ثراء النفوس

عقاب

متابعيني الاحبة هذا جزء والباقي بالليل مثل موعدنا البارحة 😘😘

https://www.wattpad.com/user/Nsreen_94

تابعوا الكاتبة نسرين الجبوري انصحكم بقراءة قصصها ورابطها هذا فوك 👆 @Nsreen_94 😘😘

.........

فاتن :
حبيسة غرفتي صار اسبوع عقاب من بابا اللي هو الارحم كان باهلي ...من يوم ابو منتصر لما هد عليه ووكعت بايده لان صحتي كانت بعدها تعبانة اثر الاسقاط ونومة المستشفى .. طلعت روحي بايده لولا رحمة ربي وتدخل بابا وخلصني من اخواني بس فرض عليه اكون حبيسة هالغرفة 

طلعتي من المستشفى صارت قبل هالايام واهلي كلهم انخبصوا بيه وبابا حالته حاله مكابلني وكاعد حتى الاكل صار هو اللي يجيبه لما شافني مريضة كلش ووضعي بهالسوء ضايج ومقهور عليه ويكول نطلكها منه ويغلط عليه وعلى اهله اسمع واغلس اذا هو عرف اللي سويته يذبحني يمكن سكتت من خوفي منه ومن اخواني ما اكدر هسه اتحمل ضربهم وجسمي لساه ما تعافى من ضرب هشام..

بعدها توها ردت عافيتي وسمعتهم بالصدفة واني فايتة من باب الاستقبال يدبرون تهمة لهشام ما يطلع منها بعد ويحولون قضيته من شكوى اعتيادية واعتداء بالضرب الى تهمة تنيمه بالسجون 

فتحت الباب وبدون وعي اعترفت بكل شي وما حسبت حساب للي يصير كل همي كان هشام ولا يأذوه وادري بيهم قساة وشايلين عليه ومحملين منه هواي وضربه الي بهالشكل اهانة الهم 

بعدني كلت صور وسراج ما شوف غير كف ابو منتصر لطمني على حلكي وما اعرف الضرب منين يجي اخواني كلهم واكفين يباوعوني انضرب وكمت تدخلوا ابد ولا احد خلصني 

امي شمرت نفسها فوكايه وسعاد اجتي تسحب بزوجها وبناته بأبوهم يتوسلون يتركني بس هيهات عمار من يفقد بعد ما يوكف

سحلني من شعري اكوم واعثر ويرجع يشيلني من شعري يوكفني واني جسمي اصلا بايد بسبب وضعي الصحي المتردي ..ما ادري وين ماخذني لحد ما وصلنا غرفتهم وجر مسدسه من المجر وحطه براسي يريد يكتلني بس ايد والدي الرحيمة كانت اقرب الي من الموت جرني من ايد عمار وصرت بلمحة عين خاتلة وراه وكامشته من ضهره

ما اسولف الكم كم الشتائم والضربات اللي تلقيتها بيومها وصفيت وحدي محبوسة بغرفتي امي تجيب الاكل وتخاف تحاجيني ناهين اي احد غيرها يفوت لغرفتي ..
بيت عمي ابو اسعد تدخلوا وسراج لان رجال كان وضعه مختلف كدر يدافع عن نفسه وموقفه والصور اللي عنده بموبايله انمسحت كدامهم ببساطة واني متأكدة سراج عنده غيرهم مئات للمى وما صار غير لوم وعتب وشلون هيج يسوي وما تحاسب لان اصلا هو من البداية الموضوع مو مثل ما فسروه هشام ولمى وكانت المحادثة مقطوعة لخوفي من هشام لان سراج كان يمازحني طول الوقت يكول اذا ارسلتي الي اي صورة بيها صور لمى راح اهددكم بيهن واخذها من عيونكم واني ما دزيت بالبداية بس بعدين انقهرت عليه وادريه ميت عليها دزيت صورتين كنا بيها اثنينا من يوم الحنة وهي اول وتالي محجبة وما رضت تنزع حجابها ابد بالحفلة...