اضحك معنا وانسى همك

بيتزا

عالفيس وحدة طلبت طريقة عمل البيتزا وأختها بعتتلها الطريقة بأحد التعليقات .

شوفوا وتعلموا طريقتها :

1- إختي حطي طحين بكاسة من كاسات أخوكي محمود يلي جبلك ياهون وقت سكنتي ببيتك الجديد و زعلت مرتو يومها لأنو ما جبلها متلهن ..

2- حطي خميرة من يلي عليها صورة الطباخ وفوق راسو طاقية (مو حَيلا نوع ، ما تسترخصي وتجيبي من عند جارك السمان أبو علي بعرفك ها )
و كمان مقدار معلقتين سكر بالملاعق يلي جابتلك ياهن خالتك أم ابراهيم .. وشوية ملح لا تكتري ولا تلتهي مع رفقاتك و انتي عم تشتغلي...

3- حطي فنجان زيت ( خدي من الفناجين يلي جبلك ياهون أبوكي يوم عرسك هي إذا ما كسروهون ولادك العفاريت ...لكان مانك فاضية تربيهن منيح وقتك كلو عالموبايل والفيس والواتس...

4- حطي شوية حليب بودرة خلي جوزك هالمقوص أبو نص دكة يجبلك ياه و قليلو افردها لإيدك بلا كحتنة و جربنة ..
و بعدين اعجنيهون كلهن بطشط كبير (طشط متل يلي كان ببيت ستك الله يرحمها هاد يلي تقاتلوا عليه خالاتك و خوالك صبحية العيد بتتذكري وقتها كل واحد يقول هاد إلي !! ولما اجا ابن عم أمك هو مرتو وصالحهن لهالشرشيح قام باﻷخير قالت خالتك أميرة خلص خدوه عندي غيرو...

5-اعجني عجينتك و ادعكيها منيح و غطيها بصينية أو خرئة نضيفة..لك إي إلا ما يكون زايد عندك شي وحدة من يلي كنتي مفصلتيهن منشان تحفضي فيهن ولادك لما كانوا صغار...

6-بعدين إذا شفتيها اختمرت و انتفخت افرديها وحطي عليها الصلصة يلي مساويتيها مع الجبنة و حطي بسخاء بعرفك إيدك ماسكة ولا تنسي الجبنة متل يلي استعملتها بنت عمة أبوكي أماني لك هي يلي حطتها عالمعكرونة بتتذكري ؟؟ يوم خطبة أخوها حمودة يلي حب رفيقتو بالجامعة و أمو ماكان بدها ياها و غصب عنها حضرت الخطبة وكل الحفلة قاعدة وخلقتها مقلوبة و عم تقرأ و تنفخ...

ايه و خلص بعدين حطيها بالفرنَ يلي اشتريتو من سوق الحرمية بربع سعرو بس بدك الصراحة كان لقطة هالفرن وانحظيتو فيه . . و صحتين و هنا اختي ..ما بتاكلوا إلا العافية .

يخرب بيتها طلعت فضايح العيلة كلها مشاااان البيتزا الله لا يوفقها على هالوصفة .😂😂😂😂