Oops! This image does not follow our content guidelines. To continue publishing, please remove it or upload a different image.
Hindi ko na maaninag ang liwanag Mula sa musmos na mga matang iyong iminulat Ngayo'y nais na ng mga matang lumabas sa pagkabulag Sa mundo, sa kalawakan at sa katotohanan
Natuto nang bumalanse Sa liwanag man o dilim, lahat ay maaari Hindi na hinahanap ang iyong haplos Ang pagkandong mo'y di na kinakailangang lubos Ang tanging nais ko'y yumapos sa silaw at lahat ng atin ay matapos
Hindi ko na kayang tanggapin pa Mga salitang aral ba talaga o sakit lamang ang dala Binabaon ako sa lupa ng pagkatao Pinapako ako sa tanong na ano pa ba ang halaga ko?
Makikiusap sanang bitawan mo na Yaring lubid na tanging ikaw lang humahawak sa tuwina Serbisyo mong ako'y mamulaklak ay naganap na Ngayon hayaan mong tuluyang bumukadkad sa sinag ng liwanag
Tama na ang paghila Ang kadena'y nasira ko na Hindi mo na ako makukulong pa Sa sarong na di ko naman ramdam ang pag protekta
Ngunit lahat ng ito ay tanging akala Nag lakad sa lubid ng mag isa Bakit ngayong nasa gitna na ay aking nakita Mga apoy at tinik sa ilalim ng tinatawid na ligaya
Ina habang tumatagal ay nakakasilaw na Hindi na makaya ng mga mata ang kislap ng paglaya At nang kumapit sa mga inakalang karamay. Pagsisising lubos'y nadama ng yaring kamay
Subalit ang akalang ako'y matutupok ng init Hindi namutawi't ako'y dumilat sa pagpikit At doon ko nasumpungan ang noong di makita Kailangan lang palang imulat ang aking mga mata, nang masilayan ang tindi ng iyong sandata
Paano mo nagagawang ako ay yapusin? Kung noong sumisigaw ka ng aking pagbalik ay tumalikod akong parin Ina tinulak ka palayo ng aking mga salita Subalit heto ka't di lumulubay at handang umalalay
Ang akala kong liwanag, lahat ay huwad Nasilaw sa kislap ng laya at sariling sikap Ina hindi ko pa pala kaya't kailangan ka pa Ngunit hindi pa man bumabalik ay hinila mo na, ibinalik sa bisig ng panatag at saya
Lahat sila ay iniwan akong mag isa Subalit pagtalikod ko'y ipinagkait mo pala ang distansya Salamat sa pag punas ng likido sa mga mata Sa halik sa noong nagpapaalalang pagkakamali ko'y tanggap mo na
Salamat sa pagpapatawad kahit ako'y di nakiusap Salamat sa pagsalo kahit ikaw noo'y itinulak Salamat sa pag tanggap sa paulit ulit na paglisan Sa pag ako ng kasalanang likha kong lubusan
Ang lahat ng sibat ng kasalana'y ikaw ang harang Ang sakit ay di naranasan ng dahil sa gamot ng iyong pagtahan Lahat ay lumisan at mananatili ka kailanman Ina sa pagkakataong ito, hindi na ulit kita iiwan
Ako naman ang yayapos sa 'yo't kakalinga Nais kong balutin ka ng aking pag pala Pasasalamat sa hindi pagsuko Sa pag tayo mo sa aking pag guho
Ikaw ang natira nang lumisan sila Ikaw ang totoong liwanag na inaasam sa tuwina Ang nag bigay ng bituin nang ang buhay ay dumilim na Ang naging araw at gabay sa pag kamit ng karera
Ikaw ang nais makapiling sa ngayon at sa bukas Sa gitnang panahong ako'y tumaliwas Pinatunayan mong sa pag bitaw ko'y hahawak ka lalo Sa huling pahina, babalik at babalik ako sa iyo
Ina sa huling sandali ng buhay ko'y nais kang kasama Sa pamamaalam ng araw at paglisan ng buwan Sasamahan kita't ako naman Aakayin, yayapusin at mananatili sa piling
Sa bukang liwayway ng kinabukasan Nais kong makita ang luha ng iyong kasiyahan Lahat ng sakripisyo'y susuklian ng kabutihan Hanggang sa huli ina, ika'y sasamahan
