سامحوووووني البارت كتيييييير طويل وباللهجه السوريه انشالله يعحبكم ..بحبكمممم
____________
اليوم أول الشهر
وبما أنو بكون جوزي قابض الراتب فَ بحب فاجئه بطبخة مدسمة 🙃
فقت من الصبح نقعت البرغلات .. وفرمت البصلات ..وقلّيت اللحمات .. وعلى عملة هيك .. وعملة هيك صارت الكبة جاهزة 💪
طبعا" الكبة المقلية بدها شوربة عدس ، جهزتا عالنار وعلى بين ما تستوي .. كنت مجهزة طاولة السفرة بالكبة وحباشاتها .. ولبست فستان أخضر حلو وشكلت فوق أدني وردة حمرة 👗⚘
رحت عالمطبخ ، الشوربة رح تستوي ،اجيت حطلها مكعب ماجي .. مالقيت 😱 وماعاد في وقت 10 دقائق بكون اجا جوزي 😱
ركضت بسرعة أسرع من أبو الحروف 😅
دقيت من الهاتف الأرضي لإبن الجيران ..
((اسمه سالم صف تاني ابوه فاتح براس الحارة ميني ماركت ))
قلتلو : #سالم بدي مكعب ماجي عالسريع الله يسعدك 😚
قلي : مافي عنّا مفقود الماجي😜
قلتلو: عن جد ؟؟
قلي : عم بكذب عليكي اليوم كذبة نيسان نياهاااهاااااي 😂
قلتلو : تضرب ما أغلظك هلق وقت نيسان تبعك ؟؟
((سالم حبيبي تعال هلق فورا" لعندي مابقى إلا يجي جوزي .. إذا بتستعجل رح طعميك كبة يا عمري 😚 ))
وقت حكيت هالجملة كانت بفوتتة جوزي وصارو عيونه هيك 😐
وانا وقت شفته هيك .. قلت يله بما انه اليوم كذبة نيسان بكمل الكذبة معو لشوف شو ردّة فعله😁
هوي وقّف جنب الحيط وفتح صيوان أذنه قعد يتسمع شو بدي احكي 😁
طبعا" سالم من زمان سكر سماعة الهاتف من وقت قلتله بطعميك كبة 😅
بس انا كفيت الكذبة .. وصرت إتمايل عالحيط وأفتل شعراتي بآصابيعي ..
وقول : يله حبيبي تعال ياعمري بسرعة 😘💋
وزتيتلو بوسة 😍
هون جوزي فات لعندي وجهو اصفر .. مصعوق .. مصدوم .. أنا عملت حالي أنو تلبكت وخفت😨
قلي : شو هاد يلي سمعتو؟؟؟
عم بتخونيني ؟؟؟
قلتلو : اه ... أي 😨
...........
انا الحوبة فكرت أذا قلتلو (( أي )) .. رح يزعل ويقلي ليش هيك عملتي؟ ؟
وأنا أركض ع الصالون وقلو كذبة نيسان .. كذبة نيسان 😜😜
يقوم يركض وراي .. وانا اهرب منه بكل خفّة ورشاقة حولين طاولة السفرة ..
بعدين يمسكني من أيدي ويكلبشهم لورا ضهري ويقرب عليي ويقلي : لا بقى تعيدي هالمزح الغليظ حبيبتي ..
وبعدها يشدني من أنفي وبعدين يكنفشلي شعراتي ويقلي تعي نتغدى كبة يا أم مزح تقيل ☺
...............
بس لاااااااا يلي صار غير هيك تماما" 😣
رجع سألني مرة تانية : عم تخونيني؟؟؟؟
نزلت وجهي عالارض وبلشت العب بأصابيعي وقلتلو بتردد اي 😔
وقف قدامي .. رجع بعّد عني ..
فك أول زر من قميصه .. رحرح الكرافة. وصفرن لونه ...
صراحة خفت بين اللحظة والتانية يحط ايدو على قلبه .. يقول قلبي قلبي قلبي ويسلّم النمرة 😅 متل المسلسلات
بس بالعكس حسيتو .. قوي و متماسك.. طلع سيجارة وشغلها .. ورجع وقف وقرب لعندي وحط عيونه بعيوني
مسك سماعة التلفون ورفعها
ورجع قلّي : يلي كنتي بتحكيه بتحبيه؟؟؟ 😑
انا هون حبيت تطلع الكذبة محرزة اكتر وفيها اكشن وادفنشر قلتله: اي بحبه😍😍
فجأة الكائن المتماسك يلي كان منذ قليل أصبح وحش فلتان من عالم البراري .. شي ما بتشوفوه غير ب انترناشونال جيوجرافيك 😑
مالقيتو غير هجم عليي متل شرشبيل وصار يلف شريط سماعة الهاتف على رقبتي ويقلي : موتي يا خاينة يا عايبة😡
صار يلفه متل ما بلف الثعبان ع الفريسة ..
وك بدي احكي انو كذبة نيسان بس ما قدرت .. والله ماقدرت .ماهو كاتم على نفسي ومسكر حاسة النطق ومخارج الأحرف كلها😷
اجاني بوكس فجائي حسيت شي غرض طار من غراض تمي 😭
...... (( أندق الباب فجأة))
قلي انشالله يطلع ابوكي وافضحك يا خاينة 😡
وقت فتح الباب .... فات سالم ابن الجيران ماسك بأيده مكعب ماجي وبالإيد التانية شادد على بنطلونه يلي بلا مطاطة مشان ما يزحل . وجاي عم يبتسم لجوزي ☺
وقلو : عمو انا من شوي حكت معي خالتو وقالتلي حبيبي جيب معك مكعب ماجي عالسريع قبل ما يجي جوزي مشان طعميك كبة 😁
😳 انصدم وقلو : يعني انتا يلي كنت هلق عم تحكي معا؟؟
#سالم :إي أنا وقالتلي رح تعطيني كبّة😁
#جوزي :انتا يلي صارت تقلك حبيبي تعا قبل ما يجي جوزي؟؟😳😳
#سالم :إي أنا وقالتلي رح تعطيني كبّة 😁
#جوزي:انتا يلي زتتلك بوسة كمان ؟؟؟😳😳
#سالم: إي أنا وقالتلي رح تعطيني كبّة😁
راح جوزي مسك صحن الكبّة وقلو خدو كله الك 😃
من فرحته سالم فلّت أيده يلي ماسكة بنطلونه يلي بلا مطاطة ..
مسك الصحن ونزل البنطلون 😂
خجل ورجع رفع بنطلونه وركض مع الصحن فرحان نياهاااهاااااي😃😃😃
............ ..
طبعا" كل هاد صار وانا ملفوف على رقبتي سماعة الهاتف وانا في سكرات الموت ..
ووجهي مخنق أحمر وشعراتي من الرعبة واقفين ومع الفستان الأخضر طالعة بشبه الفجلة😅
قرب جوزي لعندي بعد ما فكلي الشريط وصفن فيني وضحك وقلي : بربك هاد مزح بتمزحيه
قلتلو : بعد ثو ؟؟؟
كنت حابة أمزح معك بكذبة نيثان 😒
ضحك وكنفشلي شعراتي وشدني من أنفي وفتح كف أيدي وعطاني مكعب الماجي
وقلي : روحي كملي الطبخة شكلو غدانا اليوم شوربة لأنو عطيت الصحن كله لثالم قصدي سالم 😂
#بقلمي_
#مزح_تقليل_لاتمزحوا
#سامحوني
أنت تقرأ
اضحك معنا وانسى همك
Randomانا لا اجيد سوى الكسل والضحك والقليل من النفسية?? والتفاهة والسخافة? ولا يستفاد مني وعاجبني الوضع الحمدلله ??
