روايــة #أصحاب_ونسايب
💖
الــحـــلـــقـة الــخــامــســة عــشَـــرْ 🌸
ريحان تأثرت : ووه عليها قداش حست مسكينة
فرح : ايه وجعتني ، ابصر خيرها
ريحان : راك اتديري زيها
فرح اتضايقت : لالا .. اني سلمت احكامي لربي خلاص
عمر يركب ف البليستيشن : شن اسمها البنت
فرح شبحتله : قالو سرور لكن مش منزلين لقبها
عمر ماهتمش بالموضوع ، قعمز الكنبة و بدو يلعبو 🎮
ريحان : كان بيصير فيها حرق الدم بنوض
عمر ضحك : المرة هادي اني بندبسك ف المفروم
فرح ضحكت
ريحان : هيا فكني منك 😂
________________
وفاء طلعت من الدوش لقت محمد واقف يشوف شن بيلبس من بداليه العربية
محمد شبحلها : شن رايك هادي ولا هادي ؟
وفاء تشوف : مش عارفة
محمد : هادي خير وله ( لونها بيج )
وفاء : البس الزرقاء
محمد قعد يشوف للبدلة : هكي تقولي انتي
وفاء : الأزرق يطلع عليك احلى 😉
محمد ضحك : خلاص تو نلبسها
وفاء : الفاتحة بعد العصر ؟
محمد : ايه ، بعد الظهر عزومة الغدي و بعدها على طول الفاتحة
وفاء : و اكيد بيبدو بفاتحة اكرم قبل
محمد : مش عارف ، بما ان اكرم الكبير اكيد هو قبل
وفاء تنهدت و سكتت
محمد شبحلها : خيرك
وفاء : يا ناري على فرح
محمد اتكّا ف السرير و ماردش عليها
وفاء وقفت بحداه : ترا حط روحك ف مكان وليد
محمد : كيف
وفاء : مثلا انت لما جيت خطبتني ؛ بابا ردك و غصبني ناخد ولد عمي كيف كنت حاتتصرف ؟ و بالذات لو عرفت بالفاتحة متاعي بيديروها
محمد يشوفلها و يفكر
وفاء قامت حاجبها : شني
محمد خافها تزعل تاني : اكيد حنحارب على خاطرك
وفاء علت صوتها : امالا دير موقف لأختك مش معقولة هكي
محمد فنص فيها : وفاء !! سكري الضي و خلينا نرقدو
وفاء تتأفف ..
محمد : وفاااء !!!
سكرت وفاء الضي و اتكت رقدت
_____________
02:30 ص
فرح نعست و اتكت ع الكنبة
عمر شبحلها : فرح ؟
فرح مغمضة عيونها : نعم
عمر : نوضي لدارك
فرح : خليني هني مانبيش نرقد فوق
ريحان : تي نوضي عاد
فرح علّت صوتها : قلت نبي نرقد هني
ريحان : و اني وين بنرقد
فرح فتحت عيونها و شبحتلها : فرشي ع البساط
و ارقدي
ريحان ضحكت : تحشمي راني ضيفة
عمر : هيا نوضي .. ولا تبيني نقيمك ؟
فرح ضحكت و قامت يدها : ايه بالله عليك
عمر وقف بحداها : اوقفي بلا دلع
فرح : خليني نتدلع عليكم شوية الليلة .. انت قيمني لفراشي وريحان تجيب تليفوني و الشحن
ريحان تضحك
عمر ضحك : شن معنى الليلة
فرح حطت يدها على جبهتها و سكرت عيونها : اخرلي ليلة ف حياة العزوبية
(( عمر شبحلها و سكت ))
فرح مغمضة عيونها : عزمت صاحبك ياعمر ؟
عمر استغرب : شنو ؟
( فرح خنقتها العبرة 💔 )
(( عمر و ريحان سكتو و شبحو لبعض ))
فرح مازال مغمضة عيونها : صاحبك رفيق عمرك عزمته على فاتحة اختك ؟
عمر انحرج : فوفا هيا نوضي لفراشك
فرح بدت تبكي و عيونها مسكرات : حرموني منه الله يحرمهم من الجنة
(( ريحان عيونها دمعو ))
فرح مغمضة عيونها ، تبكي و تحرك ف يدها : شن بيصير ف الدنيا لو غدوا فاتحتي اني و وليد ؟ و نكونو اسعد زوز ف العالم ؟ ... علاش حكموا عليا بالموت البطئ ؟
(( عمر عيونه دمعوا ))
فرح تبكي : يحسابوني بنتهنى معاه خالد ؟
تحرك ف صبعها و مغمضة عيونها : لالالا ؛ اصلاً كل يوم حانموت اكتر من اليوم اللي قبله .. اني لتوا مانسيتش وليد ، ولا حاننساه طول عمري
(( عمر يشوفلها و شاد بكيته ))
فرح صوتها مبحوح من البكي : وليد معاي في كل حركة نتحركها ، معاي ف كل خطوة نمشيها .. لما نبدل ف خطواتي نشوف فيه قدامي .. وليد بين عيوني طول الوقت ، حتى ف نومي نشوف فيه .. حتى لما نتكلم ؛ لساني بيغلبني و بيقول اسمه 💔 كيف يبوني ننساه و نعيش مع واحد غيره ؟
شبحت لعمر و عيونها دموع : كيف ياعمر ؟؟ حط روحك ف مكاني
عمر شدها من يدها ؛ قعمزها و قعمز على ركابه قدامها
فرح تشوفله : ياريت هو اللي بيتزوج وحدة تانية مش اني اللي بنتزوج غيره و بنقهره
عمر يمسحلها ف دموعها : و راس عيونك مايصير الا اللي تبيه انتي و ربي العزة خالد ماهو واخدك ولا راي ظفرك
فرح ضبطاته و تبكي قلبها محروق : آآه يا عمر 💔
عمر دمعته نزلت
فرح تبكي : معاش تزيد تعذبني بكلامك
(( عمر مضبطتها و يبكي معاها ))
(( ريحان تشوفلهم ؛ حاطة يدها ع فمها و تبكي بلا صوت ))
فرح مضبطاته : انت مقايلهولي الكلام هذا من قبل و ماصار شي .. بالله عليك معاش تخليني نتأمل ع الفاضي ياعمر 💔
عمر مسح دموعه بسرعة و رشف خشمه و سكت
فرح : خلاص معاش قادرة نتحمل اكثر ، خليني اني بس اللي ندوي و نطلع اللي ف داخلي ماتردش عليا
عمر وقف و شدها من يدها : نوضي معاي
فرح تنهدت 💔
عمر : هيا
فرح هزت راسها ، وقفت و دوب ماتمشي : تو نركب بروحي .. ( و ركبت لدارها )
عمر يشوفلها و مستاجع عليها
ريحان تشوفلها و تبكي : عمر !!
عمر شبحلها
ريحان تشوف لفرح راكبة ف الدروج : هلبا اللي صاير فيها والله حرام
عمر خدي نفس عميق و قال : اصلا نبيك شوية
ريحان شبحتله و استغربت : شنو
عمر : نبيك ف موضوع
ريحان مسحت دمعتها : موضوع شني
عمر بصوت واطي : بنسفرها غدوا
ريحان شهقت : بجديااااات ؟؟
عمر فنص فيها : نقصي صوتك
ريحان مصدومة و توشوش : كيف صار ؟؟
عمر : امس خديت جوازها و حجزتلها
ريحان : علاش ماقلتلهاش ؟ تشوف ف حالتها كيف !!
عمر : مانبيش نقوللها لأخر لحظة ، نخاف نعطيها أمل و تصير اي حاجة مايصيرش من السفر تزيد تنقهر
ريحان سكتت و قعدت تفكر
عمر : المهم خليها ترقد و وتيلها شنطتها و تو نحطها ف داري
ريحان : به .. ساعة قداش طياراتكم ؟ و وين بتسافرو ؟
عمر : ساعة 2 الظهر لازم نكونو ف المطار بنمشو لتونس و من تونس لتركيا
ريحان سكتت بعدين قالت : شن بتستفيد لو سفرتها يعني هكي ولا هكي الفاتحة حاتكمل
عمر : مش مهم .. المهم تسافر و مرات يسمعو بيها هربت عمي مايصيرلاش ، و بعد وقت ترفع على خالد قضية خلع
ريحان : تخاف بوك يروح بيها قبل العرس
عمر : بوي مش حايعرف وين بنسافرو و اني مش حنروح بيها بكل لين ينتهي موضوع خالد
( ريحان سكتت و بدو ايديها يرعشو : ارفع معاك كتيب العائلة باش مايلقوشي
عمر : دورته مالقيتاش
ريحان سكتت
عمر كيف بيركب ..
ريحان : عمر !
عمر تلفت : ايوا
ريحان : سمعت باللي صار مع وليد اليوم ؟
عمر : ايه مشيتله امبكري بعد ماروحت بيكم
ريحان : اني مابيتش نقول لفرح
عمر فنص فيها : ردي بالك
ريحان : زعما مني اللي كان بيقتله
عمر : مش عارف
ريحان : اكيد خالد
عمر : لالا ، خالد شن بيستفيد من قتله ؟ خلاص وصل اللي يبيه و وليد طلع من حياة فرح
ريحان سكتت
عمر : ماتدوي شي قدامها بس و مانبيش حد يعرف بموضوع السفر
ريحان هزت راسها : به ، تصبح على خير
عمر : اما تصبح على خير ! وتي الشنطة و ناديني نجي ناخدها عندي
ريحان : اوكى .. ( و ركبت لدار فرح )
___________________
