روايــة #أصحاب_ونسايب
الحَــلْــقــة الثــآنــيــة 🌸
وصال تضحك : وانتي طيبة حبيبتي ، لالا لازم يوافق لو كان نترجاه انى
وليد يسمع فيهم و ساكت حرك المرآية بيعدلها جت عينه في فرح .. قلبه دق و تلخبط .. تفكر انها نفسها اللي شافها الصبح و لحست عقله و قعد يقول بينه و بين نفسه ( معقولة رفيق عمري مافيش مرة ريت اخته و تطلع بالصدفة صاحبة وصال !! ) الطريق كلها ساكت و مرة مرة عينه تجي في عينها في المرآية لين توترو هما الزوز ، لبس وليد نظاراته الشمسية باش فرح ماتزبطاش انه يشوفلها و باش حتى ياخد راحته 😂❤️
____________
وصلوا قدام حوش فرح و هي كيف نازلة قالت : شكراً وليد بارك الله فيك ع التوصيلة .. و نزلت
وليد تلخبط : اها ايه .. عفوا عفوا
وصال شبحتهله و ضحكت : خيرك ؟
وليد خش بعضه : ماخيرنيش
فتحت فرح باب حوشهم و أشرت بيدها لوصال "باي" و خشت ..
و وليد ماطلعش بالسيارة لين اتطمن عليها خشت للحوش لانها مسؤوليته
.. طلع بالسيارة و كمل طريقه ...
______
فرح تنحي في سبيدروها : مامااا ؟
فايزة : اهلين فوفا جيتي
فرح : لالا ماجيتش
فايزة ضحكت : مفلحك ف التلقيح زي عمر
فرح : راهو جعانة بنمووووت شن غدانا ؟
فايزة : ماطيبتش اليوم ، بوك عنده عزومة عرس و عمر قال متغدي برا
فرح شهقت 😧: و كان راجلك و ولدك مهناش نموت بالشر ؟؟ ولا الغدي ليهم هما بس 😒
فايزة تستفز فيها : فطورك متع الصبح اللي فضلتي عليه نفص المقصف قاعد لتوا يراجي فيك 😏
فرح سكتت شوية و بعدين قالت : باهي اهو تو ناكله و خلاص 😑
فايزة : انى اليوم عندي ماندير و وراي حنة بتجيني جارتنا نعيمة فالليل بديرهالي .. عرس بنت عمك بيبدا و حتى القفطان مازال ماشريتاش ، نوضي سلم بنتي كولي و كملي ضمان معاي باش يجي عمر يطلعنا
فرح تتأفف : ننعس هلباااا
فايزة : مش لازمك نوم اليوم
فرح تاعبة ، اتكت ع الكنبة : ياماما والله ماخاطري لا في طلوع لا في عرس نبي نرقد ، و حوش عمي هادو مبردهم هما و مناسباتهم كلها طواقة و تجكتير و تخلطيهم على بعضهم ماتطلعيش منهم واحد مقوم الا كانش بوهم هاه فيه مافيه ..
فايزة ضحكت : والله صدقتي ، لكن مابينا و بينهم شي ، غر هيا نوضي و بلا كثر دوة
____________
وليد درس سيارته قدام الحوش و قال لوصال :
نزلي الشكاير هادو حاجات تبيهم امك انى مش نازل
وصال : خيرك انت من اللي طلعنا من المدرسة و انت جوك مش تمام ! هدا كله على خاطر روحنا بفرح ؟ هي اول مرة تروح معانا البنية مافيها شي
وليد : تي شن دخل البنت انى ماقلت شي عادي غر جوي متعكر لان صاحب المحل كلمني امس و قال يبي يفضيه و انى ماعنديش وقت باش نلقى محل غيره
وصال تفاجأت : مش وقته بكل
وليد : مش قايلتيلي ان اخت عمر صاحبتك
وصال : والله ماخطرش عليا ، هي السنة هادي حولت للمدرسة متعنا و تعرفت عليها
وليد : شن جوها
وصال : كيف شن جوها
وليد : شي غر انزلي و ماتدوي شي لأمي ع المحل
وصال : به
نزلت وصال و خدت شنطتها و الشكاير و خشت للحوش
_____________
