#رائحة_الروح
الفصل السابع والعشرين
حسن بصدمة .. شنو
سيلين كتبت (كنك يابابا )
حسن .. بالسرعة هذي
سيلين كتبت( ساد عدى 24 سنة من عمري من غيرها )
حسن بتنهيدة .. حاضر اليوم مالك يسئل الدكتورة عشان مواعيد جلساتك وبعدها يصير اللي انتي تبيه
سيلين بفرحة كتبت ( تمام يا بابا )
وجاء مالك ومروان وفطرنا مع بعض وحسيت براحة مالك لما شاف كيف نتعامل مع بابا صح مازالت حاسة بوجع من اللي داره بابا لكن نحبه وهو اللي رباني ومتعلق بيا واجد وعمره ما ظلمني ولا قصر في حقي مانقدرش ننكر عليه الشئ هذا ويكفي انه اب مالك خوي هذي بروحه تخليني نسامحه وحكى لمالك شنو نبي بيش يسئل الدكتورة وفعلا عديت للجلسة في موعدها والدكتورة بعد ماكتبت ليها شنو حاسة وشنو متمنية وفرحت الدكتورة بردة فعلي وقالت اني مش حناخذ وقت طويل في العلاج لاني طلعت اقوى مما تتخيل وسئل مالك الدكتورة على طلبي فقالت له ان هذي اهم خطوة في علاجي اني نشوف ماما وممكن هي اللي تخلي صوتي يرجع وعطاته رقم فونها الخاص في حالة لو جد جديد معاي وطبعا عطتني موعد جلسة بعد شهر عشان حنسافر لاوكرانيا بيش انشوف ماما لكن احيانا انت تقول شئ (لكن ربي يريد شئ اخر ) و حطني مالك قدام الشقة ومشى شور مكتب الحجز بيحجز لينا وحتى مارو بيروح معانا وبيرجع معاي لان موعده مع موعدي وخشيت الشقة لقيت مارو بس بعد ماكتبت ليه شنو قالت الدكتورة وفرح انه جلسته الجاية بتكون مع جلستي وقلت ليه ان مالك بيحجز ليه معانا
مروان ..تمام التمام اللي تأمر بيه اميرتي ينفذ ويطاع بيش تعرفي غلاوتك حتى جلساتنا موعد واحد
سيلين كتبت( اميرتي ياااااه يا مارو قديش ليا ماسمعتها طولت الحق في علاجك لكن الحمدلله )
مروان ..الحمدلله وحتسمعيها مني ديمة لاني حتى اوكرانيا بنعدي معاك
سيلين كتبت (والله صح )
مروان ..عندك شك وبعدين خاطري انشوف شكل المرا اللي جابت اميرة زيك
سيلين كتبت( خطرها في حاجة بنسئلك عليها)
مروان .. شنو ان شاءالله خير
سيلين كتبت( ليش خليتني امس نلبس هكي )
مروان بتنهيدة .. لان في اول جلساتي ضريت روحي واجد بسبب انهياري وانضريت بسبب حزام لابسه ساعة في ايدي خاتم فخطر عليا هذا فحاولت تكون لبستك كلها مافيهاش حاجة اضرك
سيلين كتبت(ربي يحفظك لي يارب ويعطيك ماتتمنى يارب )
مروان ..اميرتي في حاجة محيرتني
سيلين كتبت (شنو)
مروان ..عبير وين اختفت حتى مع خطبت مالك ليها لكن مانشوفش فيه دار خطوة لقدام خاطبها ليه قريب الخمس سنين واكثر وانتي ماتجيبيش في سيرتها بكل وعلى حسب مانعلم ان مالك قالي من قبل ماتتزوجي بشوي انقطعتو ومالك لولا اصرارك انتي لانك عارفة قديش يحبها وهي تحبه ماكانش خطبها ولما سئلته قالي سولي هيا اللي تجاوبك
سيلين بحزن كتبت ( ممكن مارو تخليه شوي السؤال هذا بيش انرد عليك )
مروان .. نرجاك ولايهمك
استني مالك يتصل
مالك .. ايوة يامارو
مروان .. نعم
مالك .. بنقولك جهزو ارواحكم وكلمو باتي حصلت حجز وبعد ثلاث ساعات طيارتنا يادوب تجهزو
مروان .. تمام بكل لكن بننزل على السريع نحط سيارتي في مكتب بيش يبعتوها للبنغازي
مالك .. تمام يا رفيق
أنت تقرأ
( سلسلة البيوت اسرار) الجزء الثاني بعنوان رائحة الروح
Lãng mạnوجع و خيانة وحب والم وفراق واختبارات ياترى هل سوف يكون لقاء وسعادة ام يكون الفراق هو المكتوب.. حياة التنزيل يومي بإذن الله
