#رائحة_الروح
الفصل الثالث
(سيلين)
عماد..استحشتك
سيلين ..والله
عماد..والله من اول مانضت وانا نفكر فيك ولقيت روحي منسق اموري ومسيب التجهيزات على ياسين وولعت وجيتك
سيلين ..احلى حاجة درتها حتى نا رايفت عليك
عماد..مش عارف شنو درتي فيا في الايام البسيطة هاذي
سيلين ..حرام عليك لينا قريب نسكرو الثلاث شهور وانت تقول ايام واهو بنختموها بالزواج
عماد..مش ندمانة او تشوفي في روحك تسرعتي
سيلين.. ابدا اصلا نا تعلقت بيك وحبيت شخصيتك الحلوة وقوتها وحسيتك خليط هكي مش مفهوم
عماد..كيف
سيلين ..عصبي وهادي بطبعك حنون وواعر طيب ومكار عاصي ولين
عماد..هاذو كلهم فعلا خليط مش مفهوم زيك
سيلين باستغراب ..زيي
عماد..اه معاندية وراسك كاسح وطيبة للهبال وواعرة وواثقة من روحك وضعيفة هلبة وهشة للكسر و قوية للصدمة
سيلين ..ياااااااه نحن الاثنين فينا اطباع تختلف واجد على بعض يستر الله كيف بنكملو
عماد..الاقطاب المختلفة تتجادب
سيلين ..صح ونا معاك وان شاءالله ربي يسهل امورنا
عماد..ان شاءالله
سيلين بنطلب منك طلب ممكن بس ياريت ماتزعليش مني
سيلين ..تفضل حسك شغلتني
عماد ..مافيش حاجة تشغل غير حاجات معاش نبيك اديريهن
سيلين .. زي شنو
عماد.. ممكن معاش تقصي شعرك لاني الحق نحب الشعر الناعم والطويل وانتي شعرتك ناعمة ماشاءالله لكن معاش تقصيها
سيلين ..هذي بس حاضر
عماد..ولما يكون حد من اقاربكم حتى خوتي ماتقعديش من غير حجاب
سيلين ..انت تأمر
عماد..مايأمر عليك ظالم
وطلب اخر
سيلين ..تفضل
عماد.. مانبيكش تسوقي
سيلين ..عليش
عماد..اني اي مشوار انتي تبيه نرفعك ليه لكن سواقة الحق مانحبش مرتي تسوق
سيلين..حاضر بس مانيش بايعة سيارتي
عماد..انتي حرة بس علاش
سيلين ..على الاقل لما نجو عن طريق الجو لبنغازي نلقوها انتحركو بيها
عماد..تمام اللي تشوفيه ديريه
عماد
لما طلبت منها معاش تقص شعرها والحجاب لانها محجبة لم تطلع لكن في الحوش حتى قدامي ماتلبسش فيه توقعت انها تتكنطا وتقولي حرية شخصية وكلام من هادا لكن تفأجات بيها وهي موافقة وبدون نقاش وطول عقلي مشى جيهة حنان لما كنت نقول ليها ما اديريش هكي او ماتمشيش للمشوار هادا كانت مستحيل توافق بسهولة لازم ادهشني معاها وبالذات موضوع السواقة ما اقتنعت نين قريب سيبتها في جرته اكثر من مرة
وحمدت ربي اني اخترت صح
حكيت واجد انا وعماد وزدت تريحت ليه ومانقدرش نقول حبيته لكن اعجاب بشخصيته وعزة نفسه واللقطة اللي دارها لما حس روحه مرايف عليا جاء بدون تفكير احيانا حاجات بسيطة يديرها شريكك تخليك فرحانة بيهن واجد
وفي الليل وانا في داري دق الباب وعرفته طول مالك نعرف دقته
سيلين..خش يا اوكي
مالك ..غير كان تبطلي هل الاسم الماسخ هذا
سيلين بقلبت شوراب .. مش احسن من ملوكة تقول بنت والله لوكا تقول بيبي على الاقل اوكي رغم انه ماليشي معنى لكن تحسه يناسب شاب
مالك ..والله حنفقدك واجد
سيلين ..وانت اكثر حاجة حنفقدها
مالك ..سيلين حبيتي عماد
سيلين .. مش عارفة مانقدرش انقول حب لاني جربته واللي كنت حاسة بيه معاه مازالت ماحسيتاش مع عماد لكن احاسيس ثانية منها اعجاب واحترام وتفكير بيه طول الوقت وجيته اليوم زادت اعجابي بيه اكثر حنيته عليا اهتمامه بيا بصلاتي وبوكالي وحتى قرايتي كيف قعد يعارك لما قلت ليه حتى السمستر هذا مانيش خاشيته وبالشكل هذا صدقني حنحبه اكيد مع الوقت
مالك ..ان شاءالله ياسولي ان شاءالله
أنت تقرأ
( سلسلة البيوت اسرار) الجزء الثاني بعنوان رائحة الروح
Romanceوجع و خيانة وحب والم وفراق واختبارات ياترى هل سوف يكون لقاء وسعادة ام يكون الفراق هو المكتوب.. حياة التنزيل يومي بإذن الله
