#رائحة_الروح
الفصل الثاني والعشرين
(حمزة)
ياسمين .. كيف مانبكيش وانا قطعة مني تتوجع ومقهورة حسبي الله ونعم الوكيل
حمزة .. الحمدلله على كل حال يا امي غير بالله عليك ردي بالك تقولي حاجة لباتي مش حيتحمل حاجة زي هكي مهما انكان هيا بنت اخته
ياسمين تمسح في دموعها .. اكيد ياحبيبي اكيد كون هاني خش ارتاح انت شوي مابين العشا وتا وانا نخش لباتك نحكيله واستعد لعتابه ليك
حمزة .. حاضر يا امي
وخشيت لداري وقديش حسيت براحة بكلامي مع امي اللي ماقدرت ندس عليها شئ وعلى طول فتحت درجي اللي قافله بيش ماحد يشوف اللي فيه وطلعت صورة منه وقعدت نحكي معاها مع زمردتي ونشكي ليها زي كل مرة وجعي والمي واريافي عليها وقديش متمني نشوفها ثلاثة سنين ماشفتهاش حتى بالصدفة ورغم اني نتلاقى ديمة مع خوها لكن ماقدرتش نسئله عليها
مش لاني خفت منه لكن خفت من رده انها سعيدة ومتهنية وان عندها عيال وانا نزيد ننقهر بفراقها رغم اني متمني ليها انها تكون حياتها احلى من حياتي وتمددت على سريري ومانندريش على روحي الا وانا راقد
محي الدين .. بالثلاثة طلقها وليش ماقدرش يشد اعصابه
ياسمين .. هذا هو اللي صار واللي حكاه ليا حمزة
محي الدين بنظرة مكر .. ياسمين انتي رفيقتي من 22 سنة ونعرفك كويس لما تكذبي عليا
ياسمين .. بس انا ماكذبتش
محي الدين .. ياسمين
ياسمين .. محي الدين
محي الدين .. خلاص يا ياسمين مانيش ضاغط عليك وطالما ماتكلمتيش معناها حمزة مايبينيش نعلم وبراحته هذي حياته وهو حر فيها و 27 عمره مش صغير واصلا من الاول ندى مش ليه رغم ان في السنة الثانية لزواجه حسيته ارتاح اكثر من السنة الاولى لكن السنة الثالثة كانت غريبة
ياسمين بشك .. كيف
محي الدين .. تحسي ان حمزة طول الوقت شارد ومش معانا حتى لما يكون هنا ومشغول طول الوقت لكن تحسي عقله في مكان ثاني حتى المرات اللي كنا نمشو فيهن لليبيا ونتلاقو مع بعض ومرته تحسيها هيا بروحها متغيرة
ياسمين .. ممكن قصة العيال وانها السبب خلاك تحس انها متغيرة لانها واعرة على الولية يكون العجز فيها
محي الدين .. يعني على الراجل ساهلة
ياسمين .. مش القصد لكن الراجل لما مايكونش منه العيب اول حاجة يفكر فيها الزواج لانه مايبيش نسله ينقطع لكن المرا بطبعها مستحيل تسيب راجلها طالما فيه العيب وترضى بيه هو على كل شئ طبعا الا مارحم ربي
محي الدين .. غريبة تقولي هكي وولدك حمزة اكبر دليل قدامك من لما عرف ان العيب عندها وهو زاد دللها وماقصر معاها في حاجة واللي تبيه تسكت بيه وعلى قد ماتقوله طلقني واتزوج واضنى هو مايبيش وحتى اللي تو صار وطلقها متاكد انه مش سببه العيال
ياسمين وقعدت تبكي اذكرت قهرت ولدها مع حسناته مع اللي كانت مرته وانه كيف كان مراعيها وماخلاش واحد منا يفتح معاها موضوع العيال وفي الاخير تطعنه طعنة قوية غير الحمدلله ولدي ايمانه قوي كنهدا راه شنع بيها قدام اهلها وانتقم لروحه لكن ستر عليها( ومن ستر مؤمن على الارض)
محي الدين وحضن ياسمين .. كنك تبكي
ياسمين .. نبكي على ولدي الطيب اللي عمره ماضر حد ولاعمر زعلنا منه ولاغضب ربه في حاجة حتى السكير محمد جربه وهو عمره مافكر حتى يذوقه ولاعمره فكر في الحرام في البلاد المنحلة العايشين فيها ليش يصرله هكي
محي الدين .. الحمدلله على كل حال الحمدلله على كل حال وربي يعوضه خير
ياسمين .. ماتنساش تتصل باختك
محي الدين .. اكيد حنتصل بيها
ياسمين .. ورد بالك تنقص من قيمة ولدك لان بنتها هي اللي خلاته يدير هكي
محي الدين .. كوني هانية ... ياسمين
ياسمين .. نعم
محي الدين بتنهيدة .. مش جاء الوقت العيال يعلمو بالك حتى يقدرو يساعدوك
ياسمين .. حتى انا فكرت هكي غير قلت نأجلها شوي ماهر تو امتحانات شهادة وحسن حتى هو امتحانات جامعة ومحمد لاهي مع فرح قلت بعد مايكملو نقوللهم كلهم يجو هنا خصوصا اني نبي محي الدين يولد هنا زي اخته بحكم كلنا عندنا الجنسية على الاقل حتى هو ياخذها
محي الدين .. بس حتى لو محي الدين ما نولدش هنا حياخذ الجنسية بحكم ان باته وامه عندهم جنسية
ياسمين .. عارفة بس الولادة هنا تضمن ليه ميزات احسن في المستقبل وفي نفس الوقت فرح لما ولدت ياقوت تعبت واجد وهنا الرعاية احسن
محي الدين .. من الناحية هذي صح
ياسمين .. ماتقساش على حمزة وغلاوتي عندك
محي الدين بحب .. غلاوتك عارفتيها بدون ماتحلفيني وحاضر ياعمري مش حنفتح معاه اي حاجة
أنت تقرأ
( سلسلة البيوت اسرار) الجزء الثاني بعنوان رائحة الروح
Roman d'amourوجع و خيانة وحب والم وفراق واختبارات ياترى هل سوف يكون لقاء وسعادة ام يكون الفراق هو المكتوب.. حياة التنزيل يومي بإذن الله
