#رائحة_الروح
الفصل الخامس والعشرين
مالك .. سولي حالها مش تمام
حسن بخوف .. كنها
مالك .. الدكتورة قدمت ليها موعد الجلسات زي مادارت مع مروان اول ماجاها دلالة على ان حالتها صعبة وكلنا عارفين مروان كيف مشى ليها
حسن .. يستر الله انا جاي بنحجز ونجي
مالك .. اصلا انا اتصلت بيك على خاطر هكي
حسن .. شنو في يا مالك انطق
مالك .. الدكتورة طالبة حضورك على خاطر عمتي ام سولي
حسن .. شنو
مالك .. اه هكي الدكتورة قالت
حسن .. هي صارت ليها الحالة بسبب عماد
مالك .. قلت ليها الدكتورة الكلام هدا وماخلتنيش نكمل كلامي وقالت ان القصة اللي صارت لسيلين مع طليقها هي اللي كملت عليها لكن سيلين تعاني من قبل ومع التراكمات صارت ليها الحالة هذي
حسن .. خلاص جاي جاي اصلا انا كنت الجلسة الجاية بنجي معاها بنشاور الدكتورة على موضوع امها لان في حاجة لازم تعلمها
مالك .. شنو يا باتي قولي بيش نساعدك
حسن .. اكيد حتعلم انت وخواتك غير خليني نطلع نشوف حجز
مالك .. تلقى يا باتي بعد ساعتين في طيارة للاسكندرية
حسن .. خلاص هي سلام
وانا بعد التعب النفسي اللي حسيت بيه
والمهدئ اللي عطاته ليا الدكتورة مافطنتش الا بعد المغرب ونضت جعانة واجد وحاسة باني مرتاحة وتوقعت اني حنتكلم خصوصا اني كتبت للدكتورة اللي عمري ماحكيته لحد حتى لحبيبي اللي قبل مانتزوج ولا حتى عماد لكن للاسف ماقدرتش نتكلم وطلعت بلوحي اللي اصبح ملازم لي زي نفسي غير المرة هذي لوح الكتروني Hp زي اللي يستخدمو فيه مصممين الازياء ونكتب عليه ب قلم على الاقل منظره حلو وفي نفس الوقت نقدر نفتح عليه النت وشاشته كبيرة ورقيق وخفيف مش ثقيل غير ان مالك جابلي ليه غلاف يهبل انثوي
سيلين كتبت ( السلام عليكم)
مروان ومالك .. وعليكم السلام
مروان .. كيف حالك تو
سيلين كتبت ( جعانة واجد)
مروان بضحكة .. عاداك مالك شكله
سيلين كتبت ( شكله ها شنو بتوكلوني )
مروان .. هي جهزي روحك بنوكلك كشري مافيش احلى منه
مالك .. كشري ياظالم
مروان .. وكنه الكشري
مالك .. نبي كباب وكفتة
مروان .. وانتي سولي
سيلين كتبت ( اللي تبوه انا معاكم كشري معاكم كباب وكفته معاكم مكرونة امبكبكة معاكم المهم انا جعانة والله لو كان طرب )
مروان بضحكة .. ياظالمة طرب وعشاء ومعاها اللي تبوه
سيلين ضحكت وهزيت كتوفي بمعنى مادخلنيش
مالك .. غيري دبشك هي
سيلين كتبت (باهي )
وخشيت غيرت دبشي ولان ماخاطريش نغير ونفتلك لبست سروال ابيض وعليه تيشرت ابيض ولبست وشاح مخربش ابيض وبيج وبني وبشت بيج وكويش ابيض وطلعت بدون مانحط على وجهي حاجة رغم اني حسيته شاحب
وطلعنا وتعشينا خذا لنا مروان كشري ومعاه كباب وكفته وطرب وعدينا للكورنيش وقمعزنا كلينا وغيرت جو بالذات لما حسيت تحسن مروان الواضح ولله الحمد وكيف نفسه مفتوحة للحياة فرحت بيه ونسيت روحي وهمي ومشكلتي وفي نفس الوقت بابا اتصل بمالك وعدى بيجيبه من المطار وانا ومروان قعدنا عشان مروان قال تغيير الجو كويس لي وفعلا قعد مروان يحكي واكثر شئ ريحني انه يحكي على بنته بدون مايتأثر زي قبل وينهار صح واضح في حزن في صوته لكن مش انهيار فحمدت ربي واجد
أنت تقرأ
( سلسلة البيوت اسرار) الجزء الثاني بعنوان رائحة الروح
Romanceوجع و خيانة وحب والم وفراق واختبارات ياترى هل سوف يكون لقاء وسعادة ام يكون الفراق هو المكتوب.. حياة التنزيل يومي بإذن الله
