من تحت الركام

البارت العاشر

مسائكم محبه ..

#من_تحت_الركام

#البارت_العاشر
#بقلم_ازهار_ذابله
زهراء العبودي..

ابو سلوان : اني اريد افنان لـ سلوان شتكولون ..?

سلوان انصدمت اني مگايل لـ ابوي اريد اخطبها شلون هو هيج فكر ..

مراد : طلبك ع عيني و راسي وانت عديلي وصار سنين احنا اخوان والاحترام والمحبه بينا ماتنوصف بس افنان بنتي وهي كل مابقه من اخوي كاظم شلون انطيهه وانت تعرف شگد احب سلوان مثل ابني وهم جان خطيب بنتي وتعرف شلون فصخوا الخطوبه وسلوان اكبر من افنان بهوايه اني اعتذر مستحيل ازوج افنان هيج.

ابو سلوان : انظل اهل واخوان واني ردت اتزيد المحبه بينا بس هذا كلامك عين العقل وهم الي يحجون عن افنان هاي خطبتي الها اتسكتهم واني كل مااشوفها اترحم لـ اهلها ع هاي التربيه ابنيه خلوقه ومحترمه واتمنالها كل خير وان شاء الله تفرح بيها ويه الانسان الي يناسبها ..

سلوان ....
هاي المره ابوي عقوبته الي جانت حيل قاسيه اتعمد يخطبها بهيج وقت وهو يعرف مراد معصب وكارهني ومايريد افنان تتورط وياي گدر يفرقنا بطريقه محترمه وفعلا بعد محد يحجي ع افنان لان لو بيها شي مو الشيخ يطلبها من عمها ويحمد بااخلاقها ...

افنان ...
اني اعرف ردت فعل عمي واعرف اكيد يرفض بس الي خلاني اتعجب هو تصرف ابو سلوان ليش اختار هيج توقيت وشلون يطلب ايدي وهو يعرف زوجته رافضتني!

فاطمه ....
طلعوني من المستشفى بنفس اليوم
ورجعت اشوف اخواني منتظرين بس ارجع
خلوني ادخل و واحد يباوع بوجه الثاني
عرفتهم ناوين ع شي بس ماعرفت شنو
لحد الليل اني ماانام من الخوف اعرف مايخلوني عدله ...
خليت افراشي قبل لا ينامون بالغرفه ونمت
بس مغطيه راسي امثل النوم بس اني صاحيه
اسمعهم يحجون ولحد الساعه تلاثه الصبح
انفتح الباب واحس اتقربوا مني شالوني اني وافراشي ..
واني مستسلمه واعرف هاي نهايتي اعرفهم مستحيل يسامحوني وحته من اتخربطت بيد حسن نقلوني حته اصحه ميردون هيج ضرب عادي يردون ياخذون روحي ..
كسروني بصندوگ السياره وشغلوا وطلعوا ..
اريد اتنفس مااگدر وبس ادعي واذكر ايات قرائنيه واني اعرف هاي ساعتي الاخيره ...

افنان ....
الزلم كلهم ظلوا بغرفة الضيوف واني وخالتي وبناتها ونعوم گعدنا بالصاله ..

نعيمه : ادري جايبه فواكه ومدري شنو اكل لـ بنت اختج شنو گالولج علينا اموتينها جوع!
مها : لا ممجوعتها بس شوفي حالها رايحه البنيه منتهيه ..
نعيمه : حته لو مو من حقج تجيبين شي الها شنو هي گاعده بالشارع?
مها : نعيمه شوفي اني گاعده بيتج ومااريد اسحلج اهنا سحل ..
نعيمه : شوف منو تحجي وتسحلني هي هههه
افنان : خاله كافي فدووه ميخالف نتحمل بس اليوم ..
نعيمه : اي تتحمل الدايحه ام الشباب ..