ثراء النفوس

خطط😈😈

لمى :
دخلت وره الحجية اللي صاحتني وفتت جوه وتلكاني الحجي بضحك وشقى مثل قبل ولكيت زوجة اسعد يمهم وبناته خطيه تاركين بيتهم صار فترة من سراج طلك زوجته وهمه اجوي عود هذيج كانت تداريهم وهسه ماكو هي لنفسها اكل ما كانت تدبر 

عايفين حياتهم كاعدين وين اهله حتى يداروهم واسعد كلش متبهذل بالروحة والجية لان شغله بغير محافظة يداوم ببغداد ويروح ويرجع دوامه يومي متبهذلين اخر بهذلة وبناتهم عدهم عطلة اخر السنة والمدارس صارت عالابواب ويريدون يرجعون هذا اللي افتهمته يعني ما ينتقلون لهنا بصورة كاملة 

سعاد متزوجة قريب بنفس المنطقة عند بيت عمهم بس بيتها كبير ومسؤولة عن عيال وجياتها قليلة لان عيالها ما يقبلون تجي هوايه وتتركهم
احمد وزوجته ما يجون الا للضرورة اثنينهم موظفين والمشكلة مستقرين بالعمارة اصلا وسارة متزوجة هم هناك فترة من حياتهم قاضيها بالعمارة ويحبوها حيل بس سراج من راجعين اهله راجع لهنا واسعد بحكم شغله منتقل ببغداد

رحت للمطبخ اشوف شغلي والحجية تمشي ويايه وتسولف كنت ضايجة بعدني من تصرفات سراج واسعد هاي امهم كل شي ما بيها سووها واكعة بالفراش وتحتاج مراعاة
كنت معترضة عالاسلوب اللي اتبعوه بس اني بداخلي رجعت حتى اوفي ديوني لبيداء وعلي اللي صارت ثكيلة عليه وما اكدر اوفيها الهم

بديت احضر غداهم والحجية يمي بالمطبخ وزوجة اسعد كانت تركض تلملم اغراضهم يرجعون اباوع الحجية انقهرت بس ساكتة وكل ما يفوت ويطلع اسعد تباوع وراه وكأنه عيونها تنطق تكول اله ابقى هنا بس مراعية ظروفهم وساكتة

اني من يمي ضجت الام تخلف وتربي وتاليتها تتفرج على اولادها يبتعدون عنها واكدت افكاري بصوتها الناصي
-هاي تاليتها ربيتهم بتعب وسهر ومرض تالي اباوع وراهم واتحسر ماكو احد يرضى يكعد هنا نسوانهم ما تريد تسكن بقفص ولا تكعد ويه عمها وعمتها وهاي عود الكرايب ما تكول عمي منو اله 

بقيت ساكتة ما اتدخل ولا احجي همه اهل اني شلي دخل بينهم ابد ما تدخلت بيوم بيناتهم

دخل اسعد وكعد يمها واسمعها تحجي على سوسن كدامه وهو يتعذر لزوجته وهي ما قابلة باعذاره تريدهم يكعدون وياهم بالاخير استسلمت وبقت تندعي اله بالسعادة وراحة البال الام لو شما يسوي البشر تبقى تريده مرتاح وسعيد وبالمقابل محديفكر بيها وبراحتها

طلعوا بيت اسعد والحجية بدت تبجي اجيت اواسيها تالي سكتت واني منو اني الخادمة مالتهم ما الي حق اتدخل بامورهم العائلية

حطيت الهم الاكل والحجي اتصل بسراج ينزل ياكل هذا الحاضر الغائب مدري شعدهم بالطابق الثاني يمكن الدرج بي لزك يلزكون بي

اني انسحبت للمطبخ بمجرد سماعي اسمه يا الله شوكت يروح لدوامه واخلص

بقيت بالمطبخ وره فترة دخل سراج شايل الصينية خلاها عالميز وكفت اعزلها وهو بقى واكف بمكانه ما شلت راسي ولا اهتميت لوجوده