حلات الحب عذابه

11

#حلات_الحب_عذابــــــه 11
#نورا غدرني الزمن
الجزء الحادي عشر

نور....علاء شراح تسوي فدوه
علاء..ميخصج شراح اسوي ..لج انت شگد قاسيه ..عفتيني ..هيج معلگ لعبتي ع گلبي عبالج انه فقير مااكدر ارد الج الصاع صاعين
وينه وعدج الي جذبتي عليه مو 

نور...علاء الضروف كانت اقوه مني مو حجيتلك ..حتى امي عليه والله

علاء...هه لج انت تعرفين الله ..ماسئلتي عني من عفتيني ..جنت اريد اسوي على مودج كل شي اخذج وننهزم واخذ امج وحتى اهلي ونهرب واعقد عليج وتصيرين مرتي وشحده الي يفك حلكه .. بس انت تسرعتي وماتحملتي ورحتي رأساا صرتي اله وعقد عليج . عمت عين الوكت الي خلاني احبج
حبيتك وجرحتيني ..عشگتج وخدعتيني

نور..لا والله علاء همات حبيتك بس انه ضعيفه موبأيدي شي

علاء...انت كل شي بيدج ..مثلما طلعتي الي ذيك الليله يم الباب ..كان طلعتي ويايه وانهزمنه هم شنو هم اخوانج .. وتخافين منهم يردون يذبحوج بهالزواج هذا ولسه خايفه منهم

نور...علاء مترهم انهزم وياك والله مترهم

علاء..بس ترهم تصيرين الغير واحد
لا ونوب خليتيني معلگ رساله وحده ورحتي شكد انتظرتج تحنين عليه لو بمكالمه بمسج شكد انتظرت يم المدرسه مالتج بيتكم اروح واجي يمه ..وانت ماكو ..انه اتعذب وانت تتلذذين بتعذيبي .. روحي مبروك الج

نور...لا علاء لاتحط ملح على جروحي انه عذابي اكبر منك بهواي

علاء...باي نور ...

نور...سداه بوجهي ..كعدت ابجي الحد ما تبنجت من الوجع والدمع نشف بعيني انقهرت على كلامه وحسيت بعذابه شكد متعذب بسببي شجاني وخليته يحبني اوف ياقهر ..

يوم ثاني كانت الحنه مالتي خابرت احلام حاجيته عود تعالي اريد اشوفج

احلام ..لاعيني شون اجي اني بالعده
نور..لج ياعده عزاا
احلام ..موتطلكت من اخوج ..
نور...ياشوكت ..مادريت
احلام ..من كم اسبوع حقج وردت احاجيج تليفونج مغلق ..
نور..اي صح ...لعد وعلاوي شون
احلام..كتبت تعهد اذا اذا تزوجت ياخذو مني
نور...ادعيلي احلام باي
احلام ...باي....

ساعه 8الصبح اجت زهره ..تحاجيني وانه كاعده بالغرفه كلشي ماافتهمت منها صافنه وساكته ..بس افتهمت منها حنتي راح تصير ببيتهم ..مااهتميت الكلشي ... علاء وكلامه وجعني الحد مااتخدرت مو حاسه بشي ساعات افكر بالانتحار وتجي امي وتكعد يمي واشتم ريحتهه واتردد ..اجت زهره .كالتلي لبسي لبست .ورحنه للصالون ..دخلنه اكو عرايس قبلنه .. جانن ..الي تضحك والي فرحانه ..اباوع الهم وانه اكول هنيالهه يمكن تزوجت الي تريده مومغصوبه مثلي .. بعدها صاحتلي ..الكوافيره .. وتحجي ويايه وانه ساكته .. اجتي زهره كلتلهه على خصل اشقر زيتوني .. ورسمت الي حواجبي .. ورتبتهم ونضفت وجهي هذا كله بيوم الحنه .. وسوت الي تسريحه ..شعري مفتوح ومبروم بس شويه رفعته من فوگ وخلت عليه اكسسوار ع شكل ورد ناعم فضي وبي احمر ..والبدله حمره ضيكه ومن جوه مفروشه . ولبستني عدسات اخضر  ..ورموش والميك اب  الحمره لون احمر مات  بلون البدله .. والشدو سموكي .. كتلني الفضول اباوع النفسي بالمرايه .. رحت باوعت النفسي .. كلش حلوه طالعه ..غمضت عيوني وتنفست ..ياريت انه العلاء مو المحسن ... حاسبتهم زهره  اجه حازم علينه بتكسي وطلعنه .. من الصالون ..
زهره گالت الحازم نكعدهه ببيت اهلي
حازم ....ليش وبيتنه
زهره ...منو ابيتكم .. لاعدكم اهل لا كرايب نكعدهه ببيتنه احنه اهل وكرايب وراح نصير بعد اكثر ...من رجاء اختي تصير لمحمد
نور...انه بس ساكته
حازم ....هاا خوش كيفكم
نور...طبيت بالتكسي ...وطول الطريق مخنوگه ... والسايق مخلي اغاني والدنيا حر وانه لابسه الرموش والعدسات والبرنص والبدله ضيكه وتخنك ...فتنه ع نهر تمنيت اشمر روحي بي ...اباوع بالوجوه بلكي اصدف وجه شخص اموت لحتى اشوفه وهو علاء بس ماشفته ..

وصلنه لبيتهم .. دخلوني للبيت تلگتني امي جانت يمهم ..واخته رجاء وامه وظلن يهلهلن بگلبي اكول كون سم  كعدوني .. وجان عدهم نسوان يركصن مشغلين دي جي ..
ماافتهمت شي بس هوسة النسوان يسولفن ومجموعه  يركصن وصوت دي جي وهو مبرده جبيره موجهيهه عليه والجو رطب حييل ..دخت صدعت من الهوسه ..كاعده ع القنفه احس الكل يحجي باذني وصوت المبرده والدي جي. .وحتى صوت بطني من الجوع صار اسابيع مماكله زين ..جانت الساعه خمسه ونص العصر .. اباوعلها الساعه صايره كبالي بالهول مالتهم ..دخت حييل حسيت راح اوكع ..مر شريط حياتي ويا علاء كدامي من جان يطلع ورايه .. ومن اشوفه بالبسطه يغمزلي ..بعدهه من خلصني من المتحرش ..الاان وصلت من اعترف الي بحبه ومن صعدنه بالبلم بالشط وحظني وشميت عطره ..ومن طلعت اله بالظلمه وحظنته ..الى ان وصلت لاخر كلامه ويايه ..

حسيت ع نفسي صارت المغربيه .. واسمع صوت الاذان .بصوت كوه اسمعه او اميزه من صوت الدي جي .وهم دك وركص غمضت عيوني وتذكرت .. الي يدعي وكت الاذان الله يستجاب اله ..صرت ادعي ..ربي وشحالي انه عندك يتيمه

وگلبي مكسور ...ومجبوره يربي ..وانت ضد هالظلم .. واذا اخذني .. يعتبر زنى لان مجبوره عليه .. هذا بالشرع عندك يربي خلصني منهم .. خلصت الحفله صارت ساعه تسعه ..گلت الزهره يله خلينه نروح للبيت خو مانظل هنا .. گالت هسه اخابر حازم ونشوف

طببتني بغرفه .. وكعدت وحدي وگرايبهم بقوا يتعشون .. لشويه طب محسن عليه لفلفت نفسي بالشال .. هو طبك الباب وعيونه حمر ويخوف ..كمت لزگت روحي بميز التواليت ..اجه جان يكول شنو هالجمال شهالاحمر يااابه اموووت ع الاحمر گتله وخر عني ...هو تقرب الي...صحت زهره زهره
وسم ووجع واشمر عليه المشط وشكو شي موجود ع الميز ..اجتي زهره فتحت الباب طبت وسدته..وگالت ولك محسن ولك محيسن شدخلك يمها مو نحس تشوفها بالحنه ..گللها بصوت واحد سكران اي غير مرتي ..طلعته زهره وطبكت الباب ..گتلها الله يبلاج الله يفجعج الله ياخذ منج كل عزيز ولج شنوه هذا الورطتيني بي ..

زهره ..اووه لاتدعين بالله ..ليلة حنته وفرحان وشارب شويه ..وبعدين شدعوه عليج گلبتي الدنيه هو باجر يصير رجلج

نور...عسئ مايجي باجر واصير اله ..ادري بايتين احنه هنا لو شنو راح تصير ب11
ادري فهميني انه من اهل العريس لو من اهل العروسه..شهالخربطه ياربي ..ادري اسيره عدكم انه لو شنو بيكفكم تگودوني

زهره..نصي حسج ولج فضحتينه...
وطلعت...

نور...كعدت ع الكاع ..ابجي ..واندب حظي الاسود. ...لشويه سمعت صوت انفجار ماادري شنو .. طلعت من الغرفه .. شفت الكل طلعوا بره ..الحنه مالت الزلم بره صايره ..مسوين خيمه ..وكاعدين بيها يحتفلون . بصفهم اكو فرع وبي مسوين الحفله ..وناصبين الخيمه او يسمو الجادر ..
رحت امشي اريد اطلع بره ..رجليه كوه مشيت النسوان كلهن طبن بالفرع .. يرحن يشوفن رجالهن شبيهم .. انه كوه وصلت للباب عفت امي كاعده بالهول ..
بقيت واكفه دقايق واتلفت.الطريق محد بي الكل ملتم يم الچادر والدنيا ليل ..اجتي دراجه وعليهه اثنين متلثمين بأسود  طلعت من الفرع ..الي بي الحفله .. خطفت من يمي بعدها رجع افتر وصار كبالي الي ديسوقها .. بقه يباوعلي..على بعد خطوات مني  والي كاعد..وراه يدفعه ييگوله يلا امشي امشي دنروح..وگعت ع رجليه يم الباب . .عرفته علاء اي هو صرت ابجي واكول بقلبي تعال علاء تعال اخذني .حبيبي .علاء علاء ....

وللحكايه بقيه
الصبح انزل جزء ...
ارائكم توقعاتكم ..كلمة كملي والجزء قصير  تهبط معنوياتي .. وارائكم وتوقعاتكم تحفزني
نورااا