Ibu
Pangorbananmu kaya bumi pertiwi
Nadyan dipilara, dipaculi malah nukulake wiji
Kanggo panguripane sagung dumadi
Kanthi sabar anggonmu angreksa
Nggembol sangang sasi sepuluh dina
Kabeh lelakon, kabeh lelara ora dirasa
Ibu...
Asihmu kaya gebyaring lintang ing akasa
Gawe endah kahanan donya
Lumunturing tresnamu kaya aluning samodra
Sambung sumambung tanpa kendhat
Anggonmu nggegulang marang para putra
Dongamu tansah lumintu anggiring kabeh gegayuhanku
Ibu...
Welasmu kaya soroting candra ing wanci dalu
Tansah paring obor ing pepeteng
Nalika anakmu susah ora kendhat paring pitedah
Nalika putramu luput tansah paring pangemut
Kareben uripku ora kalang kabut
Ibu....
Sewu atur ora bakal cukup
Bandha donya ora bakal nutup
Kanggo ngganteni katresnanmu
Amung esemmu kang bisa gawe padhange atiku
********
Katur kagem ibu...Pakshe
KAMU SEDANG MEMBACA
Kumpulan Geguritan
PoetryKumpulan berbagai tulisan tentang puisi-puisi berbahasa jawa. Seperti ungkapan "membaca adalah jendela dunia" Karya anak bangsa dengan harapan dapat membantu mengembangkan budaya literasi semoga bermanfaat untuk negeri. Silahkan baca JANGAN LUPA VOT...