ثراء النفوس

مخططات زواج

حبايب اعتذر عالانقطاع 

هذا بارت وبالليل تكملته 😘😘

..........

سراج:
بعد اخر مشكلة صارت بيني وبين هدى ووصلت للطلاق عمامي كلهم تدخلوا وشلون وعيب والناس تاكل وجوهنا وشلون تطلق بنت عمك ومن هالسوالف اللي لا تودي ولا تجيب

ما يعرفون المعاناة وياها وشكد تحملتها وكله جبر خواطر مره عمي ومره لابنه لان همه نفسهم مو راضين عاللي تسوي بس كل شي واله حد وهي تمادت وهالمره هجرتها مدة مو قليلة بس ابويه ما قبل اطلقها كال مهما يكون هاي راجعه النا وعيبة بحقها اذا طلقتها وانت ابن عمها واذا تريد تزوج عليها واتركها ولا تسأل عنها وعمامي نفس الرأي وشاروا عليه اتزوج عليها اللي تراعيني وتراعي اهلي وعلى قولهم ما تكسر المره الا المره

وبديت افتح عيوني للزواج مره ثانية وادور عاللي تفيدني والعمام رجعوا عرضوا بناتهم الي واخت عمار ابو نصير نسيبي رجعت مقابيلي وهالمره مقتنع لان امي وخالتي بعد ما يبطلن اذا ما اخذها على فكرة ابويه وعمي ماخذين اخوات يعني ابو نصير ابن عمنا وبنفس الوقت ابن خالتنا 

بنت عمي شكلها مو كلش حلو مثل ما كلت لكن عاقلة وتفكر صح ما اكول فقيرة الله ما يجرع لسانها بس تعرف الاصول بين قوسين سباعية تخرجت هاي السنة من الكلية ونادرة وشاطرة على قول امي واختي بس مشكلتي ما اريد اتورط مره ثانية ويه العمام واتفاشل ولو ويه بيت عمي ابو عمار ما اتفاشل ابد اذا خالفت وراها ام واب يردوها وان ما رجعت فعمار ابو نصير رغم اني وهو عداوة وما نتراهم بس متأكد منه هو يتكفل بيها والمشاكل مستبعدة بحالتنا

رحت اشوفها وسعاد عزمتني بوحدة من اجازاتي بس اللي انصدمت بي غفران من نفسها القديمة اللي عرضوها عليه متغيرة كلش صايرة اكبر واوعى وبصراحة احلى هي كل الفترة اللي فاتت تتجنب نلتقي وحقها اني بديت الحجر عالياقوت واستحق الصد هسه

فكرت كلت اي شكو بيها امها تكول الي اذا رايدها انت اولى من الغريب الظاهر اكو غريب ويريدون يبدون ابن عمها عليه

صار الكلام واتفقنا ننخطب باقرب وقت لكن هي احسها مو يمي اصلا ما ترضى تباوع بوجهي عرفت وراها مشاكل راح تنضاف لرصيد مشاكلي

لمى:
مرت الايام واني اشتغل ببيت ابو اسعد واروح وارجع مشي لبيت اهلي مرتاحة كلش والحجي والحجية ما عاملوني ابد بأقلية بالعكس صرت نفر منهم لما سراج ما موجود اكلي وكعدتي كلها يمهم وهمه اذا كنت بالمطبخ يجون ويايه واكثر من مره يتمرضون وماكو اولادهم ابات وياهم وحتى صار اتصالهم وطلبهم لاولادهم وبناتهم اقل من قبل يعني فعلا حسيت همه مثل امي وابويه 

بيوم رجعت منهم دا امشي وصلت بباب جيران اهلي وشفت سيارة حديثة طابكة بطريقي وواكف يمها شاب من بعيد ما عرفته لما اقتربت ميزته مصطفى كعبول
صارلي كومة ما شايفته عود والله وصاير رجال كعبول مريت من يمه واني مدنكةواستغربت وجوده هنا والوقت مغربية وفرعنا بهيج وقت تقريبا يفرغ