روايــة #أصحاب_ونسايب
الحَــلْــقــة الــرابــعــة 🌸
الولد مازال واقف ع الروشن و يناشب
وليد متعفلق : نكلم فيك اشبحلي .. شن تبي ؟
الولد شبحله : وانت شن ليك علاقة ؟؟
وليد : دقيقة بس تو نقولك شن ليا علاقة .. حط البيتزا ف السيارة و تلفتله خبطه براسه على خشمه .. الولد داخ شوية بعدين ضرب وليد بوكس على فمه خلاله شاربه تم
وليد شد فمه بيده لقاه دم زاد تعفلق : و تمد في ايدك يا امسخ ؟؟ .... بدي يضرب فيه بوكسات على عيونه .. الولد طاح و وليد فوقه يضرب فيه
فرح تبكي خايفة
وصال تصيح : وليد اركب فكنا منه 😰
وليد : تناشب في بنات الناس يا *****
الولد يسب ****
فرح تبكي : وصال ركبي خوك مانحبهمش المشاكل
وصال ترعش : مانقدرش ننزل 😰
وليد وقف و بدي يضرب فيه تيروات على جنابه و رجليه : و تقولي شن ليا علاقة يا كلب ! تفي عليك و على اصلك
الولد طايح ، شاد عينه و يسب ****
(( ركب وليد السيارة ))
وصال ترعش : اطلع بسرعة قبل مايطلع صاحبه
وليد متعفلق : خليه يطلع باش ياكل طريحة حتى هو .. و تلفت بيدير نديترو شاف لفرح لقاها تبكي .... وخر السيارة و طلع
____
قعدو الطريق كلها و هما ساكتين
وليد شاف لفرح في المرآية لقاها مازال تبكي و تسبح في دميعاتها
مدلها كلينكس .. خداته منه و مسحت بيه دموعها
وصال : نزلنا بنغيرو جونا لقينا روحنا راعشين
وليد : خلاص فوتيه الموضوع
وصال تلفتت لفرح من جهة الروشن توشوش : راك تنسيني بعدين
فرح توشوش : في شنو !
وصال : قولي لعمر هو يقوله ع الطرد
فرح : باهي ولا يهمك
وليد شافلهم : شن توشوشي انتي وياها ؟
وصال تلفتتله : فرح قالتلي نفكر ف البنت شن صاير فيها
فرح ضحكت
وليد : انى تفاجأت بيك لما ريتك متحولة لكائن متوحش قلت شعوبّا قاعد كيف ماهو
وصال ضحكت : لي هالدرجة ؟
فرح : شعوبّا ؟!!!
وليد شبح لفرح ف المرآية : ولاد شارعنا مسمينها شعوبّا شبر و نص ، كانت ف كل مباراة تلعب معاهم ، و ملاعبية مليح و في اي عركة خاشة فيها و تطلع منها ضاربة مش مضروبة
فرح ضحكت : هههه مايطلع منك .. والله ماباين عليك و مفيش مرة دويتي على ماضيك المسترجل
وصال تضحك : عندي بيهم جو العركات مانتحملش لو مانضربش نخش فيهم بالعرض
فرح : اهو رينا مواهبك اليوم ، باهي اللي ماصوروكش كان منظرك ابدااع 😂
وصال ضحكت : هههههه عادي والله ما مدورة
وصل وليد لحوش فرح ..
فرح نزلت : سلامات
وليد ساكت
وصال : باي
_____
فتحت فرح الحوش و خشت للمطبخ : آنستكم
فايزة : الله يآنسك ، غيري حوايجك بسرعة بوك قريب يوصل تو يشوفك بيهم و يزبطك عطلتي
فرح : مش ف الحوازة هو ؟
فايزة : ايه لكن اكيد على خشة
فرح : يالطيف قداش مركبلك الرعب
عمر : علاش مشي ؟
فايزة : قال البير جرف و جايبله صوندا
عمر : اه به ..
و شبح لفرح : كيف كان الجو ؟
فرح : مليح .. غمزاته و همستله ( تعالى نبيك ) و طلعت من المطبخ ركبت لدارها
عمر ناض لحقها
______
