ثراء النفوس

ايار ⚘⚘

حبايب هذا بارت وبالليل ان شاء الله ثاني 😘😘

التقينا اني وسراج مرات مو مرة وحدة بعد زواج اخويه وتقاربنا من اهل فاتن اكثر صار المبعوث الرسمي لامه وخالته وعمه وخوات فاتن واهلها كلهم كل يوم جاي لبيتنا بحجة شكل بسبعة عروستنا شفته اكثر من العروس يمكن كل شويه وطافر ببيتنا ومضايقات سعاد الي ما تنتهي مره تنزلني اخذ فساتين فاتن منه و مره استقبل الحجية جدتهم لان ما تكدر تمشي خبلوني بيومها كثر ما خلوني التقي بي وهو بكل مره يتحجج يريد يحاجيني واني انهزم بسرعة

تاليتها قفلت وحتى من طلعوا ما وصلتهم ويه امي وخالتي لان اكيد سراج جاي دا ياخذ الفيلق مال شاباتهم ونسوانهم اللي اجونا بيومها واني عاندت امي وبقيت بالمطبخ بحجة التعزيل ما ودعتهن وهي تكول فشلة هسه يحجون عليج ولا اهتميت ولا طلعت

بيوم عزيمة اهلها اني ما رضيت اروح وابقى وحدي ببيت اهلي وهشام بقى يلح ويايه هو وفاتن ورحنا كلنا وبيومها اكلت اصابعي ندم 

اول شغلة الحضور كان فوك المتوقع عمامهم ونسابتهم وحتى ناس مدري شيصيرولهم هم حاضرين انعزلنا نسوان وحد وزلم وحد وكلت اي هيج حلو همزين ماكو اي اختلاط ولا نشوفهم اشو هاي صارت عكس شفنا ولدهم كلهم وكل شويه واحد طافر يمنا يسلم على جدتهم ويكعد يسولف ويضحك 

كلها بكوم ولما دخل سراج اجا وكعد ومدد رجليه ويه رجلين جدته وبسط يمنا ويضحك ويسولف امه وخالته وجدته والباقيات بين اخت وبنت عم بس اني غريبة حتى امي صارت اقاربه وبوسها من راسها 

لما كام يطلع خالته تدعي اله بزوجة صالحة وهو يكول امين وهاي كاعدة هي وياكم بس توافق وغمز لجدته وطلع واستلمتني جدتهم بعد ما صرفت كل احفادها وبقت بس بناتها ام اسعد وام عمار واختهن الجبيرة وزوجة اخوهن لان تصير عمته لسراج يعني استلموني مكابل هاي تكول سراج وين اكو منه وهاي تقنع ويمدحون بي ويرغبوني بالزواج وهذا الحجي امي كاعدة وتسمع وساكتة الظاهر مقنعيها بديت احس بغربة وامي كاعدة يمي المفروض تحميني بس اشو اخذت جانب الصمت وتهز براسها وبس 

دخلت فاتن نادتني واني طرت من الفرح كلت الحمد لله راح تنقذني لان كنت على بعد ثواني عن الموافقة على سراج ومو بس هيج يجوز اني راح اروح لابوه هسه اخطبه بس الحمد لله فاتن تدخلت 

طلعت طايره وراها واخذتني للحديقة الخلفية كاعدات خوات سراج وزوجة اسعد وخواتها الكبار واني فرحت عالاقل سوسن زوجة اسعد موجودة وهي حبابة واني انطلق وياها بس ما دامت كعدتهم غير دقايق وبدوا يتسربون كل شويه وحدة تفوت للبيت تالي بقينا كاعدين اني وسوسن وحدنا اللي نادتها سعاد وكامت دخلت وكالت هسه اجي انتظريني
بقيت بمكاني اتأمل بحديقتهم ما شاء الله هاي حديقة خلفية للبيت وهيج الامامية شلون صايره