#رائحة_الروح
الفصل الخامس والثلاثين
سيلين بهمس .. خايف من شنو
مروان باعد على حضن سيلين .. خايف نغلط خايف نكون ماصحيتش خايف ايدي تهتز وانا في الجراحة
سيلين وحطت ايديها على وجه مروان .. توكل على الله وارمي حمولك عليه وادعي لربي ان يوفقك ومايخذلك وتفكر رحمة لو عايشة حتكون فخورة بباتها واجد وان شاءالله حيصير كل خير
مروان .. ان شاءالله يارب يارب
الممرضة باستغراب من وضع سيلين ومروان .. دكتور مروان العمليات جاهزة
مروان .. دقيقة وجاي نعقم روحي بس
سيلين .. عدي يا مارو وارمي حمولك على الله وتوكل عليه
مروان .. ونعم بالله ... جاية بروحك
سيلين .. لا معاي مالك وماهر وحسن غير سيبتهم يدرسو في السيارة ونا فتحت الباب ومااستنيتش حد
مروان .. تمام هيا بنعدي نجهز روحي
سيلين .. ربي معاك
وخش مروان للعمليات وجاء مالك وحسن وماهر وقعدو مع سيلين وقعدو بعاد شوي على اهل المريض بيش مايخافوش حتى هما بالزايد وطبعا لسانهم ماوقفش على الدعاء لمروان
حسن .. بتقعدي هكي ياسيلين
سيلين باستغراب .. كيف هكي
حسن .. بدبشك هذا وبكعبك العالي اللي يخش يتفرج عليك ومستغرب
سيلين .. خلي اللي يشوف يشوف والله ماني متحركة من هنا نين يطلع مارو وبعدين لبستي مستورة وشعري متغطي ووجهي مكياجه خفيف بكل لي اوامرك انت والكعب اهو سالحته قدامك تعبلي كراعيا
حسن .. به اللي يريحك
وطلع حسن ولحقه ماهر
ماهر.. وين طالع
حسن .. بنشوف محل احذية هنا وحتى كان لقيت ملابس تمام بكل
ماهر باستغراب .. لشنو
حسن .. لسولي
ماهر .. عليش
حسن بغيرة .. ماتشوفش في نظرات اللي خاش وطالع للمصحة .. اهو لقيت محل ملابس واحذاه احذية اخرى
ماهر.. كلا انت غيرتك ماليها حل
حسن .. من جدك انت سولي ماينغارش عليها
ماهر.. في هذي عندك كل الحق
وخذا حسن سروال جينز ابيض وعليه بلوزة ثقيلة شوي طويلة وواسعة شوي لونها ازرق كحلي ووشاح مدمج بين اللونين وكويش ابيض وطلع جابهن لسيلين وسيلين تحت اصرار حسن ومالك خشت لغرفة الممرضات وغيرت دبشها وغسلت وجهها
وطلعت تستنى في مروان اللي خذت العملية بين ايديه خمس ساعات يعني كملت مع الساعة اربعة الفجر وطلع مروان وبلغ اهل المريض ان العملية نجحت ومكنتش فرحة الاهل بس لانهم مايندروش انه كان اصعب اختبار لمروان انه شفى بالكامل بما انه نجح في اكبر اختبار وتلاقاته سيلين بحضن كبير ودموع من فرحتها بيه وبعدها فكوها منه مالك وحسن وماهر وتغمروه حتى هما وبعد ماهدو واطمن مروان على المريض انهم حطوه في العناية الفائقة وطلع معاهم وكانت الساعة السبعة الصبح ووصلو للشقة بطالة بعد ماطمنو رحمة على مروان ورقدو كلهم من التعب وناضو مع الساعة 2 الظهر تحت اصرار رنين اكرم على جرس الشقة ناض مالك وفطن بالباب وفتحه
اكرم .. صح النوم لتو راقدين
مالك بصوت ناعس .. تي نحن رقدنا الصبح اليوم
اكرم .. خش نوض سولي خواتك دايرات حالة عشان سولي ماتردش على فونها
مالك .. به خش انت
اكرم .. لا بنعدي انا يادوب نوصل لحوش خالك (اهل عماد) ونجيب زهرة وجوري من عندهم تكون سولي وتت روحها بيش ناخذها معاهن ونحطهن في الكوافيرة
مالك .. من تو
اكرم .. في زحمة طرابلس يادوب نوصلهن ناخذهن ونرد هنا تكون الساعة وصلت الاربعة
مالك .. به تو نوضهم كلهم
اكرم .. هي سلام
أنت تقرأ
( سلسلة البيوت اسرار) الجزء الثاني بعنوان رائحة الروح
Romanceوجع و خيانة وحب والم وفراق واختبارات ياترى هل سوف يكون لقاء وسعادة ام يكون الفراق هو المكتوب.. حياة التنزيل يومي بإذن الله
