ثراء النفوس

تخطيط🤔

لمى:
تركت بيت ابو اسعد ورجعت لبيتنا وامي كل شويه مره تحجي عليه لان ما رضيت اصعد ويه سراج وعاندت اروح للمستشفى و مره تحقق ويايه اخاف احد سوالي شي وترجع تكول امهم بقت تتوسل بيه ما تريد ابطل بس اني قفلت بعد

والمره الثانية رجعت بيها الراتب بايد علي وبيداء اللي فرحت لان بطلت من الشغل عند بيت خاله لزوجها تكول مو لايق الج تشتغلين هيج ما تدري الحال شلونه

اجونا الحجي والحجية وهالمره حاولوا واني رفضت وتحججت بأخويه هشام ما راضي عن شغلي وهاي الحقيقة اني ما كذبت لان هشام كل ما امي تروح اله يسألها بطلت وتجاوبه بنعم كذبنا عليه سودة بوجهي كله بسببي وغبائي راح اخسره هسه كل شي ما اريد المهم عندي اترك بيت ابو اسعد

وبطلت وبديت ادور شغل وماكو تالي حصلت شغلة بروضة اهليه بمركز القضاء واروح وارجع سيارات والراتب يادوب يزيد منه القليل اوفره لمحامي هشام اللي لحد هسه ما بطلنا منه في سبيل نطلع هشام من سجنه

ام اسعد بقت تتواصل ويانا وبين فترة وثانية تجي وتشتري خبز من امي وتوصي على اكل اسوي اني الهم ما انقطعت عنهم ابد خطية ايام طويلة اولادهم ماكو وهمه اعتمدوا عليه كل الفترة اللي فاتت

اليوم دخلت سمعت حسهم ببيت اهلي وضحكت صايرين مقيمين ويه امي وابويه الظاهر راح اتبناهم هههه دخلت الحجي كاعد يم ابويه بالهول يسولفون
-السلام عليكم
ردوا السلام وابو اسعد بده بمحاولاته الفاشلة حتى ارجع اشتغل عدهم
ابو اسعد:هلا بويه لمى شلونج شغلج شلونه
لمى: الحمد لله والله الشغل زين لو ما البعد والطريق
ابو اسعد:ما الله يهديج ترجعين يمنا والراتب اللي تاخذيه انطيج ضعفه
سكتت ما يدري راتبي الحالي ما يساوي ربع االي كانوا ينطوه الي
-لا حجي مو قضية فلوس بس اشتغلت بأختصاصي وشهادتي لعد المن درست
الاب:اي صح لازم تشتغل بالتعليم
ابو اسعد:وين اختصاصها هذا وهي تعلم بروضة وهي مدرسة يابه اخاف عبالج احنا نقلل من قيمتج لا والله انت اعز من خلفتنا صرتي ومأمنين بيج والحجية تكول والله لو غيرها من الباب ما افوتها واذا احد مضوجج منا كولي بنيتي اني حسبة ابوج

الاب:لا ابو اسعد ليش تضوج منكم بس انت اعذرنا اخوها مو راضي ودوامها هذا هم زين وان شاء الله يطلع تعيينها هي قدمت قبل شكم يوم

ابو اسعد:خير ان شاء الله يكولون هالتعيينات فرصها اكثر
لمى:الله يسمع منك حجي غير اطير من الفرح بصراحة فاقدين امل التعيين
ابو اسعد :لا الله كريم ان شاء الله راح اخلي سراج يحجي ويه معارفه وان شاء الله اساعدج بنيتي