روايــة #أصحاب_ونسايب
( ملاحظة : مواقف الحلقة هادي كلها واقعية )
الحَـــلْـــقـــة الــسابـــعــة 🌸
وليد : ايه ، حطها ف حجره و طاح فيها
وصال تكنطت تقول في عقلها (يعطيه سمسام يسمسمه قطع بنصيبي الله يقطع حلقه 😓)
وليد شبحلها : خيرك سكتي !
وصال : لا شي صحتين عليه
_________
ريحان : نهنيه الصراحة على شجاعته
فرح : تعرفي قلبي قريب طلع مني لما عمر قالي
ريحان : والله فرحت ان عمر موافق ان شاء الله يتم موضوعكم على خير
فرح : ان شااااء الله ياااااارب
ريحان : ياريت وصال قعدت معانا
فرح : شن رايك نخطموا عليها غدوا
ريحان : قالت ماتقدرش
فرح : وليد العشية كلها ف المحل وين يندري عليها كان طلعت ، و اني اصلاً مش حانقوله
ريحان : امالا تو نتصل بيها
فرح : نمشو لمحلات الجرابة !
ريحان ضحكت : تبي تهيجي
فرح : نبي نتنفسسسس
ريحان : خلاص غدوا احلى نفس
_____
وصال كيف خشت لحوشهم جوها مش تمام ، شرين تليفونها لقتها ريحان ، خشت لدارها و سكرت وراها الباب
فتحت الخط : آلوو
ريحان : اها حبي شن الجو
وصال متضايقة : كان تعزيني نقبل العزي
ريحان انشغلت : شن فيه !!
وصال : البسبوسة كلاها صاحبهم الثالث و هيثم ماذاقهاش
ريحان ضحكت و فتحت السبيكر : شنو شنو عاودي 😂
وصال متنكدة : قلتلك ماكلاهاش هيثم كلاها عز الدين ولد الكلبة ماخلّا منها طرف
البنات ضحكو بصوت عالي : ههههههههههه 😂
فرح : عادي ماتاكليش روحك و راسك لما نجيبوه
وصال : ان شاء الله ، شن اديرو ؟!
ريحان : شي متكييّن و نهدرزو فيه دوة جديدة صارت
وصال تشوقت : شن صااار ؟
فرح : غدوا نخطمو عليك بري معانا و نهدرزولك
وصال : ماك عارفة مش حنقدر
ريحان : اطلعي بِ الدرقة وتي روحك مع ساعة أربعة ونص
وصال : تم تم .. ماما مش حاتقول شي و هداكا يروح متأخر شوية
فرح : اطلع طول
وصال : ياريتني معاكم ، الشيت كله من الدراه اللي عندي
فرح : هيييه احترمي نفسك مانرضاش ف الويلّا متاعي 😌
ريحان ضحكت : هههههه 😂
وصال : باهي وانتي واتية ، هي سكرو قاعدة بحوايجي
ريحان : ماشي باي باي .. سكرت الخط
خشت اسراء : اعطيني تليفونك بسرعة
وصال : يا نمي ، غر نوصلوو
________
تاني يوم ساعة 04:00 م
فرح واقفة ع المرآية اتدير ف اللاسترا لشعرها وريحان تمكيج ع مرآية الدولاب
فرح : شن بتاخديله انتي
ريحان : خاطري ناخدله سبيدرو و بما ان ماشيين للجرابة تو ناخده من محل الرقة سبيدرواته حلوات
فرح : الفالنتاين قريب نفكر ناخد لوليد من توا باش مانقعدش ندوّر كيف بنطلع لما بابا يروح
ريحان : باهي مليح هي طلعة طلعة
فرح كملت شعرها : هيا اطلعي وقت ، عمر قالي ماتعطليش
ريحان تلبس ف وشاحها : كملت اني
فرح شرين تليفونها : هذا وليد ، مش وقته
ريحان : ديري روحك متكية و ناعسة
فرح فتحت الخط و بصوت هادي : الو
وليد : فروحة قلبي
فرح : اهلين حبيبي
وليد : شنو راقدة بيبي ؟
فرح : لالا متكية و مرخية بس
وليد : كله مني سهرتك هلبا امس
فرح : لا عادي ولا يهمك ، كيف كان يومك ؟
ريحان تتأفف و توشوش : وقت يومه توا ؟؟ اختصري بسرعة و سقديه
وليد يدوي بروحه .........
فرح نزلت التليفون و تكلم ف ريحان : باهي دقيقة خلي نماطل باش مايحسش بيا
ريحان : دوته هلبا تبيلك باش يسكر
وليد : فرح ؟!
فرح فنصت فيها و ردت التليفون لوذنها : الو مانسمعش فيك
وليد : شكلك بترقدي حق وينك من بكري ندوي بروحي
فرح : لا مش حنرقد توا ريحان قاعدة معاي بنوض و بننزل معاها للمطبخ
وليد : اه نسيتها ، باهي امالا نخليك توا و نهدرزو بعدين
فرح : اوكي
وليد : سلام .. سكر الخط
فرح : اوووه و اخيرا
ريحان : بسرعة راهي وصال تراجي ...
____وصال لابسة و راقدة ف سريرها تراجي في وليد يطلع
اسراء : بنمشي معاكم وراي بتات
وصال : لا بتات لا اثاث ، مانقعدش نكر فيك وراي تقولي جايباتك من بطني
اسراء جلدتها بِ الشحن : خيرك ؟!!
وصال : ايه شن حركات المفرخ هادي ! طالعة مع صاحباتي تبيني نكرك وراي ريحيني ترا
اسراء : بري ملحي تو نطلع غدوا مع صاحبتي هناء
وصال : به زينة
خشت عليهم فتحية : وصال امتى بتخطم عليك ريحان
وصال : تي فضحتيني
اسراء تتسهوك و تنادي : وليــد !
وليد جاها : ايوا
وصال غطت روحها ع اساس راقدة
اسراء : مش لازم تمشي للمحل اليوم خلي الولد ف مكانك
فتحية : علاش ؟
وليد : علاش شن تبو ؟
وصال تتكمر تحت الغطاء و تتحلف ف اسراء
اسراء تغيظ ف وصال : فيه حاجات ناقصين نبو نطلعو ناخدوهم للفضانية
فتحية : ايه صح و بنحجزوا الديكور
وليد : ايااااه نسيته موضوعها
و تلفت لإسراء : جو الديكور فوتيه مصاريف زايدة و تبوديع
اسراء : والله ؟! مانبيش تقعد حاجة ف خاطري كل شي نبي نديره نازك
وليد سكت
فتحية : اييييه من حقها
وصال دمها يغلي تقول في عقلها ( والله الا ما نوريك يافرخة اسراء ) و قامت الغطاء من على راسها : لالا برا انت للمحل تو نقولو لخالتي زينوبة تجي ترفعنا علاش نعطلو فيك
وليد : لالا خلاص تو نرفعكم اني
اسراء تضحك بشماتة
وصال فنصت ف امها
فتحية : توكل انت ، تو نمشو مع خالتك لان حتى فيه حاجات تانية نبوهم حني و زينوبة
وليد : زي ماتبو يام اللي يريحكم لو تبوني نرفعكم ماعندكش مشكلة بكل
وصال : لالا صحيت سلم وخيي ربي يحفظك ان شاء الله مانفقدوك .. وتبوس فيه ف الهواء امواه💋 امواه 💋 .. تقول ف عقلها ( غر يا سويدي اطلع قبل مايوصلوا )
اسراء ضحكت : غر لا مش هكي 😂
وليد ضحك : ديما مدوختيني بالكلام اهوا
وصال : عاد مش ديما اكيد مخليه لغيري شوية
اسراء ضحكت : ههههههههه 😂😂
فتحية شبحتله و ضحكت : مازال ماتبيش تقولي من هي ؟
وليد : قريب تعرفيها .. و طلع
فتحية : كل ما نسأله يهرب ، قولولي تعرفوها انتو؟
وصال : ايه نعرفوها و سامحينا مانقدروش نقولو الا بِ اذن منه
اسراء : هالحاجة الكبيرة و كان عرفت يعني
فتحية تشوقت : من هي ؟! بنت شكون ؟! قنينة !
وصال : غر بالشوية عليك
اسراء : تعرفيها انتي يا ماما
فتحية : بالحق ؟؟ من هي !!
اسراء : حزري فزري
وصال كشخت عليها : احترمي خوك عاد كان بيدوي راهو دوي
فتحية : من حقي نعرف بنت شكون ، اهم شي امها شني طمنوني واعرة ؟؟
وصال ناضت : اتطمني امها تهبل وانتي تحبيها
فتحية : من العيلة هي ؟؟
اسراء : لالا بعيدة ع العيلة
وصال تلبس ف وشاحها : برانية
فتحية : باهي حلوة ؟ ولدي غزال لازم ياخد وحدة تليق بيه ايواااه
وصال : هي احلى منه
اسراء : لا هي من ناحية الجمال ماشاء الله عليها
فتحية استريحت : باهي الحمد لله ، والله نفكر فيها صبح ليل خاطري نعرفها راس وليد نبيله ست الصبايا
وصال : و حني ماتبيلناش سيد التريس !
فتحية فنصت فيها : تحشمي يابنت
اسراء : مصحك خليتيها نداد را 😂
