( سلسلة البيوت اسرار) الجزء الثاني بعنوان رائحة الروح

الفصل الثالث والثلاثين

#رائحة_الروح
الفصل الثالث والثلاثين

الدكتورة .. عبير
سيلين بتنهيدة .. كانت صديقتي المقربة واللي كنت نسحابها زي نفسي وتفهم فيا من نظرة عيني كنت نحس فيها تحس بوجعي اكثر حتى مني
الدكتورة .. كنتي
سيلين بوجع .. ماتوقعتش ان في ناس تقدر تمثل وتتقن دورها بالدرجة هذي عبير كان غرضها التقرب مني وتعرفت عليا عشان توصل  لمالك وانا بغبائي شجعته على الارتباط بيها ولكن (بتنهيدة) للاسف ماقدرتش نقوله حاجة ماقدرتش نقوله ان صاحبتي اللي نسحابها زي اختي وحبيبتي هي من كانت سبب الفراق بيني وبين حمزة وتعرفي حمزة عمره ماحبها وكنت ديمة ندافع عليها قدامه وهي من كانت تقنع في خوها انه يحبني عشان تكوش على كل شئ يخصني ماتوقعتش انها مادية لدرجة كبيرة وهو كان همها الاول والاخير ومعاها تتصل بيا يوم فاتحتي على عماد بكل وقاحة تبلغني ان عماد هذا اللي نستاهله لان كان صعب عليها انها تشوفني زوجة لحمزة بالذات وحمزة حالته المادية زيي وممكن احسن
ماقدرتش تمنع نفسها من انها تتشمت فيا لان عماد حالته المادية بسيطة اشمتت فيا في الوقت اللي كنت محتاجتها فيه اتكون جنبي صح انا بعدت عليها بالذات بعد ماسمعتها تعارك في خوها انه غبي وضيعني من ايده لان وقتها بغبائي فهمت انها كانت تحبني لدرجة تبيني لخوها بدل حمزة اللي بيسافر بيا بعيد عليها لكن بعدت عليها عشان فراق حمزة مش ساهل عليا وقتها وهي كانت سببه اتصلت وصدمني اتصالها لاني توقعتها تبارك ليا وتلومني عشان باعدتها عليا لكن اتصلت عشان تتشمت في الوقت اللي كانت متأكدة فيه اني مستحيل نقول لمالك حاجة عليها وعلى حقيقتها
الدكتورة .. ليه
سيلين .. لانها كانت تعرفني كويس وعارفة اني مستحيل نكون سبب لوجع مالك واذا عرف بشنو عبير قالت لي او شنو دارت كان حيسيبها وحيزعل واجد عليها لانه يحبها
الدكتورة .. بس هو لدلوقتي ما اتزوجهاش
سيلين .. صح ليه اكثر من خمس سنوات خاطبها ومش حتى عقد قِران وعلى قد كنت مانقوله ليش ماتتزوجش كان يقولي مازال ويهرب من الرد
الدكتورة .. وانتي ازاي حتعيشي معاها في بيت واحد وهي سبب كل الوجع اللي مريتي بيه
سيلين .. زمان لاني كنت متزوجة فكانت زيارتي قليلة مش دائمة غير اني كنت حنقول لبابا يشريلي شقة انا وعماد عشان مانطرش نقعد معاها واجد وحاليا لو تزوجها فعلا حنمشي عند ماما ياسمين
الدكتورة .. اه طيب بس ليه رضيتي بوحدة همها المال ان تكون زوجة لي اخوك 
سيلين .. لاني قلت بالك حب مالك ليها خلاها تحبه مع سنين الخطبة هذين وتقعد حبت مالك لانه مالك مش عشان انه مالك فريد صاحب الفلوس
الدكتورة .. بس مش سبب
سيلين .. تعرفي يا دكتورة صح الحالة المادية لشريك حياتك ليها دور كبير لكن حتى الحب والود والاهتمام يخليك تتحملي كل شئ وعبير مش عيب انها انسانة تحب الفلوس بالذات بوضعهم المادي التعبان وانها تتمنى راجل حالته المادية كويسة واكيد مع العشرة وحب مالك والحياة الكويسة معاه حيخليها تريحه وتهنيه وتحبه صح
الدكتورة .. ممكن