبي..
احبه لهسه..
ماكدرت احجي بس ابجي وكوه لازمه نفسي لااشهك.