فقراء لم يخلقوا للحب

/13/

#فقراء_لم_يخلقوا_للحب_
ل: #روز_الفياض_
ج١٣
اباوعله وابجي بخنكه بدون صوت استحيت من عصام كاعد على مكتبه يباوعلنه.
ماكدرت احجي اي شي..
يباوعلي واباوعله ماعندي تفسير لنظرته الحزينه..
ارشد:شلون صدكتي؟
ظل يتحسر وانه منتهيه من البجي وخايفه استاذ بشار يجي ويشوفني ابجي ويشوف ارشد يمي شيكول عني..
التفت ارشد على عصام اشرله بعيونه يطلع من المكتب ويتركنه وحدنه.
طلع عصام وارشد التفت علي كلي:
اشتاقيتلج ...
هنا ماكدرت اهدأ بعد ومتت من الخنكه طلعت مني شهكه حسيتها طلعت من نص كلبي.
ارشد:كافي بجي تره ماناقص قهر كافي القهر الشفته وراج.
ماكدرت اتحمل اكثر كمت من مكاني وطلعت من المكتب كله شفت عصام واكف بره غلست ورحت للحمام.
بقيت كاعده بالحمام بجيت لحدما تعبت بعدين غسلت وجهي وطلعت شفت ارشد واكف بره ينتظرني.
غلست ماحاجيته ولاباوعتله عبرت من يمه وكملت طريقي اجه وراي.
ارشد:رنا ...رنا اوكفي احجي وياج.
ماوكفت ولا درت عليه رديت وانه امشي:
مااريد احجي.
ارشد:اوكفي لخاطر ربج عيب منا الموظفين..
رنا:روح ارشد روح المن جاي؟
قبل لا ارجع للمكتب لزمني من ايدي وسحبني كلي:
اوكفي مو بكيفج اريد احجي وانتي لازم تسمعين واريد اسمع منج من حقي افهم شنو الصار بالضبط.
رنا:مايحتاج بعد ماتسوى السالفه ماضي وانتهى.
ارشد:بالنسبه الج يمكن.
كتله بكلبي ياريت بالنسبه الي ماضي وانتهى ياريت.
رنا:عندي شغل مافارغتلك ارشد.
ارشد:طز بالشغل وبالمدير وبالموظفين وبكل شي.
امشي كدامي بره نحجي.
رنا:ارشد روح عفيه مااكدر كتلك.
ارشد:اذا ماطلعتي اروح لمديرج واكله.
باوعتله كتله:
شتكله؟
جر حسره كلي:
اكله احبها ومنتظرها سنين وهي هم.
طاحت دمعتي درت وجهي ماحجيت.
دخل هو اشر لعصام ورجع كلي:
بداعة ذيج الايام امشي خل نحجي بره بداعة عزيز كلبج.
من كلي هالكلمه بلعت ريكي وباوعتله كتله:
ماعندي عزيز.
ارشد:غلطانه.
جرني من ايدي وكلي:
امشي.
مشيت على كيف وسحبت ايدي.
ظليت امشي وهو يمشي وراي.
طلعنه بره راح هو كدامي شفته اجر تكسي والتفت علي اشرلي تعاي.
هزيت راسي لا.
اجه كال:
رنا شبيج؟كتلج اريد احجي وياج اريد افهم منج قابل راح آكلج لو اسويلج شي.
طلعت حجتي بجنطتي كتله:
نسيت جنطتي.
ارشد:تولي مو مهمه يالله صعدي خل نروح نحجي بعيد عن الشغل والموظفين.
رجع لزم ايدي سحبتها كتله بعصبيه واشرتله بأصبعي:
لا تلزم ايدي مره ثانيه افتهمت.
ابتسم كال:
ميخالف مو قصدي بس اصعدي عيب السايق ينتظر.
صعدت بالسياره كعدت وره وهو كعد كدام يم السايق ماادري وين رايحين.
ماحسيت بالطريق ولاانتبهت احنه وين ماشين الى ان وكفت السياره اباب الجامعه.
نزلنه كال:
هذا احسن مكان نحجي بي براحتنه.
دخلنه جوه وكعدنه بالنادي.
ارشد:نتريك؟
هزيت راسي لا.
ارشد:نشرب جاي؟
هزيت راسي لا
ارشد:معناها نحجي..
بقيت ساكته ودموعي ترس عيني.
ارشد:عصام حجالي عنج من اول يوم داومتي وياه..
ماجاوبته ولاباوعتله.
ارشد:من اول يوم رجعتي داومتي وانه يوميه اكول اريد اروح اشوفها بس مااكدر كرامتي ماتسمحلي..
غثتني حجايته كتله:
تخاف على كرامتك بس كرامتي مالها قيمه ماعندي كرامه انه بس انت.
ارشد:ولج مو قصدي والله مو قصدي جنت عصبي وكتلج روحي بت عمي اوله بيه بس مو صدك والله مو صدك شلون اعوفج وانه احبج والسنين الفاتت شنو؟
رنا: مو قصدك؟مو قصدك وانه اتصل بيك ليل ونهار ماتجاوب؟
كلما اخابر اكللهم كلوله رنا وماترجع تتصل ماكلت كرامتي ولاخفت عليه بالعكس مابقيت لنفسي كرامه مليت وانه اتصل بيك وتدري جنت بوضع صعب وماكلفت خاطرك تشيل التليفون وتتصل تسأل خايف على كرامتك.
ارشد:والله العظيم محد كلي اتصلتي محد وصلي كلامج واتصالج.
رنا:وين يوصلولك مو جنت رايح لبغداد تخطب بت عمك بعد شلون مو قصدك شلون مو صحيح شلون تريد...
سكتت بجيت.
ارشد:ماخطبت بت عمي منو كلج خطبتها رحت لبغداد لان عمي اتوفى ورحنه.
رنا:لاتحاول ارشد هي مو بس شغلة اتصال اكو ناس اكدولي انت رحت لبغداد خطبت بت عمك.
ارشد:خطبتها صحيح.
حجايته اذتني رغم جنت متأكده خاطب بت عمه بس من كالها غير المها اقوى.
كمت وكفت كتله:
معناها مالها داعي هالكعده.
ارشد:كعدي رنا بعدني ماخلصت حجيي سمعي للاخير وبعدين شتريدين تسوي سوي ماراح امنعج.
اتنهدت ورجعت كعدت رغم كل الالم اللي حاسه بي بس جنت فرحانه لان شفته وكاعده احجي وياه..
ارشد:خطبتها بس خطبتها قبل 6 شهور
يعني قبل لاتطلكين بفتره بسيطه مو اكثر.
رنا:ماله داعي تجذب وتبرر اعرف خطبتها من ذاااك اليوم ومايهمني اعرف اي شي عندك بعد انت بالنسبه الي انتهيت غلطه جبيره بحياتي ودفعت ثمنها غالي ونسيتها وراحت وهسه اريد استمر بحياتي واعيش مثل الناس.
ارشد:الله عليج نسيتي؟؟
الله عليج؟
رجعت دمعت عيوني باوعتله كتله:
لامانسيت مانسيت شي لاانت ولاجذبك ولا لعبك علي ولااي شي يخصك ومااريد انسى حتى كلما افكر بيك اكول الله لايوفقك الله يشلع كلبك مثلما شلعت كلبي.
سكت بقى يباوعلي وانه ابجي بعدين كال:
والله العظيم والله العظيم والله العظيم ماخطبتها الا قبل 6 اشهر مو لان احبها لو هي اوله بيه منج بس عمي اتوفى وامها مره جبيره وتعبانه وهي ماعدها لااخوان ولاخوات اذا ماتت امها منو الها.
رناوي محد اوله بيه منج..
رنا:كافي عفيه كافي اذيتني بمافيه الكفايه خلص خطبتها الله يهنيكم.
ارشد:من حجالي عصام البارحه الحجي اللي حجيتيه اتفاجأت لان غير الحجي اللي سمعته من ساره.
رنا:اي ساره؟
ارشد:ساره كامل صديقتج الي جانت ويانه.
فتحت عيوني كتله:
شبيها ساره شكلتلك؟
ارشد:هي اتصلت بيه من انخطبتي وكلتلي عافتك تكول فكر شلون يعيشني وين جواد ووين ارشد جواد اطاني مهر بيت سجله بأسمي.
ظليت صافنه مامصدكه كتله:
ساره كامل؟مستحيل هيج تكول لان هي تعرف كل اللي صار كل الحجي وكل المشاكل وكل الظروف.
اصلا هي اللي اتصلت بيه من جنت بعدني متزوجه وكلتلي سألت عن ارشد وطلع صدك من رايح لبغداد رايح حتى يخطب بت عمه.
اتعجب هو كال:
والله العظيم جذابه بالقران جذابه منين جابت هالحجي؟
بس مادام حجت يمي حجي غير الحقيقه معناها متعمده تحجي يمج هيج.
رنا:ليش شمسويتلها؟هاي صاحبتي هي ولبنى اقرب اثنين الي.
ارشد:هسه انعرفوا المتهمين اهلي اللي مابلغوني بأتصالج وساره اللي غيرت السالفه والاحداث.
رنا:بس ليش من جنت اسألها تكلي انسيه حرام انتي متزوجه هسه مايصير تفكرين بغير زوجج.
ارشد:ليش تسألين عني مو تكولين نسيتيني؟ليش تفكرين بيه؟
رنا:مااتصور يجوز هالحجي بعد ولا اله داعي ولابي فايده.
دنه كرسيه يمي حيل وكال:
هسه انه صرت بنفس موقفج مجبور اتزوجها لان اخلاقيا مااكدر اعوفها بعد.
دنكت طاحت دمعتي كتله:
الله يهنيكم يجوز تحبك وتكدر تسعدك.
ارشد:رنا اتخبل من اسمع هالحجي منج يعني حجيج هذا يأذيني اكثر ماانه متأذي.
رنا:هذا الحجي اللي لازم تسمعه.
ارشد:حتى لو تحبني انه احبج انتي.
رنا:وانه مااحبك بعد.
دنك يمي كال:
كولي والله مااحبك بعد؟
رنا:مايحتاج حلفان.
ارشد:كولي وداعة ارشد مااحبك بعد.
بقيت ساكته ودموعي مابطلت.
كمت كتله:
انه تأخرت اريد ارجع عندي دوام.
ارشد:اوكي ارجعج بس اريدج تتذكرين انه احبج اليوم وباجر وعكبه.
رنا:اوكي
ارشد:رنا والله احبج معقوله ماتصدكين؟
عفته ومشيت طلعت للباب وهو يمشي وراي ويحجي.
ارشد:تتذكرين من جنه نكعد هنا؟
تتذكرين من جنه نكعد بذاك الكشك؟
تتذكرين اول مره كتلج بيها احبج؟
واول مره كلتيلي احبك وخبلتيني؟
رنا اوكفي لخاطري خل نحجي خل نشوف حل لوضعنه.
درت عليه كتله:
ياوضع اللي تريد تلكاله حل وضعي كمطلقه لو وضعك وانت خاطب بت عمك واخلاقيا ماتكدر تعوفها ؟
ماكو حل... روح اتزوج وعيش حياتك بت عمك اوله بيك.
صار عصبي كال:
اذا عدتي هالجمله ماتلومين الا نفسج.
رنا:ليش شتسوي بيه اكثر بعد؟
ارشد:وانه شسويتلج قبل حتى شسوي اكثر؟كل الحجي الحجيناه وانتي بعدج مامصدكتني؟
شلون اخليج تصدكين؟
اتصلي بصاحبتج وسأليها واجهيها وشوفيها شتكول واذا نكرت انه اجي واواجهها.
رنا:مااريد اواجه احد انه تعبانه اريد ارتاح ماعندي استعداد بعد انركن عالرف وابقى انتظر لحدما تلكه لوضعك حل انت وبت عمك هاي مشكلتنه من قديم الزمان من عرفتك وبت عمك موجوده بالوسط وانه لازم ابقى انتظر.
خلص بعد مااكدر بعد ماانتظر احد ومايهمني وضع احد.
مشيت شويه واشرت لتكسي وكف وصعدت هو ماصعد بس حاسب السايق وبقى واكف.
رحت وعفته واكف يباوع وراي واخذت الطريق كله حسرات وبجي.
الله لايوفقج ياساره اذا هالحجي صدك ليش هيج سويتي وفرقتينه شتستفادين شمسويتلج انه هاي انتي عود صاحبتي المقربه وانه الغبيه مااضم عنج شي.
رجعت للدوام وانه ماادري اصدكمن ارشد لو ساره.. ماادي منو بيهم يجذب.
دخلت للمكتب لكيت عصام كاعد سلمت وكعدت على مكتبي.
حسيته يريد يحجي يمكن يريد يسأل شنو صار ماردت هالموضوع ينفتح بعد كمت رحت للحمام غسلت وجهي ورجعت..
اول مارجعت كلي عصام المدير يريدج.
قبل لا ادخل لاستاذ بشار عصام اتدنه يمي كلي بصوت ناصي:
تره سأل عنج ماادري منو كايله طلعتي وانتي تبجين ووياج ولد.
رنا:وشكتله؟
عصام:كتله اخوها اجه عليها اختها واكعه وماخذينها للمستشفى.
رنا:اسم الله منين جبت اختي بالنص.
ضحك كال:
هذا الي اجه ابالي بوكتها خوما اكله اخوي اجه يشوفها وطلعوا حتى يحجون.
غلست ماحاجيته ودكيت الباب على استاذ بشار سمعته كال:
فوتي رنا.
دخلت سلمت اشرلي كعدي..
كعدت.. كلي:
خيرج وين جنتي؟كالوا طلعت تبجي ووياها ولد؟
رنا:اي اخوي مؤمن هذا اجه علي لان اختي واكعه متخربطه بالكليه ومتصله بالبيت ومر علي حتى نروح انه وياه نجيبها نرجعها للبيت.
استاذ بشار:خير ان شاءالله جان وديتوها للمستشفى.
رنا:اي وديناها طلع ضغطها متخربط.
استاذ بشار:سلامتها
رنا:الله يسلمك استاذ مشكور.
كمت اترخصت منه وردت اطلع صاح وراي:
رنا؟
رنا:نعم استاذ
استاذ بشار:شلونه عصام وياج؟
رنا:عادي علاقتنه رسميه.
هز راسه اي ماادري شبي ومافهمت معنى سؤاله.
طلعت رحت كملت شغلي وحسيت عين عصام وراي وين ماادور ووين مااتحرك.
باوعتله ردت افشله.
كال:
والله يحبج.
رنا:هاا؟
عصام:احجي على ارشد يحبج.
مارديت عليه.
عصام:وانتي هم.
رنا:خلص موضوع قديم وطوينه الصفحه بعد ياريت لو مانحجي بي بعد.
عصام:الخميس الجاي زواجه.
ماادري شصار بيه ماادري شصار بكلبي من سمعت جملته بس غلست ماردت ابين ضعيفه ومقهوره.
كاعده وادعي بكلبي ياربي لاتخليني ابجي ياربي لاتخليني ابجي.
عصام:حرام اللي صار بيكم والله حرام.
اتنهدت وكتله:
اللهم طولج ياروح.
عصام:اذا تحبينه هالمره لاتعوفينه هاي فرصه ثانيه اجتكم حتى ترجعون.