روايــة #أصحاب_ونسايب
الحَــلــقــة الــثَـــانــيــة عَـــشـــرْ 🌸
محمد يوقف فيها : هي نوضي بالشوية عليك
فايزة تشوفلها : حتى وجهك اصفر يا وفاء .. بالك فيه حويجة ؟
عمر تحشم و طلع من الدار
صلاح طالع من الدار : تصبحو على خير
محمد شبح لأمه : شن قصدك ؟
فايزة : بالك حامل
وفاء ضحكت : لالا مافي شي يا ماما ممكن من الإرهاق و التعب بس
فايزة : ايه علاش لا ، لازم تخاوي وليدك
وفاء سكتت
محمد : تقدري تشدي روحك ؟
وفاء : ايه خلاص جيب سنودي و خلي نركبوا حسيت روحي احسن
_______________
اسراء متغطية ف فراشها و تبكي
خشت عليها وصال : اسراء !
اسراء قامت الغطاء : سكري الباب وراك بسرعة نخاف منهم السكارة را فكينا منه
وصال فنصت فيها : مصحك هذا خوك
اسراء تبكي : و كان خوي .. السكران مش فايق مايندريش على روحه شن يدير
وصال لوحت الوشاح ع السرير و مشت لوليد
فتحت عليه الباب و خشت قربت منه : وليد ؟
وليد شبحلها عيونه دبلانات و دوب مايدوي : بينحيهااا مني يا وصاااللل
وصال تبكي واجعها خوها و الحالة اللي هو فيها
خدت كلينكس تمسحله ف الدم : علاش عينك حمرا و حاحبك دم ! من ضاربك
وليد سكت ... تنهد و خداه النوم
نحتله وصال سبيدروه و شخشيره و غطاته و طلعت
_________________________________
_____________________
بعد مرور عدة أسابيع🌹
05:00 م
ريحان واقفة مع فرح ف الجنان يشوفوا في اجواء حفلة النجاح
ريحان : محلاه جو اليوم يهبل
فرح متنكدة : ماريتله حلاوة
ريحان : خلاص عاد افردي وجهك و وري ضحكتك بيورقولك را .. ياسر باين عليك الضعف و الإرهاق ليك فترة على هالوضع
جت وفاء و ف غمرها سند : شن رايكم ف صبغتي ؟
ريحان شبحتلها : محلاه اللون قداش خاطري نديره بالذات الدرجة هادي
فرح تشوفلها و ساكتة
وفاء : انتي احلى ريحونة تبي نرفعك اديري زيه ؟
ريحان : يارييييت فرقت حالي بالله
وفاء : علاش شن فيها
ريحان : تبي هدى تبيتني فم الحوش امالا ؛ نروحلها شعري موف
وفاء ضحكت : عادي باتي عندنا 😂
ريحان ضحكت : شن علق راجلك لما شافه
وفاء : ماشافاش جابني خوي من المزين
ريحان : حتى مكياجك حلو درتيه بروحك ؟
وفاء : لا وين بروحي ماعنديش وقت باش نقعمزله مشيت لمزينة فاتحة جديدة جهة حوش اماليا
و شبحت لفرح لقتها سارحة و منكدة ؛ خبطتها بكتفها : وين وصلتي ؟!
فرح شبحتلهم و عيونها دمعوا : اليوم عيد ميلاد وليد
ريحان : خلاص تأقلمي مع الوضع
و سكتو شوية
وفاء : خلي نمشي نعطي سند لمحمد يفكني منه شوية و اني ف جرته ولّا وزني قريب اربعين كيلو
ريحان : تو محمد بينخلع من اللون
وفاء ضحكت
و هي ماشية : مدايرتهاله مفاجأة خاطره فيه ليه هلبا
ريحان ضحكت و شبحت لفرح : ياسر من الدموع مكياجك ساح بتولي زي الباندا
فرح منزلة راسها و دموعها ينزلو : فرحتي ناقصة اليوم ، نحس كأن فيه حاجة مخلية مكانها ف كبدتي و قلبي غام عليا
ريحان : معاش سمعتي عليه شي ؟
فرح هزت راسها : لالا ، من اخر مرة دويت مع وصال .. ليا قريب اسبوع مانندريش عليه شن حاله و شن صاير فيه
ريحان : ماتصلش بيك بكل ؟
فرح : من ليلتها معاش نتكالموا خلاص انتهينا
ريحان اضايقت : بتجي وصال ؟
فرح : ماظنيتش ؛ بعتلها العزومة ف مسج و خلاص .. وليد معاش يبيني نواصلها اكيد مش حتجي
ريحان سكتت
فرح : قالتلي انه قاللها معاش تجيبيلي سيرتها ولا عاد تدوي معاها
ريحان ساكتة
فرح تبكي : ريتي كيف تشرتعنا ؟ حتى عمر سيب صاحبه ف جرتي و اني مانبيش يصير هكي
ريحان : الله غالب نصيب
فرح اضايقت هلبا : اني بنخش شوية الداخل
ريحان : ماتعطليش اكيد شوية و يوصلوا البنات و العيلة
فرح : باهي
ريحان : دكني مكياجك لونه باهت
فرح خشت و ريحان قعمزت ع الكرسي تاخد ف سيلفيات
