ثراء النفوس

نيسان💘

لمى :
الايام اللي بعد خطوبة هشام وفاتن وتجهيزهم لعرسهم وخبصتنا بالبيت اثاث غرفة هشام وصبغها وغيره من الشغلات هوايه تعبتنا وهشام راد غرفتهم كلش راقية حبيبي ما راد يقصر ويه خطيبته بنت العز وما رادها تشوف اللي يجيبه قليل رغم لحد الان واحنا حالتنا وسط ما اغتنينا وبيتنا على كد حالنا اثاثنا القديم نفسه وفلوسنا كلها حطيناها بشراء البيت وخطبة هشام والذهب وهالامور

راد خطيبته تحس هي اميرته ولو بيده ويتمكن يمكن يشتريلها كل اللي عند اهلها نفسه

تعاركوا قبل زواجهم بأيام قليلة وفاتن الغبية قاهرته وزعلان وبقت تتوسل بيه اتدخل وهي حتى الي شاملتني بعركتهم وزعلهم هههه هسه الواحد غصب يرضى بواحد ما يريده واني ما اريد سراج والحمد لله هو افتهم وما سواها عناد بهشام وانطوه فاتن بس

فاتن تتوسل احجي ويه هشام واني استحي افتح الموضوع وياه شلي دخل اني عركتهم يحلوها بينهم

كنت اشوفها شلون تلوب تريد تراضيه وهو معاند اخويه واعرف راسه اليابس وهي هم بعد ما مقصرة وياه بس شغلة وحدة اللي متأكدين منها هو ما راح يبطل ولا يفركش الزواج ولساه متمسك بالموعد ويحضر ويروح ويجي بس ما يحجي وياها واذا راد يوصل الها كلام لو يسألها عن رايها بشي عن طريقي وما يحجي وياها مباشر اووف من العناد اللي عدنا واني صرت مثل المراسل بينهم 

اذا تريد تحجي وياه تجيني واذا هو راد شي يجيني دوخوا راسي لحد ما صار يوم عرسهم بحيث تعبت حتى عركة تأجير البدلات والصالون بينهم اني حليتها هي تريد بنفس منطقتنا وتكول ما اكلفه هوايه وهو مصمم الحنة والعرس والبدلات والصالون كله ببغداد وتعاركوا وهي تبجي تكول بطلت ما اتزوج وهو يعيط عليها يكول الها مو تكولين اقل من اخواتج انت واخواتج تتحملين بعد

مشاكلهم ما انحلت الا لما وصلنا ليوم العرس واول ابتسامة يبتسموها مخابيلنا كانت بصورة عرسهم همزين كلت راح يتمالخون بالفندق ويخزونا اليوم هالنوب هشومه عاند الا فندق اتذكر سوالف بيبيتها ام امها لفاتن واضحك يبوو خزتنا من سمعت يريد بالفندق شلون نوديهم فندق وشلون وشلون ضلت تحجي مفضوح تكول بالمعنى لان ما اكدر انقل كلامها بالنص ما يدبروها الا فنادق🙈🙈
بحيث امي طردتني من الغرفة من كانت تحجي ومنطلقة تخاف على اخلاقي اللي انتهت بعد هههههه 

مو فترة خطوبة فترة دفر كضوها مصارعة حرة مو ايام خطوبة اني سامعة الخطوبة تكون احلى ايام العمر همه خطوبتهم كانت اصعب ايامهم
انتهت مشاكلهم بهلاهلنا وركصنا بهاليوم وبدت مشاكلي اني

وكفنا بالريسبشن تبع الفندق نسلم عليهم ونرجع خوات فاتن بوسوها وراحوا اول شي وبقت امها وخالتها ام اسعد وسعاد وغفران وزوجها 

سلمت اني عليهم ودمعتي بطارف عيني اتي بهالمواقف مدري شيجيني ابجي وما ادري ليش خوات العروس ساكتات واني ابجي ويضحكون عليه كاموا وهشام يحضن بيه ويبوس بيه عبالك بنته مو اخته واني استحيت العالم تباوع علينا
-كافي هشومي عفيه تره الناس يتفرجون علينا واخاف هاي فاتن الخبلة تضوج هههه
-خلي تضوج شكو غيرانة تريد ابوسها هي هم ويغمز الها وهي تدنك تخجل اووي فدوة ينكرطون