روايــة #أصحاب_ونسايب
الحَـــلْـــقـــة الــحــاديـــة عــشـــر 🌸
اسراء تضحك : يعني ف الاخير الكيكة ماصارش منها
وصال : ماصارش ، لكن المهم الجية ماطلعتش ع الفاضي قلبي لتوا يرقص
اسراء : غير كان تحركتله شعرة كله باهي
وصال : تي صارله احرف مني يرعش مع بعضه
__________
• وليد طلع من الحمام و يمسح ف شعره بالفوطة لقي هيثم كيف طالع
وليد : وين وين
هيثم : كلمتني اختي تبيني نجيبها لحوشنا
وليد ضحك : ميليشيات يوم الجمعة ؟
هيثم يلبس ف كندرته : ايه ههههه نتلاقو فالليل مع الشباب ؟
وليد : والله ماعارف عندي مشوار بعدين ، تو نشوف روحي و نكلمك
هيثم : مية مية .. هي تشاو
وليد : سلامات .. هيثم طلع و سكر الحوش
خش وليد لداره صلّا صلاته و اتصل بفرح .. لقي رقمها قاعد مسكر استغرب و كتبلها مسج باش يروقها لأنها زعلت منه لما علّا صوته عليها
__________
طلعت فرح من دارها و نزلت للمطبخ لقت امها توتي ف الفطور ع الطاولة و صلاح مقعمز
فايزة : قعمزي افطري معانا
فرح ماردتش عليها
صلاح : الناس يصبحوا و انتي خاشة زي البهيمة
فرح ساكتة ماتبيش ترد عليهم ، فتحت الدولاب خدت فازو نوتيلا و خدت كاشيك من القجر و طلعت
لحقتها فايزة : ياسر من الشكلاطة مافيش منها فايدة تعالي افطري معانا و خلي نوتوا الغدي بكري خوك و مرته مروحين اليوم
فرح راكبة للدروج و ساكتة
فايزة : نكلم فيك اني اشبحيلي يابنت
صلاح يصيح من المطبخ : خليها تو نعرف كيف نربيها
خشت لدارها و سكرت الباب ، قعمزت على سريرها و فتحت تليفونها تتصل بعمر ....
عمر فتح الخط : ايوا فوفا
فرح : انت وين ؟
عمر : صبحي قبل
فرح : صبح شني و اني مش راقدة
عمر : نكدها عليك اه
فرح تنهدت : وينك امس ماروحتش مليت بروحي
عمر : صهرت مع وليد و الشباب و بتت معاهم
فرح : و توا وين ؟
عمر : ف البحر مع عزو
فرح : باهي امتى مروح ؟
عمر : مش معطل نص ساعة و طالع من هني ، خيرك شن تبي ؟
فرح : نبي نمشي معاك للمطار تروح بمحمد و وفاء
عمر : باهي وتي روحك بعد صلاة الجمعة
فرح : ماشي باي
عمر : تشاو .. و سكر الخط
فرح كيف بتسكر التليفون لقت مسج من وليد فتحاته
(( صباح الورود المتناثرة بأجمل ألوانها ، راسمة لوحة تنافسك في الجمال ، و صباح عطور الياسمين الطيبة لتعطر يومك الجميل ، و صباح حب و غرام أشاركه مع أجمل إناث الأرض جمالا، جعل الله ايامك سعيدة جميلة ممتعة حبيبتي ))
فرح لما قرت المسج غيرلها جوها و نست النكد اللي كانت فيه ابتسمت و اتصلت .....
وليد فتح الخط : هلا بغاليتي
فرح اتكت على سريرها مبتسمة : صباحوو
وليد : ياصباح الحب و الغرام
فرح ضحكت بصوت خفيف
وليد : و يا صباح البوس و الأحضان
فرح تحشمت : بطل
وليد : صبااح البوس من الرقبة اللي يبعد الأحزان
فرح : هيييه شد فرينو
وليد يضحك : ههههه لازم تتعودي
فرح ضحكت : كيف كان يومك امس ؟
وليد : قبل كل شي انتي اللي وينك امس نتصل بيك رقمك مسكر هدا كله زعلانة ؟
فرح تنكدت ، تفكرت اللي صار معاها خدت نفس عميق و سكتت
وليد : حبيبتي ؟
فرح : خالد روح
وليد انصدم و علّا صوته : روح ؟!!!
فرح عيونها دمعوا : ايه ليه يومين و امس عرفت
وليد : بااه شن اللي صار ؟
فرح تبكي : عمي دوي مع بابا عليا 😔
وليد تعفلق : مستحيل يصير ، اني اليوم جاي لبوك بندوي معاه
فرح : خايفة هلبا لتوا مارقدتش ولا غمضة
وليد : و رحمة بوي ماصاير منه موضوعه و على جثتي ياخدك
فرح تبكي : امس كانت ليلة سوداء عليا معاش عرفت كيف نتصرف معاه
وليد : هذا علاش امس عمر جاي طايرتله
فرح : تعارك هو وياه على خاطري
وليد : ان شاء الله اليوم لما ندوي معاه يغير رايه
فرح : ان شاء الله .. تقول في عقلها ( ماظنيتش )
وليد : فروحتي ؟؟ خلاص بيبي امسحي دموعك
مسحت فرح دموعها و رشفت خشمها : باهي
وليد : مع ساعة ستة نكون عندكم ان شاء الله
فرح : اليوم محمد خوي مروح ، تعالى بعد المغرب باش يكون روح لحوشه
وليد : عادي خلي يحضر
فرح : لالا دماغه احرف من بابا تو يزيد الطين بلة
وليد ضحك : اني متفائل ماتخلينيش نخنس
فرح تنهدت : ان شاء الله خير .. نستأذن توا بنوض نضم الحوش
وليد : مش حترقدي ؟
فرح : مش حنقدر نرقد لين يتم هاليوم على خير
______________
