فقراء لم يخلقوا للحب

/7/

#فقراء_لم_يخلقوا_للحب_
ل: #روز_الفياض_
ج٧
يحجي الدكتور ويسأل ومالي خلك اجاوب اتذكرت شربت طبقة البراسيتول.
مامتت ...
مامتت...
حتى الموت هم مايريد يحن علي ويرحمني ...
ظلت دموعي تنزل بهدوء...
شويه وسمعت صوت جواد دخل للغرفه ضاك صدري درت وجهي ونمت عالجهه الثانيه.
يسأل امي وابوي شكو وشصاير همه يكلوله مانعرف.
اجه دار يمي كعد ماباوعتله غمضت عيوني مااريد اشوفه خله ايده على خدي كشيت.
جواد:رنا شبيج؟منو وياج؟ياهو المزعلج؟
ساكته مااشتهي احجي ويه احد وخصوصا هو.
جواد:ياهو غاثها اكيد واحد غاثها ومزعلها.
يسأل امي.
امي:لا والله بحدها فجأه ماادري شصارلها رجعت من الدوام مابيها شي.
جواد:رناا... رناا ... حاجيني شبيج؟كولي منو غاثج؟اكو احد غاثج مسمعج حجايه بالدوام؟ كولي وانه اطيح حظه وحظ الخلفه.
ظلوا يحجون ويلحون ويسألون وانه ساكته بعدين جواد لملم الموضوع ويه الشرطه وانسد الموضوع.
والدكتور كتبلي خروج وطلعنه للبيت..
البيت الي صرت احسه كبر .. كرهته والشارع عندي ارحم.
هذا هو ثمن حياتي جم طابوكه..
بقى جواد عدنه يمكن للساعه ب2 بالليل يالله راح.
شكد لح وشكد حجه وشكد سأل.
كاعد يمي بالغرفه ويحجي:
فهميني شبيج؟ شسمه الضوجج؟
صرت عصبيه واتمنيت اكله انت..
انت مااحبك ولا اريدك بس لان اخذت بيتنه بالواسطات وجان عندك استعداد تشمرنه بالشارع انجبرت اقبل بيك.
بس ماكلت وماادري شنو عذري كدامهم شكول شبيه؟
شيصير ربي لو رحمتني وموتتني؟شيصير ؟؟
رنا:مابيه شي ومحد غاثني.
جواد:جا المن شربتي الحبوب؟
رنا:راسي يوجعني موتني اخذت 2 مافاد رجعت اخذت 2 هم مافاد كملت الباقي بلكي الصداع يروح مااتوقعت هيج يصير.
سكت ماحجه يمكن مااقتنع بس سكت.
بعدين كال:
وهسه شلونه راسج؟
رنا:بعده يوجعني.
جواد:خاف بيج تيفو؟
باوعتله كتله:
يجوز، الله اعلم.
جواد:باجر روحي للطبيب وشوفي خل يسويلج تحليل ويشوف خاف صدك عندج تيفو؟
رنا:الله كريم
جواد:كلشي ولا تتمرضين شلون نعرس ههههه.
ماحجيت كال:
صيري زينه حتى تبدين تحضرين روحج مابقى شي.
شكد تردين اطيج فلوس للبدله والصالون وهالسوالف.
جريت نفس حيل هذا همه العرس وبس لو اموت يمكن ماينقهر ولايضوج.
رنا:بعد وكت من اروح اكلك.
جواد:خوش حجي هسه كعدي اتعشي مادام انه موجود حتى على واهسي تنفتح شهيتج.
جنت افكر لو واحد طبيعي وعنده كرامه ويشوف خطيبته تحاول تنتحر قبل كم يوم من زواجهم معناها اكو مشكله معناها ماتريده ماتحبه ماتشتهيه وماتريد تنجمع وياه ابيت واحد هذا تفكير الانسان العنده احساس بس جواد ابد احساسه ميت ماعنده كرامه ولااحساس ولاذرة احترام لنفسه.
الايام الوراها بدت امي تجهزلي وراحت اجرتلي بدله للعرس وحجزتلي صالون انه كتلها مااروح واشتري ولا اسوي اي شي انتي روحي.
قبل الزواج بيومين اتصلت عزمت صديقاتي طبعا عبالهن ارشد خطبني فرحن يجوز ويجوز غارن ماادري بس بعدين كتلهن مو ارشد وارشد خطب بت عمه وحجيتلهن القصه كلها حتى موضوع الحبوب اللي شربتها.
طبعا كلهن تأثرن وضاجن وكللي ميخالف ومامعقوله ارشد هيجي يسوي بس اذا صدك فمايستاهلج.
صديقاتي المقربات حيل مني 2 لبني وساره وجان عدهن ميانه ويه ارشد ومرات حتى اتصال.
بيوم الحنه امي اصرت تسوي حنه وتعزم المدرسات اللي وياها بالدوام حتى تتباهى بتها مهرها بيت وين اكو هيج نسيب وطبعا فد مره انه هم عزمت صديقاتي بس جنت ميته الميت يمكن احسن مني.
لاضحكه لاابتسامه ولااكو ذرة فرح او ارتياح بداخلي.
امي وصاحباتها واهلنه وحتى صاحباتي اللي يعرفن انه احب ارشد وميته من اللي سواه بيه ويعرفن مخنوكه من اللي جاي يصير ويعرفن حاولت انتحر حتى مااتزوج غيره كلهن جانن فرحانات يركصن ويغنن ومتونسات عبالك انه قابله وراضيه وفرحانه مو محترك كلبي حرك..
حسيت نفسي كاعده بمكان مو مكاني المثلي هسه المفروض ميته ويني ووين الركص والغنا وجو الاحتفال.
خلصت الحنه وكلها طشت بقوا بس الكرايب اللي مكانهم بعيد باتوا عدنه.
انتبهت للتليفون دك كذا مره ومحد يجاوب فكرت هذا ارشد اكيد.
اخذت التليفون لغرفتي وكعدت كباله منتظرته يدك.
اول مادك بجيت شلت السماعه وكلت بصوت مخنوك من البجي:
الووو؟
ماحجه شي بقى ساكت.
رنا:الووو؟... هم ماحجه
رنا:احجي فدووه احجي...
ارشد:شتردين احجي؟تردين اباركلج؟؟
مبروك.. الف مبروك .. تستاهلين حقج تستاهلين واحد احسن مني واحد عنده فلوس وينطيج مهر بيت..تستاهلين انه مااكدر انطيج هيج مهر ولاعندي فلوس مثله ولاعندي سلطه وعرف وواسطات.
مبروك عليج.
ابجي بكل حركه كل كلمه منه احسها ضربه بكلبي.
ارشد:ليش تبجين مو انتي اختاريتيه مو انتي ردتي بيت؟
رنا:كافي ارشد عفيه مو هيج كافي.
ارشد:كافي شنو؟ومو هيج شنو؟شنو تردين اكلج؟تردين احجي عدل واحجي الصدك؟تردين احجي البكلبي؟صار...
شكد جنت احبج ماتتصورين شكد لدرجة صورتج حاطها بمحفظتي وماانام اذا مااطلعها واباوعلها وابوسها يالله تغمض عيني.. ماانام اذا مااتخيلج يمي ابيتي وبحضني... بس هسه احتقرج لدرجه ماتتصورينها.
رنا:مو هيج ...
ارشد:ولا كلمه.. ولاكلمه .. مااريد اسمع صوتج بعد زين؟مامقهور بس عالسنين الضيعتها وياج... جان كتيلي عالاقل مو خليتيني سافرت وسويتها عملتج فجاءه عبالج ماراح اعرف لو شنو؟؟
رنا:ارشد خليني احجي ..
ارشد:مابينه حجي انتهينه ومااريد اسمع منج شي ولاعنج هاي هي هاي تاليت الصبر والتعب عفت بت عمي مربوطه صار سنين علمودج وخوش جازيتيني.
مااكلج بس مبروك الله يوفقج ان شاءالله.
رنا:مو انه ارشد مو انه انت ال...
ارشد:مع السلامه.
سد التليفون بوجهي...
لا..لا.. مااصدك..مااصدك اللي سمعته اكو شي غلط..
رجعت اتصلت بي مايرد مره ومرتين وتلاثه وعشره مايرد اخر شي ظل يطلع مشغول اكيد رفع السماعه...
لا ارشد لا مو انه مو مني الغلط منك .. انت ..انت العفتني وخطبت بت عمك مو صحيح ؟؟
ظليت كاعده لنص الليل اتصل ماكو مايدك التليفون..
شبعت بجي واخر شي فقدت اعصابي شلت التليفون وركعته بالمرايه..
كلها اجت تركض..
كلها متفاجأه مايعرفون شكو كلها تسأل ومستغربه..
مااكدر احجي اتمنيت روحي مو بنيه لا ولد حتى اكدر احجي كل شي بكلبي بخاطري كل شي بروحي ..
امي طلعت البنات من الغرفه ودخلت وسدت الباب.
كعدت يمي وظلت تحجي وتلوم وتسأل وانه كلبي مشتعل نار ومااكدر احجي اخر شي كلتلي:
انتي مخبله مو صاحيه الله يعين جواد عليج عباله ربح من اخذج.
باوعتلها كتلها:
لا والله الله يعيني عليكم مو اهل وانتي مو ام الام اللي تدري بتها تحب واحد ثاني ومحترك كلبها عليه ورادت تموت روحها علمود ماتصير لغيره وتغلس وتتجاهل وتسوي حفله وتعزم وتركص هاي مو ام هاي مرت ابو.
امي:مو اكلج مخبله مو اكلج؟متعافيه شفتيهن البنات شلون يباوعلج وحاسداتج شفتيهن؟بعدين تره انه ساكتتلج ومنطيتج مجال وادري بيج تحبين على كولتج لان كلت هذا طيش وفتره وتنتهي ومدام ماخطبج معناها لعب.
حمدي ربج واشكريه قسمتج كل البنات تتمناها.
انتي لو براسج عقل ماسويتي بروحج هيج علمود واحد حافي لا والمصيبه تردين تموتين روحج؟عفيه عليج حتى ننفضح وانام بالشارع علمود جنابج تحبين.
ولج خلي براسج عقل وفكري شلون تكسبين رجلج شلون تخلينه يدللج شلون يحبج ومايكدر على زعلج وفراكج شلون تخلينه حتى مرته ذيج يطلكها.
ليش تشاركج بالخير هذول الشرطه يحصلون فلوس خير من الله ليش تخلينه يصرفهن على غيرج؟ افتهمي وفكري زين اخذي مني هالحجي وطبقيه دوخيه حتى يبقى بس الج وشوفي لوما ترسج ذهب من راسج لرجليج.
ظليت صافنه عليها ماكو ولاكلمه منها تطيب بيها خاطري لو حتى تبين اسفها علي وعلى كلبي ومشاعري على حياتي وعلى تضحيتي.
ماكو ام ماتنقهر على ضناها يمكن الا امي مايهمها شنو اسوي شنو يصير بيه شنو احس يمكن لو استاذ بشار طالب مقابل على كل الخدمات اللي قدمليها وهالمقابل بي سمعتي وشرفي هم يمكن ماراح تحجي وتعترض.
معقوله؟!!
راحت وعافتني للصبح كاعده على جربايتي واحر حسرات وافكر شبي ارشد وليش هيج حجه؟؟
شنو معناة حجيه وكلامه؟
ليش يلومني؟
ليش يذب الصوج بيه؟
مو هو العافني؟مو كلي بت عمي اوله بيه منج؟
مو راح لبغداد يخطب بت عمه؟
ليش هسه جاي يعاتبني ويلومني؟
ليش يريد يطلع الغلط بيه؟؟
ليش مايحاسب نفسه؟..
يعني يتناسه اللي سواه بيه ويجي يحاسبني انه؟
يلومني ليش ماكتله وهو جان رايح يخطب غيري!!!
يعاتبني على السنين اللي ضحى بيها ابت عمه؟؟
والسنين اللي انتظرته انه بيها... ماحاسب نفسه عليها؟
السنين اللي ضحيت انه بيها وبقيت انتظره ماتنذكر؟؟مالها حوبه؟؟
مالها قيمه؟؟
منو البدا الغلط بحق الثاني انه لو هو ؟
مو هو اللي اتخلى عني؟؟
بقيت الليل كله اكل بروحي اكل..
متت .. والله متت ..
متت من التفكير..
وتعبت...
وجه الصبح يالله غمضت عيني مالحكت انام وارتاح ب9 البيت كله كعد وكلها مخبوصه وهوسه وحجي وصياح كلهن البنات يحضرن اغراضهن اللي تريد تسبح واللي تريد تروح للصالون واللي تريد تكوي ملابسها واللي .. واللي .. واللي..
كلها تصيح:
رناا كعدي..
رنا يالله..
رناا راح تتأخرين..
كعدت كوه حتى عيوني كوه فتحتها من كدما بجيت البارحه..
اباوعلهم مخبوصين وفرحانين وانه اتمنى اموت ..
الساعه ب11 رحت للصالون على ماجهزت وخلصت اجه جواد.
ومن شفته شلون يباوعلي لعبت نفسي..
العرس جان زفه من بيتنه للفندق وجان بذاك الوقت فندق الشيراتون فد شي اجت وياه امه وخواته 2 وولده 2 وجم واحد من جماعته واهله.
من دخلنه للغرفه بالفندق انقبض كلبي عبالك طابه للكبر.
امي بقت يمي نزعتني البدله ولبستني طقم نوم ابيض مال عرايس.
واخذت البدله وياها لان جان بذاك الوقت ماكو بدلات خياط ولابيع كله ايجار.
بس طلعت امي انقبض كلبي شفت جواد دخل للغرفه عبالك دخلي ملك الموت.
واكثر شعور واسوء لحظه مرت علي بكل حياتي من سد الباب اتخيلت سدوا علي باب الكبر مو غرفه وياه.
بمجرد ماشفت ابتسامته لعبت نفسي وحسيت معدتي ظلت تكلب وخفت لا اتقيئ.
كعد يمي حسيته راح ياكلني اباوعله مابي شي ينحب لاخلقه ولااخلاق.
ضعيف ونص وجهه شوارب وخشمه طويل عيونه كبار بس فاهيه ورغم عمره مو كلش جبير بس شعره كله شيب.
عكس ارشد جان طويل وبي نوع من الضخامه واسمر عنده لحيه خفيفه جان مملوح بس يمكن مو محظوظ مثلي
جواد:حي الله رناوي.
باوعتله بطرف عيني كتله بكلبي شوف الرومانسيه.
جواد:ها رناوي ساكته؟
رنا:تعباانه.
جواد:تعبانه؟!! بسم الله بعدنه مابدينه تعبيش هذا؟
رنا:كاعده من الصبح وراسي يوجعني ونعسانه واريد انام.
باوعلي بخبث وابتسامته صفرا.
جواد:ماكو نوم اليوم ههههه.