ثراء النفوس

مواقف 😒😒

لمى:
انشغلنا بترتيبات المولد اللي ام اسعد كل سنه تسويه والمنطقة تسولف باللي توزعه خلال هاليوم

كانت التحضيرات طول الاسبوع متعبة جدا والحجية ويايه خطيه طبعا الشي الحلو ام اسعد صح اني المفروض اشتغل بالبيت وواجبي بس هي اللي تكدر عليه وهي كاعدة تسوي واني عليه المشي 

يوم تعاونا سوينا مدري شكم الف كباية بطلت اعد ويوم طحنت ١٠كيلوات تمن عنبر موصى مخصوص الها من النجف جابوه للحلاوة ويوم جابت مواد الكليجة جفلت من كثرتها يعني مدري شنو احجي عنهم بس عدهم داء اسمه بذخ وتبذير مو طبيعي خلتني اعجن كليجة بالطشت طشتين عجنت طلعت دبسي بيومها 😭وحتى امي اجتي ويانا بهذاك اليوم ونسوان اقاربهم من المنطقة دزت عليهم يساعدونا المهم هي بيها طبع كل التحضيرات لازم بالبيت ما تجيب جاهز اللي عرفته بكل سنه بناتها يجون قبل اسبوع هالمره المهضومة اني موجودة 

طبعا هاي الفوك مثل الغول تنام للظهر ومن تكعد تتريك وترجع تصعد وتبقى لحد المغرب ما تنزل الا للاكل بس عود صايرة احسن تسلم على بيت عمها وتوكف تسولف شويه يمهم وتسأل شلونكم وتصعد 

اخذنا الحجي للسوق واشترينا احتياجات العزيمة كلها اللي سبق وسجلناهم بورقة حتى لا ننسى شي
كنت مستغربة محد هيج يسوي مولد الا اذا عنده نذر مستعصي ولما رجعنا للبيت سألتها للحجية عن افكاري

-حجية اني سامعه انت ناذرة كل سنة تسوين عزيمة ومولد وتوزعين اكل بس ما اعرف السبب
دنكت وابتسمت ورجعت تسولف
-والله يا بنيتي سالفته طويلة
-وهاي احنا نشتغل شكو عدنا كاعدين واسمعج
-اني والحجي كنا واحد يحب الثاني وهو ابن عمي

فتحت عيوني وحلكي عليها اسمع قصتهم لان احب القصص الرومانس وهي والحجي كاتلني الفضول وياهم هههه
-كنت صغيرة بعدني واصغر اهلي وابويه رجال متمكن كلش اراضي وكياعين وحلال ما ينعد خير من الله وعمج ابو اسعد هم اهله مثل اهلي وهم عدهم خير بس اقل من اهلي

اللي شجعنا اختي ام عمار تزوجت اخو ابو اسعد قبلنه وما اعترض ابوي وانطاهم لان ابن عمها واولى من الغريب بس اني مثل ما كلت الصغيرة ببناته وعمري كان صغير كلش 

ابويه بهذاك الوقت كان قاسي جلد ما تهمه بس فلوسه والكاع وشلون يكبرها فلما تقدم ابو اسعد وجايب عمامي وياه ابويه ما طلب فلوس مهر كال الهم سياكها(مهرها)كاع الربوة وهنا عمامي تخبلوا ووكفوا لحيلهم وصار مصايح
هالكاع كانت اكبر واحسن الكيعان وتابعة لجدي مو لابناءه يعني الكل يتنازلون عنها لازم يلا تصير اله وهي اصلا ما تقسمت لان اصلها طريق الهم ولكيعانهم وبساتينهم وهمه يعرفون ابويه الله يرحمه شكد راح يعوفها طريق
من حرقة قلبهم وحتى يردون عليه الاذية نهوني لولد عمي وحتى لو عجوز ويريد يزوجني اني ما اصير الا الهم لو ماكو زواج وهمه يعرفوه يحبني ورادوا هيج يضغطون عليه وهم ما اجا وياهم وكال الهم مو الا تتزوج وهاي كدامكم اني مكعدها عندي