من تحت الركام

البارت الخامس عشر

مسائكم ورد جوري ..

اسفه حبيباتي بس جان عندي شغل وضيوف مالحكت اكتب بعد ماعندي شي كل يوم انزل بارت 😚

#من_تحت_الركام

البارت الرابع عشر

بقلم ازهار ذابله ..

ما افتـرقـنـإ !
بس اتفقنـا نبتعد يمكن شهـر
يمكن دهـر يمكن نموت بلا وعد
بس ابتعدنا وگلوبنا ظلت تردد : احنا لبعض !
بس ما نرجع ابد

ــ اني نفسي صار عالي واعرف اكو اعتراف خطير من سلوان وجنت انتظره بفارغ الصبر ..

سلوان ...
لازم احجي لـ افنان كلشي من البدايه اني متٲكد اتسامحني اي افنان گلبها طيب ..

ــ افنان اني جذبت ع عمج ..
ــ شلون يعني?
ــ يعني اني ماگدرت اقنعه غير من گتله اني رجعتج لان لگيتج بـ اربيل انتي ومهدي ....
ــ اي كمل شنو بعد حجيت ..?
ــ والله محجيت شي بس كتله لازم اتزوجج حته اني ادير بالي عليج وهم گتله انتي تردين تزوجيني بس تستحين منه واهنا اني جذبت ..
ــ وهسه شنو المطلوب مني?
ــ ماكو بس سامحيني واني هم اسامحج وانتهينه ..

دفعته وطلعت من بين اديه ورجعت خطوتين وره وعيوني غوشن انملن دموع بعد مااشوف شي
ـــ اي مسامحتك بس بشرط مستحيل اتزوجك تفهم قصدي ..
ــ احنا اتزوجنا وهذا الشي صار بعد انسي
وكلشي گلته لعمج بس حته يوافق ويقتنع بس مو شرط انتي هيج تاخذين موقف مني ترا مااستاهل ..
ــ اني مستحيل اتقبلك بعد خاف سامحتك قبل بس اتشوه صورتي گدام عمي هاي اكبر غلطه ارتكبته انت حكمت ع نفسك انت بالنسبه الي ميت من اليوم ..
ــ افنان كافي ميصير الي دا تحجينه ترا متحمل لان غلطان بس واحد غيري اصلا ميحجي هيج
ــ تمام باجر اني ارجع لبيت عمي وانت اطلگني وخلصنا. .
ــ هييي انتي مجنونه والناس شنو تحجي عليج ميصير واني وعدت عمج مااذيج واذا اسوي هيج اذيج ..
ــ يطبهم مرض الناس ميعشون وياي ولا يتحملون الي لازم اتحمله انت ماعندك ثقه بيه ترا مااگدر انسه كلماتك لمن دخلت ورانه للشقه انت هيج اتشوفني انت اتشوفني وحده ماعدها كرامه وحده خاينه لك شنو من بشر انت شنو فرقك عنهم انت حالك من حال فاطمه نفسها ماكو فرق بينكم واني اكرهك ..

كلماتها مثل الخناجر المسمومه الي تطعني
ليش وشنو السبب معقوله تگدر اتسامح الكل
بس اني لا “ليش حجيت اني شنو خلاني اعترف بكل شي گدامها ..

گدرت اقنعها اتظل بس كم يوم واني بعد مااتقرب منها وباجر انروح لبيتنا ونتفاهم مااريد انطرد من الفندق مثل مهدي ..

فاطمه ...
بديت اشتغل ويه سامان بدون علم مهدي ..
من يروح هو للشغل اني استغل غيابه واطلع اوزع البضاعه بشكل سري واغلبها تتوزع بمراكز التجميل يعني بين البنات ومحد يشك بيهم وشغلهم مرتب واني هم استفاد من شغلي اروح الصبح ادخل اعدل نفسي ابلاش صبغ وتنظيف بشره واظافر وغيرها وبعدها تجي وحده اعرفها تكول كلمه معينه وانطيها الجنطه الي بيها مواد تجميل عاديه جداا هذا الظاهر ..
ارجع بعدها اهتم بـ ام سامان الي حالتها بدت تسوء بالزايد اجنازه ومدوده ..
وسامان خايف عليها ويعرف هاي ايامها الاخيره وبناتها رجعوا ع مودها وماحبوا وجودنا بالبيت وياهم ورجعت گعدت بالشقه واني افكر اكيد اشتري بيت احلى من بيت سامان بس هي فتره كم شهر وابطل وبعد ابد ماارجع لهذا الطريق واتوب واظل اساعد الفقراء ..
اي هيج افكر ومهدي تاركني وحدي ومسافر واني اخاف...