روايــة #أصحاب_ونسايب
الحَـــلْـــقـــة الــتاسعـــة 🌸
عمر : نخلوه ع الطريق به
((خالد قريب يغيب عن الوعي))
وليد ركب السيارة : اني مش حاطه
____________
فرح مقعمزة مع ريحان يتفرجوا ع التلفزيون
ريحان : نوضي نقعمزو ف الجنان نشموا الهواء الجو حلو
فرح : لالا ليل و نخاف خالد يجيني
ريحان شبحتلها ع الجنب : من خالد هذا 😒 ! اطلعي من الجو اللي انتي فيه خلاص عاد
فرح متنكدة : مافارقش بالي ولا لحظة
ريحان : انتي بحالتك هادي بتزيدي تاكلي روحك .. العطلة بتكمل و ماتمتعتيش بيها
فرح شبحتلها و تنهدت : ايه صح
ريحان : حناك جاياتك غدوا مش لازم توضحيلها شي و حاولي تغيري جوك
فرح : تصدقي ماعنديش ليها خلوق و المشكلة جايين خالاتي معاها
ريحان : باهي مليح ارخي علينا الدور شوية اني و وصال 😂
فرح كشرت وجهها : مليتو مني ؟
ريحان باستها : عينك نبصر معاك خيرك مولية نكد هلبا ؟
فرح زعلت : اني نكد ؟
ريحان : اييييي علينا ، اني نعرف شن دواك
فرح : يعني اني مريضة ؟؟!
ريحان ضحكت : ههههههه نقصد نعرف شن اللي يغيرلك جوك
فرح : وليد بس
ريحان ضحكت : عارفة عاد السوبر هيرو متعك .. تزوجوا و ريحونا
فرح سكتت
ريحان : متأكدة ماتبيش العيلة يعرفوا باللي صار
فرح هزت راسها بمعنى ايه
ريحان : مهبولة انتي ؟؟؟ خليهم يعرفوه على حقيقته
فرح : لو بابا يسمع حيزوجنا على طول و مش حيصدقني و خالد هذا اللي يبيه
ريحان : ولو خالد قال ؟؟
فرح : مستحيل يقول .. حيخاف ويسكت
ريحان : مرات عمر يقول
فرح : تفاهمت معاه انه مايدوي لحد و قالي هو تو يربي خالد و معش نشوفه بكل
ريحان سكتت بعدين قالت : ياخوفي خالد يحطك ف راسه
فرح عيطت : ريحااااااان 😩
ريحان : باهي نبصر 😂
________
09:30 ص
سمية مش راقدة تبكي و مشغولة على خالد و اكرم حاط ايده على كتفها يصبر فيها
علي يقرا في قرآن
اكرم شرين تليفونه ...
سمية وقفت : رد بسرعة ( على أمل يجيها خبر على ولدها )
اكرم فتح الخط : ايوا علاء ! ....... مازال مافي شي .....
سمية قعمزت و انهارت بالبكي
اكرم طلع يتكلم برا ....
أمل جت و جايبة طاصة حليب لأمها : هاك ماما اشربي قيمي قلبك
سمية حركت صبعها بمعنى لا
أماني : لازم تاخدي حاجة مش باهي ليك يصيرلك هبوط
سمية تبكي : تبوني ناكل و نشرب و ولدي مفقود مانندريش عليه حي ولا ميت !
علي سكر المصحف و دمعته نزلت
__
اكرم خش : وصلني خبر على خالد
كلهم وقفو : شنوو
اكرم : قالولي موجود ف مستشفى بوسليم لقوه مضروب برصاص و داروله عملية
علي رعش : يالطيف يالطيف
أمل شدت وجهها : وووه عليا عليك ياخلودا
سمية فقدت وعيها و طاحت
_____________
بعد مرور عدة ايام 🌹
05:00 م
وصال و فرح ف الدار ... فرح شرين تليفونها
فتحت الخط : الو
وليد : كيفا الأمااار ؟
فرح ابتسمت : الحمد لله تمام وانت ؟
وليد : مادام فروحة قلبي تمام اني تمام التمام
فرح : ان شاء الله دوم
وليد : وياك يارب .. شن اتديري ؟
فرح : كيف طلعت من الدوش
وليد ضحك : احييييه ناعلياااا نا
فرح تحشمت : بطل
وصال جتها : شن قالك 😂
فرح فنصت فيها
وصال : عارفاته خوي قليل ادب
وليد : قوليلها نسمع فيك
فرح ضحكت : قالك نسمع فيك
وصال تصيح : تعالى طلعني اني و النكد هرمناااا
فرح فتحت السبيكر : لالا مانبيش
وصال كشرت وجهها : فرح ياسري من النكد كبدي طابت ره ، حتى المدرسة معاش مشيتيلها لآمتى بتقعدي مكتئبة
وليد : وتو روحكم ربع ساعة و نجي
وصال فرحت و نطت : يسس 😍💃
فرح : ياوليد ...
قاطعها وليد : ربع ساعة و نجي ، مانبيش نشوف نقطة مكياج في وجوهكم
وصال مش عاجبها الكلام تعوج في فمها و تقلد فيه بلا صوت
فرح ضحكت : باهي حاضر
وليد : هي تشاو ... سكر الخط
وصال : مبرده لازم منها الجملة الشهيرة هادي
فرح فتحت الاستشوار تجفف ف شعرها : اوخيك حبيبك تحمليه
__
