ثراء النفوس

خلاف واختلاف

حبايبي متابعيني 😘😘
احييكم✋✋

بارت متعب ونشر متأخر وانتظر مكافأت وحوافز😁😁

يلا اقروا واستمعوا للاغنيه ولسراج ومشاتره ويه قراءة البارت😍😍

🌺🌺🌺🌺🌺🌺🌺

لمى:

كنت بهذيج الايام اقل شغله تقهرني وانزعج لان صرت احس بروحي غير مرغوب بوجودي وخاصه لما تجي ساره اكره حتى كعدتي بالبيت وتسلط سراج ورفضه روحتي لاهلي ومحتاره بين توصياته على البيت وعلى امه وبين موقف امه اللي تميل لبنتها وتسمع منها وساره وحده كذابه خبيثة تجي لبيت اهلها وتحقر وياي بكل الطرق وشكد احاول اضبط نفسي ما اكدر تخليني اعصب وبالتالي عمتي تنزعج مره واثنين وثلاث تتهمني اتهجم عليها وتروح تتمسكن وشكم دمعه تحرك بيهم امها عليه واشكي لسراج ويكول تحمليها لحد ما ارجع واني اتصرف 

واسكت وسراج ماكو واني ضيعت حتى مشاعري مرات احبه مرات احقد عليه لان هو سبب اللي اني بيه صارت تجيني خنكه ويضيج عليه البيت كل ما تجي تسمم حياتي وهي كل اسبوعين تجي وتضل كومه بحجة تداري امها وحتى بهاي هم تخبث 

اتصالي بسراج كان يومي كل شي يسأل حتى ابسط تفاصيل يريدها الاكل لبسي الاحاديث اللي تدور بالبيت ويسمع مني واني اشتكي من تعب الشغل ومن مشاكلي ويه اهله ويردد كلامه المعهود حلوة من تعصبين ويضحك من اكوم ابجي ويكول انت مكانج ما يصح بين امي واخواتي

انتبهت فعلا امه واخواته ما عدهم بقاموسهم شي اسمه بكاء لسبب مهما يكون قوي ....قويات جلدات وخاصه ساره خاليه من اي مشاعر متجردة من اي عواطف اذا اطفالها ضوجوها تسويهم وصل مسح من كثر الشحط قاسيه الى درجة مخيفه ولسانها اذا انطلق على بشر مو طبيعيه ابد

سراج لما يتصل يمسح اتصاله كل تعب وارهاق وضغط بكلمات معسوله وغزل وكان اتصاله فترة الراحه بيومي المتعب بين دوام ومسؤلية بيت كبير رغم سوسن واني بي ما نلحك مرات لان اني دوامي من السبعة الصبح لحد ٣ العصر وارجع تعبانه واستلم شفت المساء شغل وتنظيف وكراب

سراج كل ما يتصل يعيد نفس الكلام لو جايه وياي وماخذين هالاجازة سويه واني اتندم واعض اصابعي وازيد لوم بروحي بس بالواقع ما اكدر اخذ اجازة مثل هاي واني ما كملت سنه بوظيفتي ما مسموح بهيج اجازة الي واضافه للدراسه اللي اخذت هواي من وقتي وما رضيت اتنازل عنها حتى اصعد درجتي الوظيفيه وادخل ضمن كادر تدريسيين كليتي نفسها واخذ حقوقي اللي انحرمت منها مسبقا كلها امور منعت سفري
اذا اسافر انسى وظيفتي وانسى دراستي واشتري سراج اللي ما اعرف منه بس كلمات احبج وحبيبتي وخايفه لا اتوهم بيهن وانخدع

كان اتصاله عباره عن كلام ياخذ العقول ويسحر الالباب ويقيد المشاعر ويأسرها بطوع تصرفه ويوجها مثل ما يريد بحيث مرات انسى نفسي واتعجب عالكلام اللي اكوله منين وشلون اتجرأ احجي هيج بس بعد بين الاحباب تسقط الاداب واحد من اتصالاته كان الاشد وقعا بقلبي والاكثر تأثير بهذاك اليوم ملتهيه اشتغل وامه كاعده يمي واتصل المغرب على غير عادته وامه شافتني تعذرته مرتين واجلت الاتصال عالليل وطلعت حاطه اذنها وفكرها يمنا