حلات الحب عذابه

2

#حلات_الحب_عذابه 2
الجزء الثاني
#قصص_ليل_وعشگ
............بقلم #نورا_غدرني_الزمن...............

نور'''''''' انه نور بس مو نور كاتبتكم 😂لا وانما بطلة قصتكم هي... عمري 19سنه سادس ادبي ادري عمري جبير لان راسبه
طولي 160وزني62 اعرف مربربه بس بدون كرش ..يمكن من الكتل. اي هسه تجيكم السالفه .. شكلي حنطاوية البشره .. ملامحي اشبه الممثلات الهنديات شويه .. شعري طويل بس مو كلش سرح بي ردات شويه عندي 3اخوان متزوجين وكاعدين ويانه بالبيت
شخصيتي الكل وخاصة نبع الحنان امي .. تگول عليه صلفه وعرمه ومخبله وماخاف من اكبر واحد.. هم هيج يشوفون انتوا شتشوفون 😳..يعني اذا حصلت كتله وحده باليوم من اخواني ..مااعتبرها كتله اعتبره تمسد هه هم ارجع اعارك نسوانهم واكتل جهالهم .. حتى انكتل مره ثانيه يعني عندي عادي ..   تعودت .. اما بداخلي لا يختلف عن شخصيتي الي ضاهره للعيان .. بداخلي فتاة رومانسيه .. طموحه .. اتمنى اعيش مثل باقي البنات .. البس مثلهن اتونس اطلع اسافر .. احب .. انحب اعشق وانعشق ودائما ادور فارس احلامي بداخلي بس ماالگي .. هو منو يگلبني واخواني ومصايبهم وطلايبهم .. محد يحاول يتقرب مني لان الكل يعرف اخواني شنو.. يدورون طلايب حتى يفصلون العالم ..... وحتى اذا اجه واحد ميعرف اخواني وتحرش بيه وطلب علاقه .. انه لااراديا  اغلط عليه واسبه اخلي يشرد ... وبعدين اتندم واحاسب نفسي اكول لو منطيته مجال جان حبينه بعض .. بس ارجع واكول يمكن الله يريد بيها صالح الي والولد هالايام متخبلين ع البنات يلعبون عليهم ويملون منهم يشمروهن

. اي مااحجيلكم ع خبالاتي مره رحنه سفره مدرسيه  لمدينة الالعاب .جاي نتمشه انه وصديقتي.جان يتحرش بيه واحد .طل بوجهي و. گال اويلي ع الشفايف .. انه من يمي گتله انجب (تعودوا ع اللفاضي 😁لان هيج انه موبيدي) عاد گال تعاي ويامن هي الانجب ... تخصرت ووكفتله كتله عليك غير كام مد ايده ابن ال 👠 وطكاني اجه الصواب ع اذني طرشها الحقير  .. لزمو اصدقائه انه گمت طكيته جلاق ع رجله مااتحملت وراد يهجم عليه والعالم اللتمت .. واجن المدرسات وكالو شكو ويدرون بيه انه وكحه .. عاد رجعوني للبيت ومن ذاك اليوم محرومه من السفرات المدرسيه هي من جنت بالرابع والهسه بالسادس وممنوع اروح وياهم وانه بس هي الفرصه اطلع بيها للمدينه وانحرمت منها شكد توسلت بالمعاونه تسمحلي ماقبلت كالت نور انت وكحه وماتنجرعين .. ضجت بداخلي بس ماابينت هالشي عليه رجعت اضحك واسولف بنفس اللحظه
مااخذه الدنيا بفطارية گلب وضحك بس بداخلي حزن مضموم .. من تعامل اهلي الي ابويه متوفي من سنين انه ازغر وحده بين اخواني احلم اتزوج .. بس محد يدگ بابنه حتى اقاربنه .. من وره مصايب اخواني

اليوم الصبح طلعت متاخره من البيت للمدرسه رايحه صاحت عليه امي نور نويرره ..بالشارع وجان اكو ولد جاي يمشي رجعت لامي .. گتلهه يمه شبيج عيب تصيحين باسمي گدام العالم فضحتيني

ام نور..جا يمه غير نسيتي اللفه مالتج
نور .. اي يمه صدگ اهم شي اللفه .. عاد بوستها من راسها وراحت ...طبعا انه اروح امشي للشارع العام اخذ سياره عبريه واروح للمدرسه اخواني بخلاء مايخلون الي خط لا ينطوني مصرف كروه يوميه .. رحت امشي

علاء.... هي هي نور ..الي ابتليت من وراها والله خوش .. باوعتلها وهي بوست امها وراحت تمشي لابسه حذاء رياضي وصدرية مدرسه ..وتمشي سريع شفت امها دخلت للبيت ..  ورحت امشي وراها وانه افكر بنفسي واگول .. خلي اروح اشوف شنو عدها ..واعرف صاحبها منو هذا الي ابتليت بمكانه ..هي مبينه وكحه مشيت وراها وعيني مافارگتهه .. خرب يومج نور جسمها كله انوثه .. وصلت الراس الشارع اشرت لسياره وصعدت وصعدت وراها

نور ... حسيت بشخص يمشي ورايه بس مااهتميت جنت مستعجله .. صعدت بالسياره صعد ورايه شاب ..كعدت انه بالاخير هو كعد گبلي .. السياره جان بيهه مره ورجال جبير ومريه عمرها وسط ووياهه ابنها زغير .. كعدت بالسياره فتحت اللفه مالت امي لگيت بيهه بتيته مسلوكه ومحموسه ووياهه طماطه وبصل كلها حامسيهه سوه .. رجعت لفيتها .. وخليتها بالجيس مالتها ورجعتها بالجنطه .. وصلت قريب المدرستنه صحت نازل .. كل مره اصيح بعلو صوتي نااازززعللللل منين اجه العين ماادري 😂بس انه هيج كد مره اصيح .. بس هالمره لزمتني بحه ببلعومي وصحت بصوت مبحوح  .. عاد اسمع الولد الي صعد ورايه صاح يگولون  نازل

علاء .. هي صعدت كعدت وره كعدت بس شنو بس تحوس وتخروش .. صاحت بصوت مبحوح ... اني صحت بمكانها نزلت شفتها راسا طبت للمدرسه .. رجعت للبيت صرت اشتغل بالبسطيه مال المخضر .. مرت ايام اراقبهه واروح وراها .. ماشفت عليهه اي شي رغم مدرسة الولد قريبه ماشفت عليهه اي شي .. فكرت بيني وبين نفسي خلي احقق اتهام اخوانهه الي .. واسوي وياهه علاقه من صدك ابرد نار گلبي .. هيج بشر مايفيد وياهم اله هيج وهم اتسلى وياهه

وهم اطلع فلوسي الي تعبت بيهم ونطيتهم الهم بدون لاتعب ولا جهد واستلموها هيج .. وراحت ببطونهم ان شاءالله تصير سم بيهه... صرت امشي وراها ومن تجي هي تفوت ع السوگ الي اشتغل بي هم اشوفها .. واباوعلهه وابتسم الهه هي تخنزر الي وترفع حاجبهه .. عاد انه اقمز الهه بمكر .. احسهه تعصب بس السوگ بي عالم ماتكدر تتُصرف ..
نور .. مرت ايام اشوف شاب هوايه گبالي مرات يتبعني للمدرسه ومرات اشوفه بالسوك يشتغل .. انتبهت على شكله طويل و ضعيف واسمر وشعره كفشه سرح احسن من حظي وعيونه عسليات ....عنده لحيه ونضراته ثاقبه ويخزر وحتى من يبتسم مخنزر  دائما يباوع الي بعدهه صار يبتسملي وراها تطور ظل يغمزلي .. ياا انه تخبلت من تصرفاته اتمنيت اتعارك ويا بس فشله ونوب بالسوك والعالم .. عاد اكتفي ارفع حاجبي واخزره .. مره طلعت حسيت بي يمشي ورايه .. وصلت للشارع اشرت لسياره وصعدت .. اشو هذا هم صعد ورايه .. عاد كعدت وره بالكشن الاخير لوحدي .. وهو قبلي .. والسياره بيها نفر واحد كدام .. هو صاح نازل .. كام يريد ينزل .. شمر ورقه زغيره وكعت ع رجليه ... فتحتها مكتوب رقم واسمه علاء
وللحكايه بقيه ..
وچان يرقمها 😂 اي گلولي جم مره مرقمينكم 😧قصدي توقعاتكم ارائكم 🙈
ησяα#